"ސައުތު އަރި މެރިން ޕާކް" ބަލަހައްޓާ އެޑްވައިޒަރީ ކޮމިޓީއަށް ކުރިމަތިލާން ހުޅުވާލައިފި

"ސައުތު އަރި މެރިން ޕާކު"ގެ ގޮތުގައި ސަރުކާރުން ކަނޑައަޅާފައިވާ، އދ. އަތޮޅުން ފެހުރިހި ފެންނަ ސަރަހައްދު ރައްކާތެރިކޮށް ބެލެހެއްޓުމާ ބެހޭ އެޑްވައިޒަރީ ކޮމިޓީގެ މެންބަރުކަމަށް ކުރިމަތިލުމުގެ ފުރުސަތު މިއަދު ހުޅުވާލައިފި އެވެ.

ސައުތު އަރި މެރިން ޕާކަކީ ތިމާވެށީގެ ގާނޫނުގެ ދަށުން ހިމާޔަތްކޮށްފައިވާ، އދ. ރަންގަލީ ފަރުގެ ހުޅަނގު އުތުރު ކަނުން ފެށިގެން، އެ އަތޮޅު ދިގުރަށު ފަރުގެ އުތުރު ކަނާ ދޭތެރޭގައިވާ ރަށްތަކުގެ ފަރުގެ ބޭރު ތޮށިން ފެށިގެން އެއް ކިލޯމީޓަރުގެ ސަރަހައްދެވެ.

ގުދުރަތީ ވަސީލަތްތަކާއި ދިރުންތަކުގެ މުއްސަނދި ކަމުގެ ސަބަބުން އެ ސަރަހައްދަކީ ދުނިޔޭގެ ފެންވަރުގައި މުޅި އަހަރު ތެރޭގައި އެންމެ ގިނައިން ފެހުރިހި ފެންނަ އެއް ސަރަހައްދެވެ. އެ ސަރަހައްދަކީ "ސައުތު އަރި މެރިން ޕާކް" ކަމުގައި ހަމަޖައްސައި، ސަރުކާރުން އެކަން އިއުލާންކުރީ ޖުލައި 11، 2019 ގަ އެވެ.

ތިމާވެއްޓާ ބެހޭ މިނިސްޓްރީން ކުރި އިއުލާނުގައި ބުނީ އެ ކޮމިޓީއަށް ފަސް މެމްބަރުން ނަގަން ނިންމާފައިވާ ކަމަށެވެ. އެއީ؛

• ރިސޯޓްތަކުގެ ފަރާތުން މެމްބަރެއް

• ގެސްޓް ހައުސް ނުވަތަ ޑައިވް ސެންޓަރުތަކުގެ ފަރާތުން މެމްބަރެއް

• މި ސަރަހައްދުގައި ހަރަކާތްތެރިވާ އަމިއްލަ ޖަމިއްޔާތަކުގެ ފަރާތުން މެމްބަރެއް

• މަސްވެރިކަމުގެ ދާއިރާގެ ފަރާތުން މެމްބަރެއް

• ލިވްއެބޯޑް ދާއިރާގެ ފަރާތުން މެމްބަރެއް

އެ ކޮމިޓީގެ މަސްއޫލިއްޔަތުތަކީ ސައުތު އަރި މެރިން ޕާކް ސަރަހައްދު ބެލެހެއްޓުމާ ބެހޭ ކަންކަމުގައި ލަފާދިނުމާއި ދިމާވާ މައްސަލަތައް ހައްލުކުރުމަށް ލަފާދިނުމާއި އެ ސަރަހައްދުގައި ބާއްވާ ހާއްސަ އިވެންޓްތަކުގެ ކަންކަމުގައި ލަފާދިނުމުގެ އިތުރުން އެ ސަރަހައްދު ބޭނުންކުރާ ފަރާތްތަކުން ފީއެއް ނަގާ ނަމަ، އެކަމަށް ލަފާ ދިނުމެވެ.

މި މަސައްކަތަށް އެއްވެސް އުޖޫރައެއް ނޯންނާނެ އެވެ.

އެ ކޮމިޓީގެ މެމްބަރު ކަމަށް ކުރިމަތިލުމުގެ ފުރުސަތު މި މަހުގެ ނުވަ ވަނަ ދުވަހާ ހަމައަށް ވަނީ ހުޅުވާލައިފަ އެވެ.

ރާއްޖޭގައި ފެހުރިހި ހިމާޔަތްކުރުމާއި އޭގެ މާހައުލު ރައްކާތެރިކުރުމާ ގުޅޭ އާ އުސޫލެއް ވެސް ސަރުކާރުން ވަނީ މި އަހަރު ހަދައިފަ އެވެ. ތިމާވެއްޓާ ބެހޭ މިނިސްޓްރީން އެ އުސޫލު އިފްތިތާހުކޮށް، އާންމުކުރީ ދުނިޔޭގެ ފެހުރިހީގެ ދުވަސް ފާހަގަކުރުމަށް މިދިޔަ އޮގަސްޓް މަހުގެ 30 ގައި އދ. ދިގުރަށުގައި ބޭއްވި ހާއްސަ ރަސްމިއްޔާތެއްގަ އެވެ.