ރާއްޖެއިން ބޭނުންކޮށްފައިވާ ޕްލާސްޓިކް ފުޅީގެ ބޭލްޑް ކޮންޓެއިނަރެއް އެކްސްޕޯޓުކޮށްފި

ދަ ކޮކާ ކޯލާ ފައުންޑޭޝަނުން ބޭނުން ކޮށްފައިވާ ޕްލާސްޓިކް (ޕެޓް) ފުޅީގެ ބޭލްޑް ކޮންޓެއިނަރެއް އެކްސްޕޯޓުކޮށްފި އެވެ.

ކޮކާ ކޯލާ ފައުންޑޭޝަނުން މޯލްޑިވްސް އޯޝަން ޕްލާސްޓިކްސް އެލަޔަންސް (މޯޕާ) އާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ)އާ ގުޅިގެން ރީސައިކަލް ކުރަން ބޭލްޑް ޕެޓް ފުޅި އެކްސްޕޯޓުކުރީ މެލޭޝިއާ އާއި ޗައިނާއަށެވެ. ކޮކާ ކޯލާ ފައުންޑޭޝަނުން ބުނީ މީގެ ކުރިން ޕެޓް ފުޅި އެކްސްޕޯޓްކުރި ނަމަ ވެސް މިއީ މި ކުނިތައް ބޭލްޑްކޮށް އެކްސްޕޯޓުކުރާ ފުރަތަމަ ފަހަރު ކަމަށެވެ. އަދި މި ފުޅިތައް ބޭލްޑުކުރުމަކީ ގެންދެވޭ ކުނީގެ އަދަދު އިތުރުކޮށް، ޕްލާސްޓިކް ކުނި ގެންދިއުމަށް ފަސޭހަވާނެ ކަމެއްގެ ގޮތުގައި ވެސް ވިދާޅުވި އެވެ.

މި މަސައްކަތް ކޮށްފައި ވަނީ ކޮކާ ކޯލާ ފައުންޑޭޝަނުގެ އައިލެންޑް ޕެޓް ކަލެކްޝަން ޕްރޮޖެކްޓްގެ ދަށުންނެވެ.

އެ ޕްރޮޖެކްޓަކީ ރާއްޖޭގައި ޕްލާސްޓިކް ކުނި ރީސައިކަލް ކުރުމަށް މުޅި ރާއްޖެއަށް ހައްލެއް ހޯދައިދިނުމަށް އެހީތެރިވެދޭން ބޭނުންވާ ވަސީލަތްތައް ފޯރުކޮށްދީ، އެކަން ހަރުދަނާ ގޮތެއްގައި ކުރެވޭނެ ނިޒާމު ގާއިމުކުރުމަށް ފަށާފައިވާ ޕްރޮޖެކްޓެކެވެ. އަދި މިއީ، މިހާރު ތިލަފުށީގައި ކުނި ނައްތާލަން ބޭނުން ކުރާ ނިޒާމުން ބޭރުން، ހަރުދަނާ ގޮތެއްގައި ޕްލާސްޓިކް ކުނި މެނޭޖުކޮށް ރިސައިކަލް ކުރުމަށް ފަށާފައިވާ އިނީޝިއޭޓިވްއެއް ކަމަށް ވެސް ބުންޏެވެ.

މި މަސައްކަތަކީ ޕެޓް ފުޅި ކަލެކްޝަންގެ މަސައްކަތް މާލެ ސަރަހައްދުން ބޭރަށް ފުޅާކޮށް، އެކި ރަށްރަށުން އެ ފުޅިތައް ނަގައި ރިސައިކަލްކުރުމުގެ ނިޒާމު ގާއިމުކުރުމަށް ފަށާފައިވާ މަސައްކަތެއް ކަމަށް ވެސް އެ ފައުންޑޭޝަނުން ފާހަގަކުރެ އެވެ.

ކޮކާ ކޯލާ ފައުންޑޭޝަނުން ބޭނުން ކޮށްފައިވާ ޕްލާސްޓިކް ފުޅިތައް ފުރަތަމަ ފަހަރަށް އެކްސްޕޯޓުކުރުން ފާހަގަކުރުމަށް ބޭއްވި ރަސްމިއްޔާތުގައި ކުނި މެނޭޖުކުރުމަށް ވެމްކޯއަށް ޕިކަޕް އާއި ބެލާއެއް ވެސް ވަނީ ހަދިޔާކޮށްފަ އެވެ.

މި ރަސްމިއްޔާތުގައި މޯޕާގެ ރައީސް އަހުމަދު މައުމޫން އެ މަޝްރޫއު ސިފަކުރެއްވީ ޕްލާސްޓިކް ކުނިތަކާ ދެކޮޅަށް އެ ޖަމިއްޔާއިން ކުރާ މަސައްކަތުގައި ރާއްޖެއަށް ލިބުނު އިންގިލާބީ ކުރިއެރުމެއްގެ ގޮތުގަ އެވެ.

"މުޖުތަމައުތަކަށް ތައުލީމު ދިނުމާއި ވެމްކޯ ފަދަ ގައުމީ ބައިވެރިންނާ ގުޅިގެން ކުނި މެނޭޖްކުރާ ގޮތް ރަނގަޅު ކުރުމުގެ އިތުރުން، ދިގު މުއްދަތަކަށް ދެމެހެއްޓެނިވި ގޮތެއްގައި ކުރިއަށް ގެންދިއުމާއި ތިމާވެށީގެ ރައްކާތެރިކަމަށް މަގުފަހިކޮށްދިނުމަކީ އަޅުގަނޑުމެންގެ އަމާޒެއް،" އޭނާ ވިދާޅުވި އެވެ.

ވެމްކޯގެ މެނޭޖިން ޑިރެކްޓަރު މުޖުތަބާ ޖަލީލް ވިދާޅުވީ ކޮކާ ކޯލާ ފައުންޑޭޝަނުގެ އިސްނެގުމަކީ ޕްލާސްޓިކް ކުނި މެނޭޖްކުރުން ރަނގަޅުކޮށް، ރާއްޖޭގައި ރީސައިކަލް ކުރުމުގެ މަސައްކަތްތައް އިތުރުކުރަން އެޅޭ ވަރަށް މުހިންމު ފިޔަވަޅެއް ކަމަށެވެ.

"ޕެޓް ކުނި އެއްކުރުމާއި ޕްރޮސެސް ކުރުމަށް ބޭނުންވާ ވަސީލަތްތަކާއި އާލާތްތައް ރަށްރަށަށް ގެންގޮސް، ޕްލާސްޓިކް ތަޣައްޔަރުވުމުގެ އަވަސް ގޮންޖެހުން ހައްލުކުރަން އެހީތެރިވެދިނުމުގެ އިތުރުން ދެމެހެއްޓެނިވި މުސްތަގުބަލެއްގެ ބިންގާއެއް ވެސް ބިނާކުރުމަށް އެޅޭ ބާރެއް،" އޭނާ ވިދާޅުވި އެވެ.

ދަ ކޮކާ ކޯލާ ފައުންޑޭޝަންގެ ރައީސް ކާލޮސް ޕަގޯއާގާ ވިދާޅުވީ އެ ފައުންޑޭޝަނުން ފަށާފައިވާ މަޝްރޫއަކީ ކުނި އެއްކުރުމަށް ވުރެ ފުޅާކޮށް ކުރިއަށް ގެންދިއުމަށް ހަމަޖެހިފައިވާ މަސައްކަތެއް ކަމަށެވެ.

"މޯޕާ އާއި ވެމްކޯގެ މަސައްކަތްތަކަށް ބޭނުންވާ ހަރަދު ހަމަޖައްސައިދީގެން، އަޅުގަނޑުމެންގެ އަމާޒަކީ ދިވެހިރާއްޖޭގައި ދެމެހެއްޓެނިވި ސަގާފަތެއް އާލާކޮށް، ވަށާޖެހޭ އިގްތިސާދަކަށް އެހީތެރިވުން،" އޭނާ ވިދާޅުވި އެވެ.

މި ޕްރޮޖެކްޓުގައި ވެމްކޯއާ ގުޅިގެން މޯޕާއިން ވަނީ މުޖުތަމައުތަކުގެ ހޭލުންތެރިކަން އިތުރުކުރުމުގެ ޕްރޮގްރާމްތައް ތައާރަފްކުރުމަށް އެހީތެރިވެދީ، ކޮކާ ކޯލާ ފައުންޑޭޝަންގެ ހަރަދުގައި ގެނެވޭ ކޮމްޕެކްޓަރާއި ޕިކަޕް ފަދަ ވަސީލަތްތައް މާލެ ސަރަހައްދާއި އެހެން ރަށްރަށުގައި ވެސް ފައިދާ ހުރި ގޮތެއްގައި ބޭނުންކުރެވޭނެ ގޮތް ހެދުމަށް މަސައްކަތްކޮށްފަ އެވެ.