ތެލެސީމިއާ ދަފްތަރުގައި މި އަހަރު އަލަށް 13 ކުދިން

ތެލެސީމިއާ ދަފްތަރުގައި މި އަހަރު އަލަށް 13 ކުއްޖަކު ރަޖިސްޓްރީވެފައިވާ ކަމަށް، މޯލްޑިވިއަން ބްލަޑް ސާވިސަސް އިން މިއަދު ބުނެފި އެވެ.

މޯލްޑިވިއަން ބްލަޑް ސާވިސްގެ ސީނިއާ ސްޕެޝަލިސްޓް ރެޖިސްޓްރާ އިން ޕީޑިއެޓްރިކް ޑރ. އަހުމަދު އުމަރު "މިހާރު" އަށް ވިދާޅުވީ މިދިޔަ އަހަރަށް ވުރެ މި އަހަރުގެ މިހާތަނަށް ތެލެސީމިއާ ދަފްތަރުގައި ރަޖިސްޓްރީވެފައިވާ ކުދިން ގިނަ ކަމަށެވެ.

ތެލެސީމިއާ ދަފްތަރުގައި މިދިޔަ އަހަރު އަލަށް ރަޖިސްޓްރީވީ 10 ކުދިންނެވެ. އޭގެ ކުރިން، 2022 ވަނަ އަހަރު އެ އަދަދު ހުރީ 16 ގަ އެވެ.

އެ ދަފްތަރުގައި މިހާތަނަށް 944 ކުދިން ވަނީ ރަޖިސްޓްރީކޮށްފަ އެވެ. އޭގެ ތެރެއިން ދުނިޔޭގައި ތިބީ 659 ކުދިންނެވެ.

ފާއިތުވި 13 އަހަރުގެ ތެރޭގައި، ތެލެސީމިއާ ދަފްތަރުގައި އެންމެ ގިނަ ކުދިން ރަޖިސްޓްރީވީ 2011 ވަނަ އަހަރު އެވެ. އެ އަހަރު 31 ކުދިން އަދި ދެ ވަނައަށް އެންމެ ގިނަވި 2014 ވަނަ އަހަރު 27 ކުދިން ރަޖިސްޓްރީވި އެވެ. އެ މުއްދަތުގެ ތެރޭގައި ތެލެސީމިއާ ދަފްތަރުގައި އެންމެ މަދުން ރަޖިސްޓްރީ ކުރީ 2020 ވަނަ އަހަރު އެވެ. އެ އަހަރު ފަސް ކުދިން ރަޖިސްޓްރީކުރި އެވެ. އެކަމަކު، އެ އަދަދު މަދުވީ ކޮވިޑުގެ ސަބަބުން ޓެސްޓުކުރުމުގައި އުނދަގޫތައް ދިމާވުމުން ކަމަށް ލަފާކުރެ އެވެ.

އަހަރަކު އެވްރެޖުކޮށް 17 ކުދިން އަލަށް ރަޖިސްޓްރީވާ ކަމަށް ބްލަޑް ސާވިސްގެ ހިސާބުތަކުން ދައްކަ އެވެ.

ތެލެސީމިއާ ކުދިންނަށް ދޭ ފަރުވާއާ އެކު ހާލަތު ރަނގަޅުކުރަން ސަރުކާރުން ވަނީ އެ ބައްޔަށް ހާއްސަކޮށްގެން ހުޅުމާލޭގައި ހޮސްޕިޓަލެއް އަޅަން ނިންމައިފަ އެވެ. ނަމަވެސް އެކަމުގެ އަމަލީ މަސައްކަތެއް އަދި ނުފެށެ އެވެ.