ނަތަންޔާހޫ އަންގަނީ އދ.ގެ ސިފައިން ވެސް ގެންދަން

ލުބްނާނުގައި ތިބޭ އދ.ގެ ސުލްހަ ބަލަހައްޓާ ސިފައިންނަށް އިޒްރޭލުގެ ހަމަލާތަކުގައި ގެއްލުމެއް ނުވާނެ ތާކަށް ގެންދިއުމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އދ.ގެ ވެރިޔާ އެންޓޯނިއޯ ގުޓަރެސް އަށް ގޮވާލައިފި އެވެ.

މިގޮތަށް ގޮވާލާފައި މި ވަނީ، ލުބުނާނުގައި ވަގުތީ ގޮތުން މަސައްކަތްކުރާ އދ. ގެ ސިފައިން (ޔޫނީފިލް) ގެ ފަސް މީހަކު އިޒްރޭލާއި ހިޒްބުﷲގެ ހަމަލާތަކުގައި ޒަހަމްވުމާ ގުޅިގެން އެ ސިފައިން އެ ސަރަހައްދުން ގެންދަން އެދުމުން ވެސް އދ. އިން ތަކުރާރުކޮށް އެކަމަށް އިންކާރުކޮށްފައި ވަނިކޮށެވެ.

"ސެކްރެޓަރީ ޖެނެރަލް. ޔޫނިފިލް ފައުޖުތައް ނުރައްކަލާ ދުރަށް ގެންދަވާ. އެކަން މިހާރުން މިހާރަށް، ވަގުތުން ކުރަންވާނެ،" ވީޑިއޯ ބަޔާނެއްގައި ނަތަންޔާހޫ ބުންޏެވެ.

ކެބިނެޓް ބައްދަލުވުމެއްގެ ކުރިން ނަތަންޔާހޫ ވަނީ ޔޫނިފިލްގެ ފައުޖު ދުރަށް ދިއުމަށް އެތައް ފަހަރަކު އެދިފައިވާ ކަމަށް ބުނެފަ އެވެ. އޭނާ ބުނީ އދ.ގެ ސިފައިން ހިޒްބުﷲ އިން ބޭނުންކުރަނީ އައްޑަނައެއްގެ ގޮތުގައި ކަމަށެވެ.

"ޔޫނިފިލް ސިފައިން އަނބުރާ ނުގެންދިއުމުގެ ސަބަބުން އެ މީހުން ވަނީ ހިޒްބުﷲގެ ރަހީނުންނަށް ވެފައި. މިކަމުގެ ސަބަބުން އެމީހުންނާއި އަހަރެމެންގެ ސިފައިންގެ ފުރާނައަށް ނުރައްކާވޭ،" ނަތަންޔާހޫ ބުންޏެވެ.

"ޔޫނިފިލް ސިފައިންނަށް ލިބުނު ގެއްލުމާ މެދު ހިތާމަކުރަން. އަދި މިފަދަ ގެއްލުމެއް ނުވާނެ ގޮތަކަށް ކުރެވެން އޮތް ހުރިހާ ކަމެއް ކުރަން. އެކަމަކު، މިކަން ހުއްޓުވުމުގެ އެންމެ ފަސޭހަ އަދި އެންމެ ރަނގަޅު ގޮތަކީ އެމީހުން ނުރައްކާތެރި ސަރަޙައްދުން ނެރުން."

ޔޫނިފިލްއިން ދެކުނު ލުބުނާނުގައި ތިބޭ މަގާމުތައް ދޫކޮށްލުމަށް ވަނީ އިންކާރުކޮށްފަ އެވެ.

"މި ސަރަޙައްދުގައި އދ. ގެ ދިދަ ނަގާފައި ހުންނަން ޖެހޭނެ ކަމަށާއި ސެކިއުރިޓީ ކައުންސިލަށް ރިޕޯޓު ކުރުމަށްޓަކައި މިތާ ސިފައިން ތިބެން ޖެހޭނެ ކަމަށް އިއްތިފާގުން ނިންމައިފިން،" ޔޫނިފިލްގެ ތަރުޖަމާނު އެންޑްރެއާ ޓެނެންޓީ ހޮނިހިރު ދުވަހު އޭއެފްޕީއަށް ދެއްވި އިންޓަވިއުއެއްގައި ވިދާޅުވި އެވެ.

އޭނާ ވިދާޅުވި ގޮތުގައި އިޒްރޭލުން ޔޫނިފިލްއަށް އެދިފައިވަނީ "ބްލޫ ލައިން" އިން ފެށިގެން 5 ކިލޯމީޓަރު (3 މޭލު) އާ ހަމައަށް ހުރި މަގާމުތަކުން ފައުޖުތައް އަނބުރާ ގެންދަން ކަމަށެވެ. ނަމަވެސް ސުލްޙަ ބަލަހައްޓާ ފައުޖުތަކުން އެކަމަށް އިންކާރުކުރި އެވެ.

ޔޫނިފިލް އަކީ ގާތްގަނޑަކަށް 9،500 ސިފައިން ހިމެނޭ އެކި ގައުމުތަކުގެ މިޝަނެކެވެ. މިމިޝަން އުފެދުނީ 1978 ގައި އިޒްރޭލުން ލުބްނާނަށް އަރައިގަތުމާ ގުޅިގެންނެވެ. މިހާރު މި މިޝަންގެ މަސްއޫލިއްޔަތަކީ 2006 ވަނަ އަހަރު އިޒްރޭލާއި ހިޒްބުﷲއާ ދެމެދު ހިނގި 33 ދުވަހުގެ ހަނގުރާމަ ހުއްޓާލުމަށް ވި އެއްބަސްވުމަށް ދެ ފަރާތުން އަމަލުކުރޭތޯ ބެލުމެވެ. -- އޭއެފްޕީ