ހަމަލާތައް ހުއްޓާލާ ހުށަހެޅުމެއް ހަމާސް އެއްބަސްވުމުން އިޒްރޭލުން ބުނަނީ ހުރިހާ އަސީރުން ދޫކޮށްލާށޭ

ފަލަސްތީނުގެ ޣައްޒާގައި ދެމުން ގެންދާ ހަމަލާތައް ހުއްޓުމަކަށް ގެނައުމުގެ އެއްބަސްވުމެއް ގާއިމުކުރުމުގެ ގޮތުން ހުށަހަޅާފައިވާ ކަންކަމަށް ހަމާސް އިން އެއްބަސްވުމާ އެކު، ހުރިހާ އަސީރުން މިނިވަންކުރާ އެއްބަސްވުމެއް ނޫނީ ބޭނުން ނުވާ ކަމަށް އިޒްރޭލުން ބުނެފި އެވެ.

ހަމާސް އަށް ގަތަރާއި މިސްރުން ހުށަހެޅި ކަންކަމަށް އެ ޖަމާއަތުން އެއްބަސްވުމާ އެކު އެ ހުށަހެޅުން ވަނީ އިޒްރޭލަށް ވެސް ދީފަ އެވެ. އިޒްރޭލުން އެ ހުށަހެޅުމަށް ރަސްމީ ޖަވާބެއް އަދި ނުދިން ނަމަވެސް އިޒްރޭލު ސަރުކާރުގެ އިސް އޮފިޝަލަކު އޭއެފްޕީއަށް ބުނީ އިޒްރޭލުގެ ސްޓޭންޑް ބަދަލު ނުވާ ކަމަށާއި ކުރިމަގުގައި ކޮންމެ އެއްބަސްވުމެއް ހެދި ނަމަވެސް އެއީ ފަލަސްތީނުގެ ޖަމާއަތްތަކުން އަސީރުކޮށްފައިވާ އިޒްރޭލު އެންމެން މިނިވަންވާނެ އެއްބަސްވުމަކަށް ވާންޖެހޭނެ ކަމަށެވެ.

މެދުވެރިންގެ ގޮތުގައި މަސައްކަތްކުރާ ގަތަރާއި މިސްރުން އިޒްރޭލުގެ ޖަވާބަކަށް އިންތިޒާރުކުރަމުން އަންނައިރު ގަތަރުން ބުނެފައިވަނީ ހަމަލާތައް މެދުކަނޑާލުމުގެ ހުށަހެޅުން ކާމިޔާބުވާނެ ކަމުގެ ކޮންމެވެސް ވަރެއްގެ އުންމީދެއް އެބަ އޮތް ކަމަށެވެ. ގަތަރުން ބުނި ގޮތުގައި ހަމާސް އިން އެއްބަސްވި ހުށަހެޅުމަކީ މީގެ ކުރިން އިޒްރޭލުން އެއްބަސްވި ހުށަހެޅުމާ ގާތްގަނޑަކަށް ހަމަ އެކައްޗެއް ކަމަށެވެ.

މީގެ 22 މަސް ދުވަސްކުރިން ފެށިގެން ޣައްޒާއަށް ހަމަލާ ދެމުން ގެންދާއިރު މެދުވެރިންގެ މަސައްކަތުން ދެ ފަހަރެއްގެ މަތިން ވަނީ ހަމަލާތައް މެދުކަނޑާލައިފަ އެވެ. އެއިން ކޮންމެ ފަހަރަކު ވެސް އިޒްރޭލުގެ ޖަލުތަކުން ގިނަ އަދަދެއްގެ ފަލަސްތީނު މީހުން މިނިވަންކޮށްފައި ވާއިރު ހަމާސް އިން އަސީރުކޮށްފައިވާ އިޒްރޭލު ބައެއް މީހުން ވެސް ދޫކޮށްލާފައިވެ އެވެ.

ނަމަވެސް މިއިން އެއްވެސް އެއްބަސްވުމަކުން، ދާއިމީ ގޮތެއްގައި ހަމަލާތައް ހުއްޓުމަކަށް ގެނެވޭނެ ގޮތެއް ނުވެ ވަނީ ނާކާމިޔާބުވެފަ އެވެ.

ހަމަލާތައް ދިގުލައި ޣައްޒާގެ ހިސާރު ވެސް އިޒްރޭލުން ވަރުގަދަކުރުމާ އެކު ޣައްޒާ މިހާރު އޮތީ ބަނޑަށްޖެހިފަ އެވެ. ހަމަލާތަކުގައި މިހާތަނަށް ޝަހީދުވި ފަލަސްތީނު މީހުންގެ އަދަދު ވެސް ވަނީ 61،000 އިން މަތިވެފަ އެވެ.