ބިނާވެށި ޕްލޭންގެ ބިލާއި ލާ މަރުކަޒީ ގާނޫނަށް އިސްލާހު ގެނައުމުގެ ބިލް ތަސްދީގު ކުރައްވައިފި

ބިނާވެށި ޕްލޭން ކުރުމާއި ހިންގުމުގެ ބިލާއި އިދާރީ ދާއިރާތައް ލާ މަރުކަޒީ އުސޫލު ހިންގުމުގެ ގާނޫނަށް އިސްލާހު ގެނައުމުގެ ބިލް ރައީސް ޑރ. މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.

ބިނާވެށި ޕްލޭން ކުރުމުގެ ބިލް ރައްޔިތުންގެ މަޖިލީހުން ފާސް ކޮށްފައިވަނީ މިދިޔަ މަހުގެ 22 ވަނަ ދުވަހު އެވެ. މި ބިލަށް އިދިކޮޅު އެމްޑީޕީގެ އެއްވެސް މެންބަރަކު ވޯޓު ދެއްވާފައެއް ނުވެ އެވެ.

ބިލްގައިވާ ގޮތުން ބިނާވެށި ޕްލޭން ކުރުމާއި ހިންގުމާ ބެހޭ ގައުމީ ސިޔާސަތު ކަނޑައަޅާނީ ވަޒީރުންގެ މަޖިލީހުގެ ލަފާގެ މަތިން ރައީސެވެ. އަދި އެ ގާނޫނު ތަންފީޒު ކުރުމުގެ އިސް ޒިންމާ އަދާކުރާނީ ޕްލޭނިން މިނިސްޓަރު ކަމަށް އެ ބިލްގައިވެ އެވެ.

ބިނާވެށި ޕްލޭން ކުރުމުގެ ބިލްގެ މަގުސަދަކީ:

- އިގުތިސޯދީ ގޮތުންނާއި އިޖުތިމާއީ ގޮތުން އަދި ތިމާވެށީގެ ގޮތުން އެކަށީގެންވާ ގޮތެއްގައި ބިން ތަރައްގީކޮށް ބެލެހެއްޓޭނެ ފަދައިން ބިނާވެށި ޕްލޭން ކުރަން މަގުފަހިކުރުން.

- ދެމެހެއްޓެނެވި ގޮތެއްގައި ބިމުގެ ބޭނުން ހިފޭނެ ގޮތަކަށް އަދި ހެޔޮ ގޮތުގައި ބިން ބޭނުން ކުރުމަށް މަގުފަހިވާނެ އުސޫލަކުން ބިނާވެށި ޕްލޭން ކުރުމުގެ އުސޫލުތައް ކަނޑައެޅުން

- އިދާރީ ދާއިރާތައް ލާމަރުކަޒީ އުސޫލުން ތަރައްގީ ކުރުމަށް މަގުފަހިވާނެ ގޮތަކަށް ބިނާވެށި ޕްލޭންކޮށް ހިންގުމާ ގުޅޭ އުސޫލުތައް ކަނޑައެޅުން

- ބިނާވެށި ޕްލޭންކޮށް ތަަރައްގީ ކުރުމުގެ މަރުހަލާތަކުގައި ރައްޔިތުންގެ ބައިވެރިވުން އިތުރުކުރަން މަގުފަހިކުރުން. ލާ މަރުކަޒީ ގާނޫނަށް އިސްލާހު ގެނައުމުގެ ބިލަކީ ރަށްރަށުގެ ތަރައްގީ އާއި ބިންތައް ބޭނުން ކުރުމާބެހޭ ޕްލޭންތައް އެކުލަވާލުމާ ބެހޭ އުސޫލުތައް ހިމަނާފައިވާ ބިލެކެވެ.

ބިނާވެށި ޕްލޭން ކުރުމާއި ހިންގުމުގެ ބިލަށް އިދިކޮޅު އެމްޑީޕީއިން ވަރަށް ބޮޑަށް ފާޑުކިޔައިފައިވެ އެވެ. އަދި އެ ބިލުގެ ސަބަބުން ލާ މަރުކަޒީ އުސޫލާ ހިލާފަށް، ރައްޔިތުންގެ ބައިވެރިވުމެއް ނެތި ރަށްރަށުގެ ބިން ޕްލޭންކުރަން ސަރުކާރަށް ފުރުސަތު ލިބިގެންދާނެ ކަމަށް އެ ޕާޓީން ކުރިން ބުނެފައިވެ އެވެ.