ރާއްޖޭގައި ތިބެގެން ބޯންމެރޯ ޓްރާންސްޕްލާންޓަށް ބޭނުންވާ ކްރޮސްމެޗު ޓެސްޓުގެ ސާމްޕަލް ނެގޭނެ ގޮތް ހަދައިފި

ބޯންމެރޯ ޓްރާންސްޕްލާންޓު ހެދުމުގެ ކުރިން ހަދަންޖެހޭ ކްރޮސްމެޗު ޓެސްޓަށް ބޭނުންވާ ސާމްޕަލް، ރާއްޖޭގައި ތިބެގެން ނެގޭނެ އިންތިޒާމް ހަމަޖައްސައިފި އެވެ.

މޯލްޑިވިއަން ބްލަޑް ސާވިސްގެ އެސޯސިއޭޓް ސްޕެޝަލިސްޓް އިން ޕީޑިއެޓްރިކް ޑރ. އަހުމަދު އުމަރު މިއަދު ވިދާޅުވީ، ކްރޮސްމެޗު ހެދުމަށް މީގެ ކުރިން އާއިލާތަކުން ދާން ޖެހެނީ އިންޑިއާ އަށް ކަމަށެވެ. އެކަމަށް ބޮޑެތި ހަރަދުތަކެއް ހިނގާ ކަމަށް އޭނާ ވިދާޅުވި އެވެ.

އެހެންވެ، އަލަށް ގެނައި ބަދަލުން ލުއިތަކެއް ލިބޭނެ ކަމަށް އުމަރު ވިދާޅުވި އެވެ.

ސަރުކާރުން މިހާރު ހަމަޖައްސާފައިވާ ގޮތުން، ކްރޮސްމެޗުގެ ސާމްޕަލް ނެގުމަށް އިންޑިއާގެ ބެންގަލޫރު ހޮސްޕިޓަލްގެ ޓީމެއް ރާއްޖެ އަންނާނެ އެވެ. އެ އަށް ބޭނުންވާ ސާމްޕަލްތައް ނެގުމަށް ފަހު އެ ޓީމުތައް އަނބުރާ ދާނެ އެވެ.

އެ ގޮތަށް މި ފަހުން ވަނީ އެއް ބުރު ސާމްޕަލް ނަގައިފަ އެވެ.

"އެކަން މި ދާއިމީ ކުރީ. މީގެ ފަހުން އިންޑިއާގެ ޓީމުން ރާއްޖެ އައިސް ސާމްޕަލް ނެގުމަށް ފަހު އެކޮޅުގައި ޓެސްޓު ހަދާނީ. މި ދަތުރުގެ ހަރަދުތައް ކުރާނީ އިންޑިއާގެ ހޮސްޕިޓަލުން،" އުމަރު ވިދާޅުވި އެވެ.

ތެލަސީމިއާ ބަލީގައި 650 ކުދިން މިހާރު ވެސް ރާއްޖޭގެ އެކި ސަރަހައްދުތަކުން ފަރުވާ ހޯދަމުން ދެ އެވެ. ސަރުކާރުން ވަނީ އެ ބައްޔަށް ހާއްސަކޮށްގެން ހޮސްޕިޓަލެއް އަޅަން ނިންމައިފަ އެވެ.