ޔުގެންޑާގެ ފައްޅިއަކަށް ހޮނުއަޅައި 14 މީހުން މަރު

ޔުގެންޑާގެ ރެފިއުޖީ ކޭމްޕެއްގައި ހަދާފައި ހުރި، ކްރިސްޓިއަން ދީނުގެ ވަގުތީ ފައްޅިއެއްގައި މީހުން އަޅުކަން ކުރަން ތިއްބައި ހޮނުއެޅުމުގެ ސަބަބުން 14 މީހަކު މަރުވެއްޖެ ކަމަށާއި އޭގެ ތެރޭގައި ކުޑަކުދިން ވެސް ހިމެނޭ ކަމަށް އޮފިޝަލުން ބުނެފި އެވެ.

ހޮނިހިރު ދުވަހުގެ ރޭ ހޮނުއެޅި އިރު ޔޫގެންޑާގެ އުތުރުގެ ޕަލަބެކް ރެފިއުޖީ ކޭމްޕްގެ ފައްޅީގައި ފަންސާހަކަށް މީހުން އަޅުކަމުގައި ތިއްބެވެ.

ލަމްވޯ ސަރަހައްދުގެ ރެޒިޑެންޓް ޑިސްޓްރިކްޓް ކޮމިޝަނަރު ވިލިއަމް ކޮމެޗް އޭއެފްޕީއަށް ވިދާޅުވީ ހޮނުއެޅީ އެ ތަނުގެ ޓިނު ފުރާޅަށް ކަމަށާއި އެ ހާދިސާގައި މަރުވި 14 މީހުންގެ ތެރޭގައި އުމުރުން 14 އަހަރާއި 18 އަހަރާ ދެމެދުގެ ފަސް އަންހެން ކުދިންނާއި ނުވަ ފިރިހެން ކުދިން ހިމެނޭ ކަމަށެވެ.

ފުލުހުން ބުނީ މި ހާދިސާގައި 34 މީހަކަށް ސިއްހީ އެކި މައްސަލަތައް ދިމާވެ ފަރުވާ ދޭން ޖެހުނު ކަމަށެވެ.

ރެފިއުޖީންގެ ތެރޭގައި ގިނައީ ދެކުނު ސޫދާނުގެ ނޫރް ކޮމިއުނިޓީއަށް ނިސްބަތްވާ ކުދިންނެވެ.

މިފަހަކަށް އައިސް ޔޫގެންޑާގައި ހޮނުއެޅުމުގެ އެކި ހާދިސާތަކުގައި އެތައް ބަޔަކު ވަނީ މަރުވެފަ އެވެ.

ޕްރައިމަރީ ސްކޫލަކަށް 2011 ވަނަ އަހަރު ހޮނުއެޅުމުގެ ސަބަބުން 18 ދަރިވަރަކު މަރުވިއިރު، 2020 ވަނަ އަހަރުގެ އޮގަސްޓް މަހު ހިނގި ހާދިސާއެއްގައި ނުވަ ކުއްޖަކު ވަނީ މަރުވެފަ އެވެ.

މިދިޔަ އަހަރުގެ ފެބްރުއަރީ މަހުގެ ތެރޭގައި ޔޫގެންޑާގެ ހުޅަނގު ދެކުނުގައި އޮންނަ މަގަހިންގާ ނޭޝަނަލް ޕާކުގައި ހޮނުއެޅުމުގެ ސަބަބުން ވަނީ ހުސްވެދާނެ ކަމުގެ ބިރު ހީވެފައިވާ ބާވަތެއްގެ ހަތަރު ގޮރިއްލާ ވެސް މަރުވެފަ އެވެ.