މުދަލު ޒަކާތުގެ ގޮތުގައި 12 މިލިއަން ރުފިޔާ ބަހައިފި

މުދަލު ޒަކާތުގެ ގޮތުގައި ފަގީރުންގެ ދަފްތަރުގައި ރަޖިސްޓްރީވެފައިވާ މީހުންނަށް 12 މިލިއަނަށް ވުރެ ގިނަ ރުފިޔާ ބަހައިފި އެވެ.

މޯލްޑިވްސް ޒަކާތު ހައުސް އިން މިއަދު އާންމުކުރި އެ އިދާރާގެ މިދިޔަ މަހު ތަފާސްހިސާބުތަކުގައިވާ ގޮތުގައި، މުދަލު ޒަކާތުގެ ގޮތުގައި ވަނީ 12.7 މިލިއަން ރުފިޔާ ބަހައިފަ އެވެ.

މުދަލު ޒަކާތުގެ ފައިސާ ބަހަން ފެށީ މިދިޔަ މަހު 13 ގަ އެވެ. މި އަހަރަކީ މުދަލު ޒަކާތުގެ ފައިސާ ފަގީރުންނާއި މިސްކީނުންނަށް އެންމެ ގިނައިން ބޮލަކަށް ބެހި އަހަރެވެ.

މި އަހަރު މުދަލު ޒަކާތުގެ ގޮތުގައި، މާލެ އާއި އަތޮޅުތަކުން ޖުމްލަ 3،183 މީހަކަށް، ބޮލަކަށް 4،000ރ. ބަހާފައިވެ އެވެ. މިދިޔަ އަހަރު މުދަލު ޒަކާތުގެ ގޮތުގައި ބެހީ ބޮލަކަށް 3،500ރ. އެވެ.

އިސްލާމިކް މިނިސްޓްރީން ކުރިން ބުނި ގޮތުގައި، މި އަހަރުގެ ޒަކާތުގެ ފައިސާ ޖަމާކުރަނީ 2021 ވަނަ އަހަރުން ފެށިގެން އެކުލަވާލާފައި އޮތް ފަގީރުންގެ ދަފްތަރު ރިވިއުކުރުމަށް ފަހު ޝަރުތު ހަމަވާ މީހުންނަށެވެ.

ޒަކާތު ހައުސްގެ ތަފާސްހިސާބުތަކުގައިވާ ގޮތުގައި، ފަގީރުންގެ ދަފުތަރުގެ ހިމެނޭ މީހުންގެ ބޭސްފަރުވާއަށް މިދިޔަ މަހު ވަނީ 1.2 މިލިއަން ރުފިޔާ ހަރަދުކޮށްފަ އެވެ. އެއީ 131 މީހަކަށެވެ.