ހިމާޔަތް ކޮށްފައިވާ ދިރުންތަކަށް ގެއްލުން ދޭ މިންވަރު އިތުރުވެއްޖެ: އީޕީއޭ

ރާއްޖޭގައި ހިމާޔަތް ކޮށްފައިވާ ދިރުންތަކަށް ގެއްލުން ދޭ މިންވަރު އަހަރަކަށް ވުރެ އަހަރެއްގައި އިތުރުވަމުންދާ ކަމަށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިއްޔެ ބުނެފި އެވެ.

ރާއްޖޭގެ ތިމާވެށި ހިމާޔަތްކުރުމުގެ ގާނޫނީ ޒިންމާ ހަވާލު ކޮށްފައިވާ އީޕީއޭ އިން ނެރުނު ބަޔާނެއްގައިވަނީ ހިމާޔަތް ކޮށްފައިވާ ދިރުންތައް ހިފައި ގެންގުޅުމާއި މެރުމާއި ކެއުމުގެ އިތުރުން އެ ތަކެތީގެ ބައިތަކުގެ ވިޔަފާރިކުރުމަކީ ވެސް މަނާކަމެއް ކަން ހަނދާން ކޮށްދީފަ އެވެ.

އީޕީއޭ އިން ބުނީ "ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނު"ގެ ދަށުން އެކުލަވާލާފައިވާ "ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާ ބެހޭ ގަވާއިދު"ގައި ރާއްޖޭގެ މާހައުލުން ފެންނަ މުހިންމު ގިނަ ދިރުންތަކެއް ރައްކާތެރިކޮށް، ގާނޫނީ ގޮތުން ހިމާޔަތް ދީފައި ކަމަށެވެ.

އޭގެ ތެރޭގައި ހިމެނެނީ؛

• ފަސް ބާވަތެއްގެ ވެލަޔާއި ކަހަނބު

• އެއް ބާވަތުގެ ކަންޒު ކަހަނބު

• 207 ބާވަތެއްގެ ދޫނި

• ރާއްޖޭގެ ސަރަހައްދުން ފެންނަ ހުރިހާ ބާވަތެއްގެ މަޑި

• ފެހުރިހި

"އިސްވެ ދެންނެވުނު ދިރުންތަކަކީ ރާއްޖޭގެ ގުދުރަތީ މާހައުލަށް މުހިންމު ފައިދާތަކެއް ފޯރުކޮށްދޭ ދިރުންތަކެކެވެ. އަދި ހަމައެއާ އެކު ދިވެހިންގެ އުޅުމާއި ސަގާފަތާއި އިގުތިސާދާ ވަރަށް ވެސް ބޮޑަށް ގުޅި ލާމެހިފައިވާ މުހިންމު ދިރުންތަކެވެ،" އީޕީއޭގެ ބަޔާނުގައި ބުންޏެވެ.

އީޕީއޭއިން ބުނީ ހިމާޔަތް ކޮށްފައިވާ މި ދިރުންތަކަކީ ޓޫރިޒަމަށް މުހިންމު އަދި ރާއްޖެއިން މިހާރު ޕްރޮމޯޓްކުރާ "ނޭޗާ ޓޫރިޒަމް"ގެ ފަހަތުގައިވާ އެންމެ ބޮޑު ސަބަބު ކަމަށެވެ. ރާއްޖޭގެ މާހައުލުން މި ކަހަލަ ދިރުންތައް ފެނުމަކީ ޓޫރިސްޓުން ތަކުރާރުކޮށް ރާއްޖެ އަންނަ އެއް ސަބަބު ކަމަށާއި އެ ދިރުންތަކުން ދިވެހިންނަށް ވެސް ހިތްހަމަޖެހުން ލިބޭ ކަމަށް އެ އެޖެންސީން ބުންޏެވެ.

އައިންމަތީ ދޫނިތަކަކީ ޒަމާނުއްސުރެ ރާއްޖޭގެ މަސްވެރިކަމުގައި މުހިންމު ދައުރެއް އަދާކުރާ ދިރުންތަކެއް ކަމަށާއި ހިމާޔަތްކޮށްފައިވާ ކަނޑުގެ އެހެން ދިރުންތަކަކީ ވެސް ރާއްޖޭގެ މާހައުލު ދެމެހެއްޓުމުގައި ގިނަގުނަ ތަފާތު ގުދުރަތީ ހިދުމަތްތައް ފޯރުކޮށްދޭ، ރާއްޖޭގެ ގުދުރަތީ ނިޒާމުގެ މުހިންމު ބައެއް ކަމަށް އީޕީއޭ އިން ބުންޏެވެ.

"ނަމަވެސް ހިތާމައަކީ ދިވެހި ރާއްޖޭގެ އެކި ކަންކޮޅުތަކުގައި މިފަދަ ދިރުންތަކާއި އެ ދިރުންތަކުގެ މާހައުލަށް ނޭދެވޭ އަސަރުކުރާ ގިނަގުނަ ކަންތައްތަކެއް ތަކުރާރުކޮށް ފެންނަ މިންވަރު އަހަރަކަށް ވުރެ އަހަރެއް އިތުރުވަމުންދާ ކަން މި އެޖެންސީއަށް ފާހަގަވެފައިވާ ކަމެވެ،" އެ ބަޔާނުގައިވެ އެވެ.

އެ އެޖެންސީން ބުނިގޮތުގައި ހިމާޔަތް ކޮށްފައިވާ ދިރުންތަކަށް ކާންދިނުމާއި އަތްލުމާއި ކަނޑު އުޅަނދުފަހަރުގައި ފެހުރިހި ކަހަލަ ބޮޑެތި ދިރުންތައް ފަހައި، ގިނަ އަދަދެއްގެ މީހުން އެއްފަހަރާ އެ އެއްޗެއްސާ ގާތްވެ، އެ ތަކެތީގެ ތަބީއީ އުޅުމަށް ބަދަލު އަންނާނެ ކަހަލަ ކަންކަން ކުރުން ވެސް ވަނީ އިތުރުވެފަ އެވެ.

ފެހުރިހި ދައްކަން ޓޫރިސްޓުން ތޮއްޖެއްސުމަކީ ރާއްޖޭގައި ވަރަށް ބޮޑުވެފައި އޮތް މައްސަލައެކެވެ. މި މައްސަލަ ހައްލު ކުރުމަށްޓަކައި ސަރުކާރުން ވަނީ ފެހުރިހި ހިމާޔަތް ކުރުމަށް އާ އުސޫލެއް ވެސް މިދިޔަ މަހު ހަދައިފަ އެވެ.

އީޕީއޭއިން ވަނީ ގަވާއިދުތަކާ ހިލާފަށް އަމަލުކުރާނަމަ ފިޔަވަޅު އަޅާނެ ކަމުގެ އިންޒާރު ވެސް ދީފަ އެވެ.