ހުޅުމާލެ ހޮސްޕިޓަލް ބިމުގައި 250 އެނދުގެ އާ ހޮސްޕިޓަލެއް އަޅަނީ

ހުޅުމާލެ ހޮސްޕިޓަލް ހިންގާ ބިމުގައި 250 އެނދުގެ މަލްޓި ސްޕެޝަލިޓީ އާ ހޮސްޕިޓަލެއް އަޅަން ނިންމައިފި އެވެ.

މާލެ ސަރަހައްދުގެ ހޮސްޕިޓަލްތައް ހިންގާ، މާލެ ގްރޫޕް އޮފް ހޮސްޕިޓަލްސް އިން މިއަދު ބޭއްވި ނިއުސް ކޮންފަރެންސްގައި، އެ ގްރޫޕްގެ ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވީ ހިދުމަތްތައް އިތުރުކުރިއަސް ބަލި މީހުން އެޑްމިޓްކުރާނެ އެނދު އިތުރުނުކޮށް އެންމެ އެކަށިގެންވާ ގޮތެއްގައި ހިދުމަތް ނުދެވޭނެ ކަމަށެވެ.

އެހެންވެ، އެ ހޮސްޕިޓަލް މިހާރު ހިންގާ ހަ ބުރީގެ އިމާރާތާ އިންވެގެން 15 ބުރީގެ އާ އިމާރާތެއް ހަދައި އެ ދެ ތަން ގުޅާލައިގެން، 250 އެނދުގެ އާ ހޮސްޕިޓަލެއް އަޅަން ނިންމީ ކަމަށް ހަލީމް ވިދާޅުވި އެވެ.

"މި ދެ މަޝްރޫއު އަޅުގަނޑުމެންނަށް އިރާދަކުރެއްވިއްޔާ ކުރިއަށް އޮތް އަހަރުތަކުގެ ތެރޭގައި ނިންމާލެވިއްޖެ ނަމަ ހުޅުމާލޭގައި މި ދިރިއުޅޭ ރައްޔިތުންނަށް އެކަށީގެންވާ ސިއްހީ ފަރުވާ ފޯރުކޮށްދެވޭނެ އަޅުގަނޑުމެންނަށް ހަމަޖެހިގެންދާނެ،" އޭނާ ވިދާޅުވި އެވެ.

ހަ ބުރީގެ އިމާރާތުގައި މިހާރު ވެސް އަންނަނީ އައިސީޔޫ އަދި އެންއައިސީޔޫ ގާއިމްކުރުމުގެ މަސައްކަތް ކުރަމުންނެވެ. އެ ދެ ތަން ވެސް މި އަހަރުގެ ތެރޭގައި ބޭނުންކުރަން ފެށޭނެ ކަމަށް ހޮސްޕިޓަލުން ބުންޏެވެ.

ކުޑަކުދިންނަށް ހާއްސަ އައިސީޔޫގައި 14 އެނދު އަދި ބޮޑެތި މީހުންނަށް ފަރުވާ ދޭ އައިސީޔޫގައި 10 އެނދު ހުންނާނެ އެވެ.

ހަލީމް ވިދާޅުވީ، ހުޅުމާލޭގެ އާބާދީ އިތުރުވަމުންދާ ވަރަކަށް އެކްސިޑެންޓުތައް ގިނަވެ، އިމަޖެންސީ ރޫމަށް ވަރަށް ބާރުބޮޑުވަމުންދާ ކަމަށެވެ. އެކަމަކު، އެ ތަނުގައި މި ވަގުތު ހުރީ ހަތް އެނދެވެ. ސަރުކާރުން ވަނީ ހުޅުމާލެ ހޮސްޕިޓަލްގެ އީއާރުގެ ކެޕޭސިޓީ ވެސް 14 އަށް އިތުރުކުރަން ނިންމައިފަ އެވެ.

އޭގެ އިތުރުން ހަތަރު އޮޕަރޭޝަން ތިއޭޓަރު ކޮމްޕްލެކްސް މި އަހަރު ބޭނުންކުރަން ފެށުމުން، އޮޕަރޭޝަންތައް އަވަސްވެގެންދާނެ ކަން ހޮސްޕިޓަލްސް ގްރޫޕުން ފާހަގަކުރި އެވެ.

ހުޅުމާލެ ހޮސްޕިޓަލް މިހާރު ހިންގާ އިމާރާތުގައި އާ ތަނެއް އަޅަން ނިންމިއިރު، އިތުރުވަމުން އަންނަ އާބާދީއާއެކު އެ ތަނަށް ވަނީ ވަރަށް ބާރު ބޮޑުވެފަ އެވެ. އެހެންވެ، އެ ކިއު ކުޑަކުރުމަށް ހުޅުމާލެ 2 ގައި ޖެނެރަލް ޕްރެކްޓިކް (ޖީޕީ) ކްލިނިކެއް ވެސް ގާއިމްކޮށްފައިވެ އެވެ.

ސިއްހީ ފަރުވާ ހޯދުމަށް ބޭރު ގައުމުތަަކަށް ބަރޯސާވުން ކުޑަކުރުމާއި ފަރުވާ ހޯދަން ކިއުގައި ތިބޭ ވަގުތު ކުޑަކުރަން ފިޔަވަޅުތަކެއް އަޅަން ސަރުކާރުން ވަނީ ނިންމައިފަ އެވެ. އޭގެ ތެރޭގައި، ދަރުމަވަންތަ ހޮސްޕިޓަލްގެ ހައިބްރިޑް ތިއޭޓަރާއެކު މުޅި އިމާރާތް ބޭނުންކުރަން ފެށުމާއި ކެންސަރަށް ހާއްސަކޮށްގެން 25 ބުރީގެ އާ ޓަވަރެއް އަޅަން ވަނީ ނިންމައިފަ އެވެ.