ނެގެޓިވް ވާހަކައެއް ދައްކަން ސުޒޭން ބޭނުމެއް ނޫން

ރާއްޖޭގައި ކްލަބް ފުޓްބޯޅައިގެ އެއްވެސް މުބާރާތެއް ނެތުމުން ގައުމީ ޓީމަށް ކުރިމަތިވާ ގެއްލުމުގެ ވާހަކަ މިވަގުތު ދައްކަން ބޭނުން ނުވާ ކަމަށް ގައުމީ ޓީމުގެ ކޯޗު އަލީ ސުޒޭން ބުނެފި އެވެ.

ސުޒޭންގެ ކޯޗުކަމުގެ ދަށުން ގައުމީ ޓީމުން މިހާރު ތައްޔާރުވަމުން އަންނަނީ މި މަހު ބަންގްލަދޭޝްއާ ދެކޮޅަށް ކުޅޭ ބައިނަލްއަގްވާމީ އެކުވެރިކަމުގެ ދެ މެޗަށެވެ.

އޭއެފްސީ ޗެލެންޖް ލީގުގެ ގުރޫޕް ސްޓޭޖްގައި ވާދަކުރި މާޒިޔާގެ ޓީމު އެނބުރި މާލެ އައި ފަހުން ގައުމީ ޓީމުގެ ޕްރެކްޓިހުގައި މުޅި ޓީމު ހަމަވީ މި ހަފުތާގަ އެވެ. ނަވާރަ އަހަރުން ދަށުގެ ޓީމުގެ ކުޅުންތެރިން ހިމަނައިގެން ޓީމުގެ ޓްރޭނިން މިދިޔަ މަހު ފެށި އެވެ.

އެފްއޭއެމާއި ރާއްޖޭގެ ފުޓްބޯޅަ ބޮޑު އަޑިގަނޑަކަށް ވެއްޓިފައިވާ ވަގުތެއްގައި ގައުމީ ޓީމަށް މެޗެއް ލިބުމަކީ ފުޓްބޯޅަ އަލުން ކޮޅަށް ނެގުމުގެ މަސައްކަތުގައި ލިބުނު ހިތްހަމަޖެހުމެއް ކަމަށް ސުޒޭން ބުންޏެވެ.

މިދިޔަ އަހަރު ޑިސެމްބަރަށް ފަހު އެއް ވަނަ ޑިވިޝަނުގައި ފުޓްބޯޅައިގެ އެއްވެސް ހަރަކާތެއް ނެތެވެ. އެއް އަހަރަށް ފަހު ގައުމީ ޓީމުން މެޗަކަށް ނުކުންނަނީ ކްލަބް ފުޓްބޯޅައިގެ ހަރާކާތެއް ނެތްތާ ގާތްގަނޑަކަށް އަހަރެއް ވާން ގާތްވެފައިވަނިކޮށެވެ. ވާދަވެރި މެޗަކަށް ގައުމީ ޓީމު ތައްޔާރުވާ އިރު އެއީ ޓީމަށް އޮތް ބޮޑު ޑިސްއެޑްވާންޓޭޖެކެވެ.

އެކަމަކު ސުޒޭން ބުނީ ޑިސް އެޑްވާންޓޭޖްގެ ވާހަކަ މި ވަގުތު ދައްކަން ބޭނުން ނުވާ ކަމަށެވެ.

"ކޮންމެގޮތަކަށް ވިޔަސް ފުޓްބޯޅައިގެ ރަނގަޅު ކަންތައްތަކެއް މި ވަގުތު އެބަޖެހޭ އަންނަން. އެހެންވީމަ މި ވަގުތަށް ފުޓްބޯޅަ އާއިލާ މީހުންނަށް ކުރެވެން އޮތް ކަމެއް ކުރަންވީ،" ސުޒޭން ވާހަކަ ދެއްކި އެވެ.

"ލީގު ނުކުޅެޔޭ، އޭތި މީތި ކިޔައިގެން ގޯސްކޮށް އޮތް ކަންކަމުގެ ވާހަކަ ދައްކައިގެން، އުޒުރު ދެއްކުމުގެ ބަދަލުގައި ކާމިޔާބެއް ހޯދޭތޯ ބެލުންތާ އޮންނާނީ ކޮންމެ ގޮތެއް ވިޔަސް."

އޭނާ ބުނީ އޭއެފްސީ ޗެލެންޖް ލީގުގައި މާޒިޔާއިން ވެސް ރަނގަޅު ތިން މެޗެއް ކުޅެފައި އައުމުން، އެއީ ގައުމީ ޓީމަށް ލިބޭނެ އެހީއެއް ކަމަށެވެ. ގައުމީ ޓީމުގެ ގިނަ ކުޅުންތެރިން ނިސްބަތް ވަނީ މާޒިޔާ އަށެވެ.

އެންމެ ފަހުން ބަންގްލަދޭޝްއާ ދެކޮޅަށް އެ ގައުމުގައި ރާއްޖޭން ކުޅުނު މެޗުން، ދިވެހި ޓީމު ބަލިވީ 2-1 އިންނެވެ. އެ މެޗުން ބަލިވުމުން، ވޯލްޑް ކަޕް ކޮލިފައިންގެ ގުރޫޕް ސްޓޭޖުން ރާއްޖެ އަށް ފުރުސަތު ގެއްލުނެވެ.

އޮކްޓޯބަރު 2021 ގައި ބޭއްވި ސާފް ޗެމްޕިއަންޝިޕުގައި ސުޒޭންގެ ކޯޗު ކަމުގެ ދަށުން ރާއްޖޭން ވަނީ ބަންގްލަދޭޝްގެ މައްޗަށް 2-0 ން މޮޅުވެފަ އެވެ.

އޭނާ ބުނީ، ބަންގްލަދޭޝްއަކީ، ވާދަވެރި މެޗެއް ކުޅެން ވިސްނާއިރު ރަނގަޅު ޓީމެއް ކަމަށެވެ.

ކުރީގެ މެޗުން ދިވެހި ޓީމު ބަލިވެފައި އޮތަސް، ފުޓްބޯޅަ މިއޮތް ހާލަތުގައި ވެސް ރަނގަޅަށް ތައްޔާރުވެވިއްޖެނަމަ އަދި ވެސް ރާއްޖެ އަށް އެ ޓީމު ބަލި ކުރެވޭނެ ކަމަށް ތަޖުރިބާކާރު ކޯޗު ބުންޏެވެ.

"އެ މެޗުގައި ވެސް ފެންނާނެ ގިނަ އެޓޭކްތަކެއް ކުރީ ރާއްޖޭން. ކުރިއަށް ދެ މެޗުގައި ވެސް ރަނގަޅު މެޗެއް ފެންނާނެ ކަމުގެ ޔަގީންކަން އެބައޮތް،" ސުޒޭން ބުންޏެވެ.

ބަންގްލަދޭޝްގައި އެ ގައުމާ ދެކޮޅަށް ރާއްޖޭން ކުޅޭ ފުރަތަމަ މެޗު ކުޅޭނީ މި މަހު 13 ގަ އެވެ. ދެ ވަނަ މެޗު އޮންނާނީ 16 ވަނަ ދުވަހު އެވެ.