ބަޔޮސްފިއާ ރިޒާވްއަކަށް ޅ. އަތޮޅު ހަދަނީ

ބަޔޮސްފިއާ ރިޒާވްއަކަށް ޅ. އަތޮޅު ހެދުމުގެ މަސައްކަތް ސަރުކާރުން ފަށައިފި އެވެ.

ރައީސް އޮފީހުން މިއަދު ބޭއްވި ޕްރެސް ކޮންފަރެންސްގައި ތިމާވެއްޓާ ބެހޭ މިނިސްޓަރު ތޯރިގް އިބްރާހިމް ވިދާޅުވީ ރައީސް ޑރ. މުހައްމަދު މުއިއްޒުގެ ވައުދާ އެއްގޮތަށް މި ފަސް އަހަރުގެ ތެރޭގައި ރާއްޖޭގެ އިތުރު ތިން ސަރަހައްދެއް ބަޔޮސްފިއާ ރިޒާވްއަކަށް ހެދުމުގެ މަސައްކަތް ކުރަމުން އަންނަ ކަމަށެވެ. އޭގެ ތެރެއިން އެންމެ ފުރަތަމަ ކަނޑައަޅާ ސަރަހައްދަކީ ޅ. އަތޮޅު ކަމަށް އޭނާ ވިދާޅުވި އެވެ.

ތޯރިގް ވިދާޅުވީ ބަޔޮސްފިއާ ރިޒާވްއަކަށް ވާން ބޭނުންވާ އަތޮޅުތަކަށް ޝައުގުވެރިކަން ފާޅުކުރުމުގެ ފުރުސަތު ހުޅުވައިލުމުން އެކަމަށް ޝައުގުވެރިކަން މިހާތަނަށް ފާޅުކުރީ ޅ. އަތޮޅު ކައުންސިލުން އެކަނި ކަމަށެވެ.

"އެ ބޭފުޅުންގެ [ޅ. އަތޮޅު ކައުންސިލްގެ] ޕްރޮޕޯސަލް އަޅުގަނޑުމެން މިހާރު ވަނީ އިވެލުއޭޓްކޮށް، ބަޔޮސްފިއާ ރިޒާވް ހެދޭނެކަން އެ ބޭފުޅުންނަށް އަންގާފައި،" ތޯރިގް ވިދާޅުވި އެވެ.

ޅ. އަތޮޅު ބަޔޮސްފިއާ ރިޒާވްއަކަށް ހެދުމަށް ބޭނުންވާ މާލީ އެހީތެރިކަން، ޔޫއެންޑީޕީން ހިންގާ ގްލޯބަލް އެންވަޔަރަމަންޓް ފެސިލިޓީން (ޖެފް) އިން މިހާރު ހަމަޖައްސާދީފައިވާ ކަމަށާއި އެ ޕްރޮޖެކްޓުގެ މަސައްކަތް ވަރަށް އަވަހަށް ފެށޭނެ ކަމަށް ވެސް އޭނާ ވިދާޅުވި އެވެ.

ޖުމްލަ 54 ރަށް ހިމެނޭ ޅ. އަތޮޅުގެ ހަ ސަރަހައްދެއް އޮންނަނީ ތިމާވެށީގެ ގާނޫނުގެ ދަށުން ހިމާޔަތްކޮށްފަ އެވެ. އޭގެ ތެރޭގައި ފަޅުރަށްތަކާއި ފަރުތަކާއި ތިލަތަކާއި އަދި ފިނޮޅުތައް ހިމެނެ އެވެ.

ބަޔޮސްފިއާ ރިޒާވް އަކީ ކޮބާ؟

ޔުނައިޓެޑް ނޭޝަންސް އެޑިއުކޭޝަން، ސައިންސް އެންޑް ކަލްޗަރަލް އޯގަނައިޒޭޝަން (ޔުނެސްކޯ) އިން ކަނޑައަޅާ ބަޔޮސްފިއާ ރިޒާވްތަކަކީ ތިމާވެއްޓަށް ދިމާވެފައިވާ މައްސަލަތަކަށް ހައްލު ހޯދުމަށާއި ބަޔޯޑައިވާސިޓީ ދެމެހެއްޓެނިވި ގޮތެއްގައި ދަމަހައްޓަން ކަނޑައަޅާ ކަނޑު އަދި ބިމުގެ އީކޯސިސްޓަމްތަކެވެ. އެ ތަންތަން ބަޔޮސްފިއާ ރިޒާވެއް ގޮތުގައި ކަނޑައަޅާނީ އެ ތަނުގައި އެކަށީގެންވާ ޝަރުތުތައް ފުރިހަމަ ވެއްޖެ ނަމަ އެވެ.

ތަނެއް ބަޔޮސްފިއާ ރިޒާވެއްގެ ގޮތުގައި ހަދަން ބޭނުންވެއްޖެ ނަމަ، އެކަން ހުށަހަޅާނީ އެ ގައުމެއްގެ ސަރުކާރަކުންނެވެ. ބަޔޮސްފިއާއެއްގެ ގޮތުގައި ކަނޑައެޅުމަށް ފަހު ވެސް އެ ތަންތައް ބަލަހައްޓާނީ އެ ގައުމެއްގެ މައި ސަރުކާރު ނުވަތަ ސްޓޭޓަކުންނެވެ.

މީގެ 79 އަހަރު ކުރިން އުފެއްދި ޔުނެސްކޯ އިން "ބަޔޮސްފިއާ ކޮންފަރެންސް"އެއް އެންމެ ފުރަތަމަ ބޭއްވީ 1968 ގަ އެވެ. ބަޔޮސްފިއާ ރިޒާވްގެ ކޮންސެޕްޓް އުފެދުނީ އެ ހިސާބުންނެވެ. އެއީ ގުދުރަތީ ވަސީލަތްތައް ދަމަހައްޓާނެ ގޮތްތައް ބަލައި، މަޝްވަރާކުރަން ބޭއްވި މި ކަހަލަ ފުރަތަމަ ބައިނަލްއަގުވާމީ ކޮންފަރެންސެވެ.

ރާއްޖޭގެ މި ވަގުތު ތިން ބަޔޮސްފިއާ ރިޒާވް އޮވެ އެވެ. އެއީ، ރާއްޖޭގެ ފުރަތަމަ ބަޔޮސްފިއާ ރިޒާވްގެ ގޮތުގައި ކަނޑައެޅި ބ. އަތޮޅުގެ އިތުރުން އައްޑު އާއި ފުވައްމުލަކެވެ.