މިއީ ރާއްޖޭގެ ފުޓްބޯޅަ އަށް ތާރީހީ ވަގުތެއް: ސުޒޭން

އިއްޔެ ބަންގްލަދޭޝް އަތުން 1-0 އިން ރާއްޖެ މޮޅުވުމުން މިއީ ރާއްޖޭގެ ފުޓްބޯޅަ އަށް ތާރީހީ ވަގުތެއް ކަމަށް ގައުމީ ޓީމުގެ ކޯޗު އަލީ ސުޒޭން ބުނެފި އެވެ.

އިއްޔެއާ ހަމައަށް ބަންގްލަދޭޝްގެ ފަސްގަނޑުގައި ރާއްޖެ އަށް އެ ޓީމުގެ މައްޗަށް މޮޅުވެވިފައެއް ނުވެ އެވެ. އަލީ ފާސިރު (ސެންޓޭ) ގެ ލަނޑާ އެކު އިއްޔެ ރާއްޖޭން ވަނީ އެ ތާރީހު ބަދަލުކޮށްފަ އެވެ. އެހެންވެ ސުޒޭން ބުނީ މިއީ ރާއްޖޭގެ ފުޓްބޯޅަ އަށް ތާރީހީ ވަގުތެއް ކަމަށެވެ. އަދި އެ މޮޅަކީ ރާއްޖޭގެ ފުޓްބޯޅަ ކޮމިޔުނިޓީން ވަރަށް ބޭނުންވެފައި ތިބި މޮޅެއް ކަމަށް ތަޖުރިބާކާރު ކޯޗު ބުންޏެވެ.

"މިއީ ވަރަށް ތާރީހީ ދުވަހެއް. ސަބަބަކީ މިއީ މިދިޔަ 45 އަހަރުތެރޭގައި ޑާކާގައި ބަންގްލަދޭޝްގެ މައްޗަށް އަހަރެމެން މޮޅުވި ފުރަތަމަ ފަހަރު ކަމަށްވުން،" ސުޒޭން ބުންޏެވެ.

ރާއްޖެ އާއި ބަންގްލަދޭޝް ވަނީ މިހާތަނަށް 18 ފަހަރު ބައްދަލުކޮށްފަ އެވެ. އަށްޑިހައިގެ އަހަރުތަކުގައި ރާއްޖޭގެ މައްޗަށް ފަސޭހަ ކަމާ އެކު ކާމިޔާބު ހޯދި ބަންގްލަދޭޝްއިން ވަނީ އަށް ފަހަރު ރާއްޖޭގެ މައްޗަށް ކާމިޔާބު ހޯދައިފަ އެވެ. ރާއްޖެ އަށް މޮޅު ވެވުނީ ހަ މެޗުންނެވެ. އަނެއް ހަތަރު މެޗު ނިމުނީ އެއްވަރުވެގެންނެވެ.

އޭނާ ބުނީ، މެޗުގައި ތަފާތު ކުޅުމެއް ދެއްކީ، ދިވެހި ޓީމުގެ މިޑްފީލްޑަރު މުހައްމަދު އިރުފާން (އިރޭ) ކަމަށެވެ،

"އަހަރެންގެ ކުޅުންތެރިން މޮޅު ކުޅުމެއް ދެއްކި. އަހަރެންގެ ނަޒަރުގައި މެޗުގެ މޮޅު ކުޅުންތެރިއަކީ އަހަރެމެންގެ ޖޯޒީ ނަންބަރު ފަހެއް [އިރުފާން]. މި ކާމިޔާބީގައި އޭނާގެ ހިއްސާ ވަރަށް ބޮޑު،" މާޒިޔާގެ ކެޕްޓަނާ ބެހޭގޮތުން ސުޒޭން ބުންޏެވެ.

ރާއްޖޭގެ މިޑްފީލްޑަރު އިބްރާހިމް އައިސަމް (ޓޯނީ) އަނިޔާގެ ސަބަބުން ސްކޮޑްގައި ނުހިމަނަ އެވެ. މެޗުގެ ކުރިން ވެސް ސުޒޭން ބުނީ އޭނާއަކީ މުހިންމު ކުޅުންތެރިޔެއް ކަމަށެވެ. އެކަމަކު އޭނާގެ ބަދަލުގައި ކުޅެން ނެރުނު އަހްމަދު އައިހަމް ދެއްކި ކުޅުމާ އެކު އައިސަމް ނެތްތައް ފޫބެދުނު ކަމަށް ސުޒޭން ބުންޏެވެ.

"އައިސަމް އެއީ އަހަރެމެންގެ އެންމެ މޮޅު އެއް ކުޅުންތެރިޔާ. އެކަމަކު އޭނާގެ ބަދަލުގައި އަހަރެމެން ފުރުސަތު ދިން ޖޯޒީ ނަންބަރު ހައެއް [އައިހަމް] ދެއްކި ކުޅުމާ އެކު އައިސަމް ޓީމުގައި ނެތް ކަމުގެ ހަނދާނެއް އަހަންނަކަށް ނާދޭ،" ސުޒޭން ބުންޏެވެ.

ރާއްޖޭން ބައިނަލްއަގްވާމީ އެކުވެރިކަމުގެ މެޗެއް މި ކުޅުނީ އަހަރަކަށް ފަހު އެވެ. މީގެ ކުރިން ވެސް ރާއްޖޭން މެޗެއް ކުޅުނީ ބަންގްލަދޭޝާ ދެކޮޅަށެވެ. ވޯލްޑް ކަޕް ކޮލިފައިންގެ ޕްލޭއޮފް ބުރުގައި އެ މެޗު ވެސް ކުޅުނީ އިއްޔެގެ މެޗު ވެސް ކުޅުނު ޑާކާގެ ބަޝުންދަރާ އެރީނާގަ އެވެ.

މިހާރު ކުރިއަށްދާ ފީފާގެ ވިންޑޯގައި ބަންގްލަދޭޝާ ދެކޮޅަށް އިތުރު މެޗެއް ރާއްޖޭން ކުޅޭނެ އެވެ. އެ މެޗު އޮންނާނީ އަންނަ ހޮނިހިރު ދުވަހު އެވެ.