އެފްއޭއެމްގެ ހާލަތު އޮތްގޮތުން ބަންގްލަދޭޝް އަތުން އޭރު ބަލިވެގެން ހިތާމައެއް ނުކުރަން: ސުޒޭން

އެފްއޭއެމްގެ ހާލަތު އޮތް ގޮތުން، އެންމެ ފަހުން ބަންގްލަދޭޝްއާ ދެކޮޅަށް ކުޅުނު މެޗުން ބަލިވެގެން ހިތާމަ ނުކުރާކަމަށް ގައުމީ ޓީމުގެ ކޯޗު އަލީ ސުޒޭން ބުނެފި އެވެ.

ގާތްގަނޑަކަށް އެއް އަހަރަށް ފަހު ބައިނަލްއަގްވާމީ މެޗަކަށް ރާއްޖޭން މިއަދު ބަންގްލަދޭޝްއާ ދެކޮޅަށް ނުކުންނާނެ އެވެ. އެންމެ ފަހުން ވެސް ރާއްޖޭން މެޗެއް ކުޅުނީ އެ ގައުމާ ދެކޮޅަށެވެ. ވޯލްޑް ކަޕް ކޮލިފައިންގެ ފުރަތަމަ ބުރު ނުވަތަ ޕްލޭއޮފް މަރުހަލާގެ އެ މެޗުން ރާއްޖެ ބަލިވެގެން، ވޯލްޑް ކަޕް ކޮލިފައިންގެ ގުރޫޕް ސްޓޭޖަކަށް ނުދެވުނެވެ. އެ މެޗު 2-1 ން ކާމިޔާބުކޮށް ބަންގްލަދޭޝް ކޮލިފައިންގެ ގުރޫޕް ސްޓޭޖަށް ވަނެވެ.

ރާއްޖޭ ގަޑިން މިއަދު ހަވީރު ފަހެއް ޖަހާއިރު ކުޅޭ އެކުވެރިކަމުގެ މެޗު އޮންނާނީ ޑާކާގެ ބަޝުންދަރާ އެރީނާގަ އެވެ. މެޗާ ގުޅޭ ޕްރީ މެޗު ޕްރެސް ކޮންފަރެންސްގައި ބަންގްލަދޭޝްގެ ނޫސްވެރިޔަކު ކުރި ސުވާލަށް ޖަވާބު ދެމުން ސުޒޭން ބުނީ އެފްއޭއެމްގެ ހާލަތު އޮތް ގޮތުން ކޮލިފިކޭޝަންގެ އަވޭ މެޗުތަކަށް ދަތުރު ނުކުރެވިދާނެ ކަމުގެ ބިރު ވެސް އޮތް ކަމަށެވެ. އެހެންވެ، އެންމެ ފަހުން ބަންގްލަދޭޝްއާ ދެކޮޅަށް ކުޅުނު މެޗުން ބަލިވެގެން ހިތާމަ ނުކުރާ ކަމަށް ސުޒޭން ބުންޏެވެ.

މިދިޔަ އަހަރު، އޭޝިއާގެ 23 އަހަރުންދަށުގެ މުބާރާތުގެ ކޮލިފައިން މެޗުތަކަށް ސުޒޭންގެ ކޯޗުކަމުގެ ދަށުން ޓީމު ފުރަތަން ތައްޔާރު ވި އިރު އެފްއޭއެމަށް ޓިކެޓް ހަމައެއް ނުޖެއްސުނެވެ. އެންމެ ފަހުން އެ އެސޯސިއޭޝަނުން ނިންމީ ޗައިނާގައި އޮތް ކޮލިފިކޭޝަންގެ ބުރުން ވަކިވާށެވެ. އެ ހާލަތު ވޯލްޑް ކަޕް ކޮލިފައިން މެޗުތަކަށް ދާއިރު ވެސް ކުރިމަތި ވެދާނެ ކަމުގެ ބިރު ސުޒޭނަށް އޮތެވެ.

"އަހަރެން އެކަމާ ރިގްރެޓެއް ނުކުރަން،" ބަންގްލަދޭޝާ ދެކޮޅަށް އެންމެ ފަހުން ރާއްޖެ ކުޅުނު މެޗުގައި، ރަނގަޅު ކުޅުމެއް ދެއްކި އިރު ވެސް ބަލިވުމުން ހިތާމަ ކުރާކަމެއް އެބައޮތްތޯ ސުވާލު ކުރުމުން ސުޒޭން ބުންޏެވެ. "ސަބަބަކީ ކޮލިފިކޭޝަންގައި އޮސްޓްރޭލިއާ އާއި މިތަންތަނަށް މެޗުތައް ކުޅެން ދަތުރު ކުރުމުގައި އަހަރެމެންގެ ފުޓްބޯޅަ އެސޯސިއޭޝަނުގެ ހާލަތު އޮތް ގޮތުން އަހަރެންގެ އޮތް ބިރުވެރިކަމެއް އެ މެޗުތަކަށް އަހަރެމެންނަށް ދަތުރުވެސް ނުކުރެވުނީސް (އެފްއޭއެމް) މިއޮތް ކާރިސާ ތެރޭގައި. މައްސަލައަކީ ހަމައެކަނި އެ މެޗުން ބަލިވުން. އެއީ ހަމައެކަނި ދެރަވި ކަމަކީ. އެނޫން އެހެން ކަމެއް ނެތް."

އޭނާ ބުނީ ރާއްޖޭގެ ރަސްމީ ފުޓްބޯޅަ މުބާރާތްތައް މި އަހަރުގައި ނެތް ނަމަވެސް، ރަށްރަށުގައި ބޭއްވި މުބާރާތްތަކުގައި ކުޅުންތެރިން ކުޅެފައިވުމުން އޭގެ ފައިދާ ފެންނާނެ ކަމަށެވެ. ސުޒޭން ބުނީ މިދިޔަ ތިން އަހަރު، ރާއްޖޭގެ ޓީމުގައި މައިގަނޑު އެއް ސްކޮޑެއް އޮވެގެން ބަންގްލަދޭޝްއާ ދެކޮޅަށް މެޗުތައް ކުޅެ މޮޅުވެފައިވާ ކަމަށެވެ. ހަމަ އޭގެ ތެރެއިން ގިނަ ކުޅުންތެރިން މިހާރު ވެސް ޓީމުގައި ތިބުމުން، މިއަދުގެ މެޗަށް ނުކުންނައިރު އެ ހިތްހަމަޖެހުން ވެސް އެބައޮތް ކަމަށް އޮކްޓޯބަރު 2021 ގައި ރާއްޖޭގައި ބޭއްވި ސާފް ޗެމްޕިއަންޝިޕްގައި ވެސް ބަންގްލަދޭޝް އަތުން ރާއްޖެ މޮޅުކޮށް ދިން ކޯޗު ބުންޏެވެ.

މިހާރު ކުރިއަށްދާ ފީފާގެ އިންޓަނޭޝަނަލް ބްރޭކްގައި ބަންގްލަދޭޝާ ދެކޮޅަށް ދެވަނަ މެޗެއް ވެސް ރާއްޖޭން ކުޅޭނެ އެވެ. އަންނަ ހުކުރު ދުވަހު ކުޅޭ މެޗު ވެސް އޮންނާނީ ޑާކާގަ އެވެ.