މިދިޔަ މަހު މީރާއަށް ވަން އާމްދަނީ 93 ޕަސެންޓް އިތުރު

މިދިޔަ މަހު ޓެކްސް އިދާރާ، މީރާއަށް ލިބުނު އާމްދަނީ 93 ޕަސެންޓަށް އިތުުރު ވެއްޖެ އެވެ.

މީރާ އިން ބުނީ، މިދިޔަ މަހު އިދާރާއަށް ޓެކްސް އާ އެހެނިހެން އާމްދަނީގެ ގޮތުގައި 2.3 ބިލިއަން ރުފިޔާ ލިބިފައިވާ ކަމަށެވެ. މީރާ އިން ބުނީ، ޓެކްސް އާމްދަނީ އެހާ ބޮޑަށް އިތުރުވީ، ޖީއެސްޓީ އާއި ޓީޖީއެސްޓީ އަދި ރިސޯޓު ކުލީގެ ގޮތުގައި ލިބުނު އާމްދަނީ އިތުރުވުމުގެ ސަބަބުން ކަމަށެވެ.

މިދިޔަ އަހަރުގެ މި މުއްދަތުގައި ދައުލަތަށް ލިބުނީ 1.1 ބިލިއަން ރުފިޔާގެ އާމްދަނީއެކެވެ.

މިދިޔަ މަހު ޓީޖީއެސްޓީގެ ގޮތުގައި 589 މިލިއަން ރުފިޔާ ލިބިފައިވެ އެވެ. ޖީއެސްޓީގެ ގޮތުގައި 434 މިލިއަން ރުފިޔާ ލިބުނު އިރު އިންކަމް ޓެކްސްގެ ގޮތުގައި 175 މިލިއަން ރުފިޔާ ލިބުނެވެ. މިދިޔަ މަހު ޑިޕާޗާ ޓެކްސްގެ ގޮތުގައި ދައުލަތަށް 101 މިލއިަން ރުފިޔާ ލިބިފައިވެ އެވެ.

ޓެކްސް ނޫން އެހެން ގޮތް ގޮތުން މިދިޔަ މަހު ލިބުނު އާމްދަނީ 908 މިލިއަން ރުފިޔާއަށް އަރަ އެވެ. އެންމެ ބޮޑު އަދަދެއް ލިބުނު ރިސޯޓު ކުލިން 361 މިލިއަން ރުފިޔާ ލިބިފައިވެ އެވެ. އަދި ޓޫރިޒަމްގެ ބޭނުމަށް ދޫކޮށްފައިވާ ބިމުގެ މުއްދަތު އިތުރު ކުރުމަށް 230 މިލިއަން ލިބިފައިވެ އެވެ.

މިދިޔަ މަހު ލިބުނު ޓެކްސް އާމްދަނީގެ ތެރެއިން 102 މިލިއަން ލިބުނީ ޑޮލަރުންނެވެ. އޭގެ ތެރެއިން 60 ޕަސެންޓު ނިސްބަތްވަނީ ޓީޖީއެސްޓީ އާއި ރިސޯޓު ކުއްޔަށެވެ.

ވޭތުވެދިޔަ ނުވަ މަހު ދައުލަތަށް ވަނީ ޓެކްސް އާއި އެ ނޫން ގޮތް ގޮތުން ލިބުނު އާމްދަނީ 22 ބިލިއަން ރުފިޔާއަށް އަރާފަ އެވެ. އޭގެ ތެރެއިން ޓެކުހުގެ ގޮތުގައި 18 ބިލިއަން ރުފިޔާ ލިބިފައިވެ އެވެ.