އެމްޑީޕީ ޓިކެޓްގައި މެދުހެންވޭރު ދާއިރާއަށް އިންތިހާބުވި ކައުންސިލަރު ޕީއެންސީއަށް

މާލެ ސިޓީ ކައުންސިލްގެ ހުސްވެފައިވާ މެދުހެންވޭރު ދާއިރާއަށް އެމްޑީޕީގެ ޓިކެޓުގައި އިންތިހާބުވި އަހްމަދު ރިޝްވާން މިއަދު ޕީއެންސީއަށް ސޮއިކުރައްވައިފި އެވެ.

މި މަހު 13 ގައި ބޭއްވި ބައި އިލެކްޝަންގައި އިންތިހާބުކުރި މެންބަރުންނާއި މޭޔަރު ހުވާުކުރެއްވުން މިރެޔަށް ތާވަލްކޮށްފައި ވަނިކޮށް ރިޝްވާން ޕީއެންސީ އަށް ސޮއިކުރައްވައި ރައީސް ޑރ. މުހައްމަދު މުއިއްޒަށް މިއަދު ވަނީ ފޯމު ހަވާލުކުރައްވައިގަ އެވެ.

މާލެ ސިޓީ ކައުންސިލުން ހުސްވި ހަތަރު ގޮނޑީގެ ތެރެއިން ދެ ގޮނޑި ސަރުކާރުގެ މައި ޕާޓީ ޕީއެންސީއަށް އަދި އަނެއް ދެ ގޮނޑި އިދިކޮޅު އެމްޑީޕީން ބައި އިލެކްޝަންގައި ކާމިޔާބުކުރި އެވެ.

އެމްޑީޕީން އާދަމް އާޒިމް ކާމިޔާބު ކުރެއްވީ މާލޭގެ މޭޔަރު ކަމުގެ ގޮނޑި އާއި މެދުހެންވޭރު ދާއިރާގެ ގޮނޑި އެވެ. މާފަންނު ދެކުނާއި ހެންވޭރު ދެކުނު ދާއިރާގެ ކައުންސިލް ގޮނޑި ކާމިޔާބު ކުރީ ޕީޕީއެމް/ޕީއެންސީ ކޯލިޝަނުންނެވެ.

އާ މޭޔަރާއި މެންބަރުން ހުވާކުރެއްވުން އޮންނާނީ މިރޭ 8:30 ގައި ދަރުބާރުގޭގަ އެވެ.

މާލެ ސިޓީ ކައުންސިލްގައި 19 މެންމްބަރުން ތިއްބަވާއިރު، މި މަހު ވަނީ ކައުންސިލްގައި ތިބި މެމްބަރުންގެ ތެރެއިން އެމްޑީޕީގެ މެމްބަރަކާއި ޑިމޮކްރެޓްސްގެ މެމްބަރެއް ވެސް ޕީއެންސީއާ ގުޅިފަ އެވެ. އެއާ އެކު ކައުންސިލްގައި ތިބި ސަރުކާރުގެ ކޯލިޝަނަށް ނިސްބަތްވާ މެމްބަރުންގެ އަދަދު 13 އަަށް މިހާރު ވަނީ އިތުރުވެފަ އެވެ.