ޕާކިސްތާނުގައި ޕޯލިއޯ ގިނަވަނީ

ޕާކިސްތާނުން ޕޯލިއޯ ބަލީގެ އިތުރު ހަ ކޭސް ފެނި މި އަހަރު އެ ގައުމުގެ ފެނުނު މި ބަލީގެ ކޭސްތަކުގެ ޖުމްލަ އަދަދު 39 އަށް އަރައިފި އެވެ.

ޕޯލިއޯވައިރަސް ޓައިޕް 1 (ޑަބްލިއުޕީވީ1) ގެ ތިން ކޭސް ބަލޫޗިސްތާނުންން ފެނިފައި ވާއިރު ދެ ކޭސް ސިންދު ޕްރޮވިންސްއިން އަދި 1 ކޭސް ހައިބަރް ޕަހްތުންހްވާއިން ފެނިފައިވެ އެވެ.

ޕޯލިއޯއަކީ ކުޑަކުދިންގެ ގައިގެ ބައެއް މަސްތައް ހަލާކުވެ ވާގިނެތޭ ހާލަތަކަށްދާ ގައިން ގަޔަށް އަރާ ބައްޔެކެވެ. ގިނަ އަހަރުތަކެއް ވަންދެން ހިންގި ވެކްސިނޭޝަން ޕްރޮގްރާމްތަކުން މުޅި ދުނިޔެއިން މިބަލި ގާތްގަނޑަކަށް ވަނީ ނައްތާލެވިފަ އެވެ.

ވެކްސިން ދިނުމާ ދެކޮޅު ހަދާ މީހުން ގިނަ ޕާކިސްތާނާއި އަފްޣާނިސްތާނަކީ މިބަލި އަދިވެސް އެންޑެމިކްކޮށް ފެންނަ ހަމައެކަނި ދެ ގައުމެވެ. މިބައްޔަށް ފަރުވާއެއް ނެތެވެ. އަދި މިބަލީގައި ވާގި ނެތުމަށް ފަހު ދެން އަލުން ރަނގަޅެއް ނުކުރެވެ އެވެ.

"މިއީ ހުރިހާ މައިންބަފައިންނަށާއި މުޖުތަމައުތަކަށް އިންޒާރެއް" ކަމަށް، ޕާކިސްތާނުން ޕޯލިއޯ ނައްތާލުމުގެ ފޯކަލް ޕާސަން، އާއިޝާ ރަޒާ ފާރޫޤް ވިދާޅުވި އެވެ.

ޕާކިސްތާނުގައި 5 އަހަރުން ދަށުގެ 45 މިލިއަނަށްވުރެ ގިނަ ކުދިންނަށް ޕޯލިއޯ ވެކްސިން ދިނުމުގެ ގައުމީ ކެމްޕޭނެއް މި މަހު 28 ގައި ފަށާނެ އެވެ.