އަމިއްލައަށް މަރުވެގެން ހަމަލާދިނުން ފެށުނީ ކަމުގެ އިންޒާރު އިޒްރޭލަށް ދީފި

އިޒްރޭލުގެ ވިޔަފާރީގެ މަރުކަޒު، ތެލް އަވީވްގައި އާދީއްތަ ދުވަހު ދިން ހަމަލާ އަކީ އަމިއްލައަށް މަރުވެގެން ދިން ހަމަލާއެއް ކަމަށާއި ޣައްޒާގައި އިޒްރޭލުން ހަމަލާދިނުން ކުރިއަށް ގެންދާ ނަމަ އަމިއްލައަށް މަރުވެގެން ހަމަލާ ދިނުމުގެ އޮޕަރޭޝަން އަދިވެސް ދާނީ ކުރިއަށް ކަމަށް ހަމާސް އާއި އިސްލާމިކް ޖިހާދުން އިއްޔެ ބުނެފި އެވެ.

އިޒްރޭލުން ވެސް ވަނީ މިއީ ދަބަހެއް އަޅައިގެން ހުރި މީހަކު ދިން ހަމަލާއެއް ކަމަށް ބުނެފަ އެވެ. ހަމަލާގައި އެކަކު މަރުވި ކަމަށް ކުރިން މީޑިއާތަކުގައި ރިޕޯޓްކުރި ނަމަވެސް ފަހުން ބުނެފައިވަނީ މަރުވީ ހަމަލާ ދިން މީހާ އެކަނި ކަމަށެވެ.

ޣައްޒާގައި އިޒްރޭލާ ދެކޮޅަށް ހަނގުރާމަކުރާ ހަމާސް އާއި އިސްލާމިކް ޖިހާދުން ބުނީ އެއީ މީހަކު އަމިއްލައަށް މަރުވެގެން ދިން ހަމަލާއެއް ކަމަށެވެ.

އެކަމަކު އިޒްރޭލުގެ ޑިފެންސް މިނިސްޓްރީން ބުނީ ހަމަލާ ނާކާމިޔާބުކޮށްލެވިފައިވާ ކަމަށެވެ.

"ގޮވާތަކެތި އަޅާފައި ހުރި ދަބަހެއް އަޅުވައިގެން ހުރި ފަލަސްތީނު މީހަކު ... މީހުން ގިނަ ތަނަކަށް ގޮސް ގޮއްވާލަން އުޅެނިކޮށް [ހުއްޓުވީ]،" ޑިފެންސް މިނިސްޓްރީގެ ތަރުޖަމާނު ޑޭވިޑް މެންސާ ބުންޏެވެ.

ހަމާސް އާއި އިސްލާމިކް ޖިހާދުން ބުނީ ޣައްޒާގައި ހަމަލާތައް ކުރިއަށްދާހާ ހިނދަކު މިފަދަ އިތުރު ހަމަލާތައް އިޒްރޭލަށް ދެމުން ގެންދާނެ ކަމަށެވެ.

ތެލް އަވީވްގައި ހަމަލާދީފައި ވަނީ މީގެ 10 މަސް ކުރިން އިޒްރޭލުން ޣައްޒާއަށް ދޭން ފެށި ހަމަލާތައް ހުއްޓުމަކަށް ގެނައުމާ ގުޅޭ ގޮތުން އިޒްރޭލާއި ހަމާސްއާ ދެމެދު ބާއްވާ މަޝްވަރާތަކާ ގުޅޭ ބައްދަލުވުމަކަށް އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން އިޒްރޭލަށް ވަޑައިގެންތާ އިރުކޮޅެއް ފަހުންނެވެ. -- އޭއެފްޕީ