ދިރޭތަކެތީގެ ނަސްލު ހިމާޔަތްކުރަން ހާއްސަ ފަންޑެއް އުފައްދަން ރާއްޖެއިން ގޮވާލައިފި

ދިރޭތަކެތީގެ ނަސްލު ހިމާޔަތްކުރުމަށް ހާއްސަ ފަންޑެއް އުފެއްދުމަށް ކޮންވެންޝަން އޮން ބަޔޮލޮޖިކަލް ޑައިވާސިޓީ (ސީބީޑީ)ގެ މި އަހަރުގެ ކޮންފަރެންސްގައި ރާއްޖެއިން މިއަދު ގޮވާލައިފި އެވެ.

ތިމާވެއްޓާ ބެހޭ މިނިސްޓްރީން ބުނީ ކޮލޮމްބިއާގެ ކާލީގައި ކުރިއަށް ގެންދިޔަ ސީބީޑީގެ 16 ވަނަ ކޮންފަރެންސް މިއަދު ނިންމާލާފައިވާ ކަމަށެވެ. އެ ކޮންފަރެންސްގައި ރާއްޖެ ހިމެނޭ ގޮތަށް ސީބީޑީގެ މެމްބަރު ގައުމުތަކުގެ އިސްވެރިން ބައިވެރިވެވަޑައިގަތެވެ.

އެ ކޮންފަރެންސްގެ ހަވާސާގައި ތިމާވެއްޓާ ބެހޭ މިނިސްޓަރު ތޯރިގް އިބްރާހިމް ވަނީ ތިމާވެށީގެ ދާއިރާއިން ރާއްޖެއަށް އެކި ގޮތްގޮތުން އެހީތެރިކަން ދޭ ގައުމުތަކާއި ފަރާތްތަކާ ބައްދަލުކުރައްވައިފަ އެވެ. އެ ބައްދަލުވުންތަކުގައި ވަނީ ތިމާވެށީގެ ދާއިރާއިން އިތުރަށް ގުޅުން ބަދަހިކޮށް މުސްތަގުބަލުގައި ގުޅިގެން އިތުރު މަސައްކަތްތައް ކުރުމަށް މަޝްވަރާކޮށްފަ އެވެ.

ސީބީޑީ ކޮންފަރެންސްގައި ބޭއްވި ބައްދަލުވުންތަކުގައި، ދިރޭތަކެތީގެ ނަސްލު ހިމާޔަތްކުރަން ހާއްސަ ފަންޑެއް އެ މުއާހަދާގެ ދަށުން ގާއިމްކޮށް، ދެމެހެއްޓެނިވި ގޮތެއްގައި އެ މުއާހަދާ އާއި މުއާހަދާގެ ފްރޭމްވާކް ތަންފީޒުކުރެވޭނެ ނިޒާމެއް އެކުލަވާލުމަށް ރާއްޖެއިން ވަކާލާތުކޮށްފައިވާ ކަމަށް މިނިސްޓްރީން ބުންޏެވެ.

"މިފަދަ ފަންޑަކުން ދިރޭތަކެތީގެ ނަސްލުތަކާއި މާހައުލުތައް ހިމާޔަތްކުރަން، އަދި މުއާހަދާ ތަންފީޒުކުރުން ވަރުގަދަ ކުރުމަށް ބޭނުންވާ ފައިސާގެ އެހީ އަދި ވަސީލަތްތައް ހޯދުމަށް ރާއްޖެ ފަދަ ތަރައްގީވަމުން އަންނަ ކުދި ޖަޒީރާ ގައުމުތަކަށް މަގުފަހިވާނެ އެވެ،" މިނިސްޓްރީން ނެރުނު ނޫސްބަޔާނެއްގައި ބުންޏެވެ.

މިނިސްޓްރީން ބުނި ގޮތުގައި، އެ ކޮންފަރެންސްގައި ކޮށްފައިވާ މަޝްވަރާތަކުގެ ނަތީޖާއެއްގެ ގޮތުން ވަނީ ތިމާވެށީގެ ގޮތުންނާއި ދިރޭތަކެތީގެ ގޮތުން ހާއްސަ ސަރަހައްދުތައް (އިކޮލޮޖިކަލީ އެންޑް ބައޮލޮޖިކަލީ ސިގްނިފިގަންޓް އޭރިއާސް – އެބްސާ) ކަނޑައަޅައި ތަންފީޒުކުރާނޭ ގޮތްތަކަށް ވެސް މެމްބަރު ގައުމުތަކުގެ މެދުގައި އެއްބަސްވުމަކަށް އާދެވިފަ އެވެ.

އެ އެއްބަސްވުމަށް އާދެވުނީ މިދިޔަ 8 އަހަރު ދުވަހުގެ ތެރޭގައި ގައުމުތަކުގެ މެދުގައި ކޮށްފައިވާ މަޝްވަރާތަކުގެ އަލީގަ އެވެ.

ރާއްޖެއިން މިހާރު ވެސް ވަނީ އެބްސާގެ ގޮތުގައި ދެ ސަރަހައްދެއް ކަނޑައަޅައިފަ އެވެ. އެއީ ބ. އަތޮޅާއި އއ. އަތޮޅުގެ މަޑިވަރު ސަރަހައްދެވެ.

ކޮންވެންޝަން އޮން ބަޔޮލޮޖިކަލް ޑައިވާސިޓީ (ސީބީޑީ) އަކީ ރިއޯ މުއާހަދާތަކުގެ ތެރެއިން އެއް މުއާހަދާ އެވެ. އެ މުއާހަދާގެ ކޮންފަރެންސް އޮފް ދަ ޕާޓީސް ނުވަތަ މެމްބަރު ގައުމުތައް ބައްދަލުކުރަނީ ކޮންމެ ދެ އަހަރަކުން އެއް އަހަރެވެ. އެ މުއާހަދާއަކީ ދިރޭތަކެތީގެ ނަސްލުތައް ރައްކާތެރިކޮށް ހިމާޔަތްކުރުމުގެ މަގުސަދުގައި އެކުލަވާލާފައިވާ މުއާހަދާއެކެވެ.

އެ ކޮންފަރެންސްގައި އެ މުއާހަދާ ތަންފީޒުކުރަމުން އަންނަ ގޮތް ރިވިއުކޮށް، ބައިނަލްއަގުވާމީ ގޮތުން ދިރޭތަކެތީގެ ނަސްލުތައް ހިމާޔަތްކުރުމަށް ކުރަން ޖެހޭ ކަންކަމާ ގުޅޭ ގޮތުން މަޝްވަރާކުރެ އެވެ. އަދި ދިރޭތަކެތީގެ ނަސްލުތައް ހިމާޔަތްކުރުމަށް ކުރާ މަސައްކަތްތައް މޮނިޓާކުރާނެ ނިޒާމަކާއި ދިރޭތަކެތީގެ ނަސްލުތައް ހިމާޔަތްކުރުމަށް ކުރާ ހޭދަ އިތުރު ކުރުމަށް މަޝްވަރާކުރެ އެވެ.