މާލޭ ސިޓީ ކައުންސިލަށް ސަރުކާރުގެ އެއްބާރުލުން ލިބޭ: އާޒިމް

މާލޭ ސިޓީ ކައުންސިލަށް މި ސަރުކާރުގެ އެއްބާރުލުން ލިބޭ ކަމަށް މާލޭގެ މޭޔަރު އާދަމް އާޒިމް މިއަދު ވިދާޅުވެއްޖެ އެވެ.

ހދ. ކުޅުދުއްފުށީގައި ބޭއްވި އިދިކޮޅު އެމްޑީޕީގެ "ލާމަރުކަޒީ ގުޅުން" ކޮންފަރެންސްގައި އާޒިމް ވިދާޅުވީ މާލޭ ސިޓީ ކައުންސިލް ހިންގުމުގައި ސަރުކާރުގެ ފަރާތުން މިހާތަނަށް އެއްވެސް ދައްޗެއް ކުރިމަތި ނުވާ ކަމަށާއި ކުރަން ބޭނުންވި ކަންކަން ހަމަޖެހުނު ކަމަށެވެ.

އެމްޑީޕީގެ މެމްބަރެއްގެ ގޮތުގައި ވެސް ހުންނެވި އާޒިމް ވިދާޅުވީ އެ ޕާޓީގެ 15 މީހަކަށް ކޮންސަލްޓެންޓުގެ ވަޒީފާ ވެސް ސިޓީ ކައުންސިލުން ހަމަޖައްސާފައިވާ ކަމަށެވެ.

"ކައުންސިލްގެ ތެރެއިން އަޅުގަނޑު ބުނާ ކަމެއް ވިއްޔާ ކޮށްދޭ. އަޅުގަނޑު ކޮންސަލްޓެންޓުން ނަގަން ބޭނުންވީމާ 15 ކޮންސަލްޓެންޓުން ނަގައިގެން ހަމަ އަޅުގަނޑުމެން ޕާޓީގެ މެމްބަރުން އެ ތިބީ ވެސް އެކަކު ނޫނީ،" އާޒިމް ވިދާޅުވި އެވެ.

އާޒިމް އެހެން ވިދާޅުވުމުން، އެ ޖަލްސާގެ ރިޔާސަތުގައި އިންނެވި އެމްޑީޕީގެ ޗެއާޕާސަން ފައްޔާޒް އިސްމާއިލް ވަނީ އެ ވާހަކަތައް ސޯޝަލް މީޑިއާގައި އާންމު ކުރާއިރު، އެމްޑީޕީގެ 15 ކޮންސަލްޓެންޓުންނަށް ވަޒީފާ ދިން ވާހަކަ އުނިކުރަން މާލެ ސިޓީ ކައުންސިލް އިދާރާގެ މީޑިއާއާ ހަވާލުވެ ހުންނަވާ އާމިނަތު ޝަތުފާގެ ކިބައިން އެދިވަޑައިގެންފަ އެވެ. އޭރު ޝަތުފާ ގެންދިޔައީ އާޒިމްގެ ވާހަކަ ވީޑިއޯ ކުރަމުންނެވެ.

އެނގިފައިވާ ގޮތުގައި ސިޓީ ކައުންސިލަށް ނަގާ ކޮންސަލްޓަންޓުންގެ މުސާރަ އުޅެނީ މަހަކު 30،000ރ. އިން ފެށިގެން މަތީގަ އެވެ.

އާޒިމް މިއަދު ވިދާޅުވިގޮތުގައި، މާލެ ސިޓީ ކައުންސިިލްގެ އަޣުލަބިއްޔަތު އޮތީ ސަރުކާރު ހިންގާ ޕާޓީ ޕީއެންސީގައި ކަމަށް ވިޔަސް އެ ކައުންސިލަރުންގެ އެހީތެރިކަން ވެސް ލިބެ އެވެ. ކައުންސިލްގެ ބައްދަލުވުންތައް ލައިވްކޮށް ދައްކާތީ، ރައްޔިތުންނަށް ފައިދާ ހުރި ކަންކަމުގައި ދެކޮޅު ހަދަން އުނދަގޫވާނެ ކަމަށް އާޒިމް ވިދާޅުވި އެވެ.

އާޒިމް ވިދާޅުވީ، އޭނާ މަސައްކަތް ކުރައްވަނީ ރައްޔިތުންނަށް ފައިދާ ހުރި ކަންތައްތަކެއް މޭޔަރެއްގެ ގޮތުގައި ހުންނަވައިގެން ކޮށްދެއްވުމަށް ކަމަށެވެ. އެކަންކަން ނުކުރެވިއްޖެ ނަމަ އޭގެ ހުރިހާ ޒިންމާއެއް އެޅޭނީ އެމްޑީޕީގެ ބޮލުގައި ކަމަށް ވެސް އޭނާ ވިދާޅުވި އެވެ.

މޭޔަރު ވިދާޅުވީ، "އެހެން އުޅެމުން ގޮސް" މާލޭގެ އާ ސަރަހަރާގެ މިސްކިތާއި ސަހަރާގެ މަސައްކަތް ވެސް ނިންމާފައިވާ ކަމަށެވެ. ހުޅުމާލޭގައި ހަދާ ބުޅާ ފެސިލިޓީގެ މަސައްކަތް ވެސް އަންނަ މަހުގެ ނިޔަލަށް ނިމޭނެ ކަމަށް އާޒިމް ވިދާޅުވި އެވެ.

މޭޔަރު ވިދާޅުވިގޮތުގައި އޭނާ މާލެ ސިޓީ ކައުންސިލްގެ މަސައްކަތްތައް ކުރައްވަނީ އެންމެންނާ ވެސް ގުޅިގެން އަދި "އެންމެންގެ ވެސް ބަސް އަހައިގެން" ނެވެ.