ތައުލީމީ ދާއިރާގެ 300 އެއްހާ މުވައްޒަފުންނަށް ހެއްކެއް ނެތި އަދަބު ދީފައިވޭ: މިނިސްޓަރު

ސްކޫލްތަކުގެ ޕްރިންސިޕަލުން ތިއްބަވަން ޖެހޭ ތަން ނޫން އެހެން ތަންތަނަށް "އަރުވާލުން" ފަދަ ކަންކަމާ އެކު، އެއްވެސް ހެއްކެއް ނެތި ތައުލީމީ ދާއިރާގެ 300 މުވައްޒަފުންނަށް އަދަބު ދީފައިވާ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ތުހުމަތު ކުރައްވައިފި އެވެ.

މިނިސްޓަރު މިގޮތަށް ވިދާޅުވީ ރައްޔިތުންގެ މަޖިލީހުގައި، ފުވައްމުލަކު ދެކުނު ދާއިރާގެ މެމްބަރު އިބްރާހިމް ހުސެއިން ކުރެއްވި ސުވާލަކަށް ޖަވާބު ދެއްވަމުންނެވެ. އޭނާ މިނިސްޓަރާ ސުވާލުކުރެއްވީ ބައެއް ސްކޫލުތަކުގައި ޕްރިންސިޕަލުން ކުދިންނާ މެދު ތަފާތުކުރުން ގެންގުޅޭ ކަމަށް ބެލެނިވެރިން ބުނާ މައްސަލައިގަ އެވެ.

އެފަދަ މައްސަލަތައް ކުރީގެ ސަރުކާރުގައި އެޑިއުކޭޝަން މިނިސްޓްރީއަށް ހުށަހަޅާފައިވާ ކަމަށާއި މި ސަރުކާރުގައި ވެސް އެފަދަ މައްސަލަ ހުށަހެޅިއަސް ހައްލެއް ނުލިބޭ ކަމަށް މެމްބަރު ވިދާޅުވި އެވެ.

މިނިސްޓަރު ވިދާޅުވީ ތައުލީމީ ދާއިރާގެ ޒިންމާ އޭނާއާ ހަވާލުކުރެއްވި އިރު ރައީސް ޑރ. މުހައްމަދު މުއިއްޒު އެންމެ ފުރަތަމަ ވެސް އިރުޝާދު ދެއްވީ އަދުލުވެރިކަމާ އެކު މުވައްޒަފުންނާ މެދު ކަންކަން ކުރައްވަން ކަމަށެވެ.

މި ސަރުކާރު ވެރިކަމާ ހަވާލުވި އިރު، ތައުލީމީ ދާއިރާގެ ވަރަށް ގިނަ މުވައްޒަފުންނަށް އަނިޔާ ލިބިފައިވާ ކަމަށް މިނިސްޓަރު ވިދާޅުވި އެވެ.

އެއްވެސް ކަންބޮޑުވުމެއްގައި މައްސަލައެއް ހުށަހަޅައިފި ނަމަ، މިނިސްޓަރު ވިދާޅުވީ، އެކަމެއް ބައްލަވާނެ ކަމަށެވެ.

"އަޅުގަނޑު މި މަގާމާ ހަވާލުވިއިރު، ރާއްޖޭގެ 40 ވަރަކަށް ސްކޫލުގެ ޕްރިންސިޕަލުން އެ ބޭފުޅުން ތިއްބަވަން ޖެހޭ ތަން ނޫން އެހެން ތަނަކަށް އަރުވާލެވިފައި ވަނީ. ބައެއް މުވައްޒަފުންނަށް އަނިޔާވެރިވެފައި ވަނީ. 300 އެއްހާ މުވައްޒަފުންނަށް އެކަށީގެންވާ ހެއްކެއް ނެތި އަދަބު ދީފައި ވަނީ،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ މައްސަލަތައް ބެލުމުގައި ހަރުކަށިވުމަށް ވުރެން ގެންގުޅުއްވާނީ އަދުލުވެރިކަމާ އެކު ކަންކަން ނިންމެވުމުގެ ސިޔާސަތު ކަމަށެވެ.

މައްސަލަ ޖެހޭ ސްކޫލްތަކަށް މިނިސްޓްރީގެ ޓީމުތައް ދަތުރުކޮށް އަމިއްލައަށް ކަންކަން ބެލުމަށް ފަހު ނޫނީ މުވައްޒަފުންނާ މެދު ފިޔަވަޅު ނާޅާނެ ކަމަށް ވެސް މިނިސްޓަރު ވިދާޅުވި އެވެ.