މާލެ ސިޓީ ކައުންސިލްގެ 8 ކޮންސަލްޓަންޓުންނަށް މަހަކު 261،000ރ.

މާލެ ސިޓީ ކައުންސިލަށް ކޮންސަލްޓަންޓުންގެ ގޮތުގައި ނަގާފައިވާ 8 މީހަކަށް ކޮންމެ މަހަކު 261،000 އަށް ވުރެ ގިނަ ރުފިޔާ ހަރަދު ކުރަމުންދާ ކަން އެނގިއްޖެ އެވެ.

މި އަހަރު އެމްޑީޕީން ބޭއްވި ލާމަރުކަޒީ ގުޅުން ކޮންފަރެންސްގައި ވާހަކަ ދައްކަވަމުން މާލޭ މޭޔަރު އާދަމް އާޒިމް ވިދާޅުވީ ކަންކަމުގައި އެހީތެރިވުމަށް ކައުންސިލަށް 15 ކޮންސަލްޓަންޓުން ނަގާފައިވާ ކަމަށެވެ. އެއީ މުޅިން ވެސް އާޒިމް ނިސްބަތްވާ އެމްޑީޕީގެ މެންބަރުން ކަމަށް އޭނާ ވިދާޅުވި އެވެ.

އެހެންވެ، މައުލޫމާތު ހޯދައި ލިބުމުގެ ހައްގުގެ ގާނޫނުގެ ދަށުން "މިހާރު" އިން އެ މައުލޫމާތު ހޯދަން އެދުމުން ސިޓީ ކައުންސިލުން ފޮނުވި ލިޔުމުގައި ބުނީ، ކައުންސިލަށް މިހާތަނަށް ނަގާފައި ވަނީ 8 ކޮންސަލްޓަންޓުން ކަމަށެވެ.

އެ މީހުންނަށް އިތުރު ވަގުތުގެ އެލަވަންސާ ނުލައި މުސާރައިގެ ގޮތުގައި މަހަކު 261،000ރ. ހަރަދު ކުރާ ކަމަށް ކައުންސިލުން ބުންޏެވެ.

މާލެ ސިޓީ ކައުންސިލްގެ ކޮންސަލްޓަންޓުން

1. މުހައްމަދު ޝާހިދު، ފައިނޭންޝިއަލް ކޮންސަލްޓަންޓު - 35،000ރ.

2. ހަބީބް ޒާހިރު، ރިޕޯޓް ރައިޓިން ކޮންސަލްޓަންޓު - 35،000ރ.

3. މުހައްމަދު ޝަރީފް، ސިވިލް އިންޖީނިއާ ކޮންސަލްޓަންޓު - 35،000ރ.

4. މުހައްމަދު ޝިހާބު، ސޯޝަލް ވެލްފެއާ ކޮންސަލްޓަންޓް - 35،000ރ. (ޖެންޑާ މިނިސްޓްރީގެ ކުރީގެ ސްޓޭޓް މިނިސްޓަރު)

5. ޔަމީން މުހައްމަދު، އިންފޮމޭޝަން ޓެކްނޮލޮޖީ ކޮންސަލްޓަންޓް - 35،000ރ.

6. ރަމްޒީ އަބޫބަކުރު، މެނޭޖްމަންޓް ކޮންސަލްޓަންޓް - 30،000ރ. (އެމްޓީސީސީގެ ކުރީގެ ޖެނެރަލް މެނޭޖަރު)

7. މަރިޔަމް ނާޒިމާ، އެޑްމިނިސްޓްރޭޓިވް ކޮންސަލްޓަންޓް - 28،000ރ. (އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު)

8. އަލީ ހާލިދު، މީޑިއާ އެގްޒެކެޓިވް - 28،000ރ. (ޕީއެސްއެމްގެ ކުރީގެ އެމްޑީ)

އެމްޑީޕީގެ ކޮންފަރެންސް ތެރެއިން އެ ޕާޓީގެ މެންބަރުން ކޮންސަލްޓަންޓުންގެ ގޮތުގައި ނަގާފައިވާ ކަމަށް އާޒިމް ވިދާޅުވުމުން އެމްޑީޕީގެ ޗެއާޕާސަން ފައްޔާޒް އިސްމާއިލް ވަނީ އެ ވާހަކަ ސޯޝަލް މިޑިއާގައި އާންމު ނުކުރަން އެދިވަޑައިގެންފަ އެވެ. ނަމަވެސް އެ ވާހަކަ އާޒިމް ވިދާޅުވީ ލައިވް ޓީވީގަ އެވެ.

އެ މައްސަލާގައި އޭނާ އަށް ވަރަށް ބޮޑަށް ފާޑު ކިޔުން އަމާޒުވި އެވެ.