މި އަހަރު އޭލެވެލް ކިޔަވަން ފެށި ދަރިވަރުންގެ އަދަދު 70 ޕަސެންޓު އިތުރު ވެއްޖެ: މިނިސްޓަރު

އެހެން އަހަރުތަކާ އަޅާ ބަލާއިރު މި އަހަރު އޭލެވެލް ކިޔަވަން ފެށި ކުދިންގެ އަދަދު 70 ޕަސެންޓު އިތުރު ވެފައިވާ ކަމަށް އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.

އޭލެވެލަށް ކިޔަވާ ކުދިންގެ އަދަދު މަދުކަމުގެ ކަންބޮޑުވުން މީގެ ކުރިން ވެސް ތައުލީމީ ދާއިރާގެ ބޭފުޅުން ފާޅުކުރައްވަ އެވެ.

މާލޭގެ ސީއެޗްއެސްއީގައި މިއަދު ފެށި "ހަތްވަނަ އިންޓަނޭޝަނަލް ޓީޗާސް ކޮންފަރެންސް" ފެށުމުގެ ރަސްމިއްޔާތުގައި މިނިސްޓަރު ވިދާޅުވީ، ތައުލީމީ ދާއިރާ ހަރުދާނާކޮށް، މަތީ ތައުލީމާ ގުޅޭ ކުދިންގެ ނިސްބަތް އިތުރުކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނަކަމަށެވެ.

ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން އެޑިއުކޭޝަން މިނިސްޓްރީން ކުރި މަސައްކަތުގެ ނަތީޖާ ވަރަށް ރަނގަޅުކަން ފާހަގަ ކުރައްވައި މިނިސްޓަރު ވިދާޅުވީ ކުރީ އަހަރަށް ވުރެ މި އަހަރު އޭލެވެލަށް ކިޔަވަން ފެށި ކުދިންގެ ނިސްބަތް 70 ޕަސެންޓަށް އިތުރު ވެފައިވާ ކަމަށެވެ.

އެ މަސައްކަތުގެ ނަތީޖާއަކަށް ވާނީ ޔުނިވާސިޓީގެ ކިޔެވުމާ ގުޅޭ ކުދިންގެ އަދަދު އިތުރުވެ، ތައުލީމީ ނިޒާމު ހަރުދަނާވެ، ގައުމީ އުފެންދުންތެރިކަމަށް ބޭނުންވާ ޒުވާނުންގެ އައު ޖީލެއް ޔުނިވާސިޓީތަކުގެ ތެރެއިން ނުކުމެގެން އައުން ކަމަށް ވެސް މިނިސްޓަރު ވިދާޅުވި އެވެ.

"ސަރުކާރުގެ ސްކޫލުތަކުގައި މިދިޔަ އަހަރު، 2023 ވަނަ އަހަރަށް ވުރެ 2024 ވަނަ އަހަރު ގްރޭޑް 11 އަށް ވަން ދަރިވަރުންގެ އަދަދު 70 އިންސައްތަ އަށް މި ވަނީ އިތުރު ކުރެވިފައި،" އިސްމާއިލް ވިދާޅުވި އެވެ.

އޭލެވެލް ކިޔަވާ ދަރިވަރުންގެ އަދަދު އިތުރު ކުރުމަށް ސަރުކާރުން ވަނީ ގިނަ ކަންތައްތަކެއް މިހާރު ވެސް ކޮށްފަ އެވެ. މާލޭގައި ޒަމާންވަންދެން ހިންގި އޭ ލެވެލް ސްކޫލް، ސީއެޗްއެސްއީ އިމާރާތް އަލުން ހުޅުވައި ވަނީ ކިޔަވައިދޭން ފަށައިފަ އެވެ. އޭ ލެވެލް އިތުރު 23 ސްކޫލެއްގައި ފަށަން ނިންމައި އެއް މާއްދާ އިން ފާސްވިޔަސް ކިޔަވަން ފުރުސަތު ދޭން ރައީސް ވަނީ ނިންމައިފަ އެވެ.