ހިމާޔަތްކޮށްފައިވާ 93 ސަރަހައްދުގެ ތެރެއިން ބެލެހެއްޓެނީ އެންމެ ފަސް ތަނެއް!

ރާއްޖޭގެ 93 ސަރަހައްދެއް ހިމާޔަތްކޮށްފައިވާއިރު، އޭގެ ތެރެއިން ރަނގަޅަށް މެނޭޖުކުރެވެނީ ނުވަތަ ބެލެހެއްޓެނީ އެންމެ ފަސް ސަރަހައްދު ކަމަށް ތިމާވެއްޓާ ބެހޭ މިނިސްޓަރު ތޯރިގް އިބްރާހިމް މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހަށް ހާޒިރުވެވަޑައިގެން މެމްބަރުންގެ ސުވާލުތަކަށް ދެއްވި ޖަވާބުގައި ތޯރިގް ވިދާޅުވީ މި ސަރުކާރުގެ އަމާޒަކީ އަދިވެސް ވީހާވެސް ގިނަ ސަރަހައްދުތައް ހިމާޔަތްކޮށް، ބެލެހެއްޓޭނެ ގޮތެއް ހެދުން ކަމަށެވެ. އެކަމަށްޓަކައި އެ ސަރަހައްދުތަކުގެ މެނޭޖުމަންމަންޓް ޕްލޭން ހެދުމުގެ މަސައްކަތް މި ސަރުކާރު ކުރާނެ ކަމަށް އޭނާ ވިދާޅުވި އެވެ.

"މިހާރު މި އޮތް [ހިމާޔަތްކޮށްފައިވާ] ފަސް ތަނުގެ އިތުރަށް އަޅުގަނޑުމެން މި ދަނީ ވީހާވެސް ގިނަ ތަނެއް މެނޭޖްކޮށް، އެއީ ނަފާ ލިބޭނެ ތަންތަނަށް ހަދަން،" އޭނާ ވިދާޅުވި އެވެ.

"އެގޮތުން އަޅުގަނޑުމެން މިހާރު ވެސް، މި ވަގުތު ވެސް ޓްރެއިނިންނާއި، އަދި އެ ކަމަށް ފައިސާ ހޯދުމުގެ މަސައްކަތްތަކެއް ވެސް އެބަކުރެވޭ. އެކަމަށް ބޭނުންވާ ފައިސާ ލިބެމުން ވެސް ދޭ."

ރައީސް އޮފީހުގައި މިދިޔަ ބުރާސްފަތި ދުވަހު ބޭއްވި ޕްރެސް ކޮންފަރެންސެއްގައި ވެސް ތޯރިގް ވަނީ މި ވާހަކަ ދައްކަވައިފަ އެވެ.

އެ ދުވަހު ތޯރިގް ވިދާޅުވި ގޮތުގައި، ރައީސް ޑރ. މުހައްމަދުގެ ވައުދާ އެއްގޮތަށް ކޮންމެ އަތޮޅެއްގައި ވެސް ނޭޗާ ޕާކެއް ހެދުމަށް ހުޅުވާލި ފުރުސަތުގައި ގިނަ ޕްރޮޕޯސަލްތަކެއް ވަނީ ލިބިފަ އެވެ. އެ ޕްރޮޕޯސަލްތައް ރިވިއުކޮށް، އަންނަ އަހަރު އަމަލީ މަސައްކަތް ފަށާނެ އެވެ. އަދި މިހާރު ހުރި ނޭޗާ ޕާކުތައް މަރާމާތުކުރުމުގެ މަސައްކަތް ވެސް މިހާރު ވަނީ ފަށައިފަ އެވެ.

ރަނގަޅަށް މެނޭޖުކުރާ ސަރަހައްދުތައް

- ބ. އަތޮޅު ހަނިފަރު ބޭގެ ސަރަހައްދު

- ބ. އޮޅުގިރި ސަރަހައްދު

- ބ. މެންދޫ ސަރަހައްދު

- ފުވައްމުލަކު ދަނޑިމަގު ކިޅި

- އައްޑޫ އީދިގަލި ކިޅި އާއި ކޯއްޓޭ ސަރަހައްދު

ބ. އަތޮޅުގެ ސަރަހައްދުތައް ބަލަހައްޓަނީ ބ. އަތޮޅު ބަޔޮސްފިޔާ އޮފީހުންނެވެ.

ދަނޑިމަގު ކިޅި ބަލަހައްޓަނީ ފުވައްމުލަކު ސިޓީ ކައުންސިލުންނެވެ. އަދި އީދިގަލި ކިޅި އާއި ކޯއްޓޭ ސަރަހައްދު ބަލަހައްޓަނީ އައްޑޫ ސިޓީ ކައުންސިލުންނެވެ. އެ ދެ ސަރަހައްދުގައި ވެސް އޮންނަނީ ނޭޗާ ޕާކެއް ހަދައިފަ އެވެ.

ރާއްޖޭގައި ހިމާޔަތްކޮށްފައިވާ ސަރަހައްދުތަކުގެ ޖުމްލަ ބޮޑުމިނުގައި 64،095.2 ހެކްޓަރު ހުރެ އެވެ. އެއީ، މެނޭޖުކުރަން ބަލާއިރު ވަރަށް ބޮޑު މަސައްކަތެއް ކަމަށް ސަރުކާރުން ބުނެ އެވެ.

ރާއްޖޭގެ މި ވަގުތު ތިން ބަޔޮސްފިއާ ރިޒާވް ވެސް އެބައޮތެވެ. އެއީ، ރާއްޖޭގެ ފުރަތަމަ ބަޔޮސްފިއާ ރިޒާވްގެ ގޮތުގައި ކަނޑައެޅި ބ. އަތޮޅުގެ އިތުރުން އައްޑު އާއި ފުވައްމުލަކެވެ. ސަރުކާރުން މިހާރު ވަނީ ޅ. އަތޮޅު ވެސް ބަޔޮސްފިޔާ ރިޒާވަކަށް ހަދަން ނިންމައިފަ އެވެ.