އައިޖީއެމްއެޗުގެ ލެބޯޓްރީގައި އަހަރެއްގެ މައްޗަށް ދެ މިލިއަނެއްހާ ޓެސްޓް

އައިޖީއެމްއެޗްގެ ލެބޯޓްރީގައި އަހަރެއްގެ މައްޗަށް ދެ މިލިއަނެއްހާ ޓެސްޓް ހަދާ ކަމަށް، އެ ހޮސްޕިޓަލުން އާއްމުކުރި ތަފާސްހިސާބުން ދައްކައިފި އެވެ.

މާލެ ހޮސްޕިޓަލްސް ގްރޫޕުން އިއްޔެ ބޭއްވި ނިއުސް ކޮންފަރެންސްގައި ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވީ ސަރުކާރުގެ މައި ހޮސްޕިޓަލުގައި އަހަރަކު އެވްރެޖުކޮށް 1.9 މިލިއަން ޑައިގްނޯސްޓިކް ލެބޯޓްރީ ޓެސްޓު ހަދާ ކަމަށެވެ.

ހުޅުމާލެ ހޮސްޕިޓަލުގައި 483،185 ލެބް ޓެސްޓު ހެދިއިރު، ހުޅުމާލެ ހޮސްޕިޓަލްގެ އަދަދު އުޅެނީ 253،520 ގަ އެވެ.

އައިޖީއެމްއެޗްގައި އަބަދު ވެސް އެންމެ ބާރު ބޮޑު އިމަޖެންސީ އަދި ޖީޕީ ޑިޕާޓްމަންޓުން އަހަރެއްގެ މައްޗަށް 150،000 މީހުންނަށް ފަރުވާދީފައިވެ އެވެ. ހުޅުމާލެ ހޮސްޕިޓަލުގައި އޭގެ ދެ ގުނައެއްހާ މީހުންނަށް ވަނީ ފަރުވާދީފަ އެވެ.

ހުޅުމާލެ ހޮސްޕިޓަލުގައި އިމަޖެންސީ އަދި ޖީޕީ ޑިޕާޓްމަންޓުން 238،978 މީހުން ފަރުވާ ހޯދިއިރު، ވިލިމާލެ ހޮސްޕިޓަލްގެ އަދަދު އުޅެނީ 2307 ގަ އެވެ.

އައިޖީއެމްއެޗްގައި އަހަރެއްގެ މައްޗަށް 25،500 މީހުން ސާޖަރީ ހަދަ އެވެ. ހުޅުމާލެ ހޮސްޕިޓަލުގައި އެއާ ކައިރި ކުރާ އަދަދަކަށް ވެސް ފަރުވާ ނުދެވެ އެވެ. އެ ހޮސްޕިޓަލުގައި އަހަރެއްގެ މައްޗަށް 1،696 ސާޖަރީ ހެދިއަސް، ވިލިމާލޭގައި އަދި ސާޖަރީ ކުރާކަށް ނުފަށަ އެވެ.

އެކްސްރޭއާ ސްކޭންތައް ހަދަން 285،120 ފަހަރު އައިޖީއެމްއެޗުން ހިދުމަތް ދީފައިވެ އެވެ. އެ ކެޓަގަރީގައި ހުޅުމާލެ ހޮސްޕިޓަލް 121،531 ފަހަރު އަދި ވިލިމާލެ ހޮސްޕިޓަލްގެ އަދަދަކީ 5،697 އެވެ.

އެޑްމިޓު ކޮށްގެން ވެސް އައިޖީއެމްއެޗްގައި 15،000 ފަހަރު، ހުޅުމާލެ ހޮސްޕިޓަލުގައި 4،480 ފަހަރު އެހީތެރިކަން ދީފައިވެ އެވެ.

ހަލީމް ވިދާޅުވީ ވިލިމާލޭގައި ހޮސްޕިޓަލްގެ ނަން ބޯޑެއް އިނަސް އެއާ ގާތަށް ވެސް ފަރުވާ ނުދެވޭ ކަމަށެވެ. ސަރުކާރުން ވަނީ އެ ހޮސްޕިޓަލް މިހާރު ހިންގާ އިމާރާތުގައި އާ ހޮސްޕިޓަލެއް އަޅަން ނިންމައި، އެކަމުގެ ދިރާސާތައް ހަދަން ޗައިނާގެ ކުންފުންޏަކާ ހަވާލުކޮށްފަ އެވެ. އެއާއެކު، ވިލިމާލޭގައި ދިރިއުޅޭ މީހުން ފަރުވާ ދިނުމަށް އިތުރު ގޮތެއް ހަމަޖައްސަމުން އަންނަ ކަމަށް އޭނާ ވިދާޅުވި އެވެ.

ވިލިމާލޭގައި ދަތުގެ ހިދުމަތް ދިނުން މާދަމާ ރަސްމީކޮށް ފަށަން ވަނީ ނިންމައިފަ އެވެ.