ނަތީޖާ ރަނގަޅެއް ނޫން، އެކަމަކު ކުޅުންތެރިންގެ މަސައްކަތް ވަރަށް ޕޮޒިޓިވް: ސުޒޭން

ބަންގްލަދޭޝް ޓީމު އަތުން އިއްޔެ ރާއްޖޭގެ ޓީމަށް ލިބުނު ނަތީޖާއާ މެދު ހިތްހަމަނުޖެހުނަސް، މެޗުގައި ކުޅުންތެރިން ކުރި މަސައްކަތުގައި މުޅިން ވެސް ފެނުނީ ޕޮޒިޓިވް ކަންތައްތަކެއް ކަމަށް ގައުމީ ޓީމުގެ ކޯޗު އަލީ ސުޒޭން ބުނެފި އެވެ.

ވޯލްޑް ކަޕް ކޮލިފައިންގެ ޕްލޭއޮފްގައި، ގައުމީ ފުޓްބޯޅަ ދަނޑުގައި އިއްޔެ ކުޅުނު މެޗުގެ ފަހުވަގުތު ރާއްޖޭން ލީޑް ނަގާފައިވަނިކޮށް މެޗުގެ އިތުރުވަގުތުގައި ބަންގްލަދޭޝްއިން ނަތީޖާ 1-1 ން ހަމަހަމަ ކުރި އެވެ. އެއީ 2000 ވަނަ އަހަރުގެ ފަހުން ރާއްޖޭގެ ދަނޑުގައި ބަންގްލަދޭޝްއިން ރާއްޖެ މޮޅުވިޔަ ނުދީ ހިފެހެއްޓި ފުރަތަމަ ފަހަރެވެ. އެ އަހަރު ރާއްޖޭގައި ބޭއްވި ގޯލްޑަން ޖުބްލީ ފުޓްބޯޅަ މުބާރާތުގައި މި ދެ ގައުމު ބައްދަލު ކުރި މެޗު ވެސް އެއްވަރުވީ 1-1 ންނެވެ.

އޮކްޓޯބަރު 2021 ގައި ރާއްޖޭގައި ބޭއްވި ސާފް ޗެމްޕިއަންޝިޕްގައި ރާއްޖޭން ބަންގްލަދޭޝް ބަލި ކުރި އިރު ވެސް ކޯޗަކަށް ހުރި ސުޒޭން ބުނީ، މެޗުގެ ލީޑް ރާއްޖޭގެ އަތްމަތީގައި ނުހިފެހެއްޓުމުގެ ޒިންމާ އޭނާ ނަގާ ކަމަށެވެ.

"އަހަރެން ހިތައްއެރި އެވެނި ކަމެއް މިވެނި ކަމެއް އަހަންނަށް ބަދަލު ގެނެވުނުނަމައޭ. އެކަހަލަގޮތަކަށް އަހަންނަށް ހީކުރެވުނު،" ޕްރެސް ކޮންފަރެންސްގެ ފުރަތަމަ ވާހަކަ އަކަށް ވެސް ސުޒޭން ބުންޏެވެ.

މެޗުގެ ކުރިން ބޭއްވި ޕްރީ މެޗު ޕްރެސް ކޮންފަރެންސްގައި އޭނާ ބުނީ ޖޫން، ޖުލައިގައި އިންޑިއާގައި ބޭއްވި ސާފް ޗެމްޕިއަންޝިޕްގައި ބަންގްލަދޭޝްއާ ދެކޮޅަށް ކުޅުނު މެޗަށް ވުރެ ޕޮޒިޓިވް ކަންކަން ރާއްޖޭގެ ޓީމުގެ ފަރާތުން ފެންނާނެ ކަމަށެވެ.

އިއްޔެގެ ހަވީރު މެޗަށް ފަހު ސުޒޭން ބުނީ މެޗުގެ ނަތީޖާ ޕޮޒިޓިވް ނުވިއަސް ދިވެހި ކުޅުންތެރިންގެ މަސައްކަތުގައި މުޅިން ވެސް ފެނުނީ ޕޮޒިޓިވް ކަންތައްތަކެއް ކަމަށެވެ.

"ރިޒަލްޓް ޕޮޒިޓިވްއެއް ނޫން. އެކަމަކު ދިވެހި ޓީމު ކުރި މަސައްކަތް، ކުޅުންތެރިން އެ ދެއްކި ކުޅުން، އެމީހުން އެލީ އެފަޓް. އޭގަ ހުރީ ހުސް ޕޮޒިޓިވް ކަންތައްތައް،" މެޗަށް ފަހު ސުޒޭން ބުންޏެވެ.

އޭނާ ބުނީ ޓީމުގައި ތިބި ކުޅުންތެރިންނަށް ބަލާއިރު މިދިޔަ ހައެއްކަ މަސް ތެރޭގައި 90 މިނެޓް ފުލުކޮށް ކުޅުނު ކުޅުންތެރިން ވަރަށް މަދުވާނެ ކަމަށެވެ.

"އެކަމަކު ކުޅުންތެރިން ޓައިމް މެނޭޖްކޮށްގެން އެލީ އެފަޓަށް ތައުރީފް ހައްގު ހަމަ،" އޭނާ ބުންޏެވެ.

މާލޭގައި 1-1 އެއްވަރު ވިޔަސް ރާއްޖެ އަށް ފުރުސަތު ގެއްލޭނެ ކަމުގެ އެއް ވެސް އިހްސާސެއް ނުކުރެވޭ ކަމަށް ސުޒޭން ބުންޏެވެ. ދެވަނަ ލެގް މެޗު އަންނަ އަންގާރަ ދުވަހު ކުޅޭނީ ބަންގްލަދޭޝްގެ ޑާކާގަ އެވެ. ސުޒޭން ބުނީ ފުޓްބޯޅަ ކުޅެވޭ ފެންވަރުގެ ދަނޑެއް އޮވެއްޖެނަމަ، ރާއްޖެ އަށް ވެސް ފުރުސަތު އެއްވަރަށް އެބައޮތްކަމަށެވެ.

"ފުޓްބޯޅަ ކުޅެވޭ ކަހަލަ ހާލަތެއް ނެތް ތަނެއް [ދަނޑެއް] ވެއްޖެއްޔާ އަޅުގަނޑަށް އެއްޗެއް ބުނާކަށް ނޭނގޭނެ. އެހެންނަމަވެސް ރަނގަޅު ދަނޑެއްގައި ކުޅެފިއްޔާ ރާއްޖެ އަށް ޑިސްއެޑްވާންޓޭޖެއް އަންނާނެ އެއްވެސް ކަމެއް އަޅުގަނޑަކަށް އިހްސާސް ނުވޭ އިރާދަކުރެއްވިއްޔާ،" ސުޒޭން ބުންޏެވެ.