ޝިފާނާއާ އެކު "މިހާރު" ބަދިގެ: ޅޮސްފަތު ރިހަ

ޅޮސް ފަތަކީ އިހު ދިވެހިން ކެއުމުގައި އާންމުކޮށް ބޭނުންކުރި ފަތެކެވެ. ޅޮސް ފަތް އެކި ގޮތްގޮތަށް ބޭނުން ކުރާއިރު އާންމުކޮށް ކައި އުޅެނީ ރިހަ ކައްކައިގެންނެވެ. ޅޮސްފަތު ރިހަ ކައްކަނީ މަސްރިހަ ހަވާދުގަ އެވެ.

ފިޓްނަސް ދާއިރާގައި ގިނަ ބައެއްގެ މަގްބޫލް ޝިފާނާ މިއަދު ކިޔައިދިނީ ޅޮސް ފަތް ބޭނުންކޮށްގެން "ރިހަ" ތައްޔާރުކުރާނެ ގޮތެވެ.

ޅޮސް ފަތަކީ ވަރަށް ގިނަ ނިއުޓްރިއަންސް އަދި ހަށިގަނޑަށް ފައިދާ ލިއްބައިދޭ ވަރަށް ގިނަ މާއްދާތައް އެކުލެވޭ ފަތެކެވެ. އޭގެ ތެރޭގައި ކެލްސިއަމް، މެގްނީސިއަމް އަދި ޕޮޓޭސިއަމްގެ އިތުރުން ސޯޑިއަމް ވެސް ވަރަށް ގިނަ އަދަދަކަށް އެކުލެވޭ ފަތެކެވެ. އަދި ދަގަނޑުގެ ބަޔާއި ވިޓަމިން، އޭ، ބީ6 ވެސް ހިމެނެ އެވެ.

މެގްނީސިއަމް އަކީ ނަފްސާނީ ދުޅަހެޔޮ ކަމަށް ވަރަށް މުހިންމު ރޯލެއް އަދާކުރާ ވިޓަމިން އެކެވެ.

ހުނި ހަވާދު ހަދަން ބޭނުންވާ ތަކެތި:

1/4 ޖޯޑު ހުނި

1 ފިޔާ

2 ލޮނުމެދު

1/2 ސައި ސަމްސާ ރީނދޫ

1 ސައިސަމްސާ ދިރި

ހިކަނދި ފަތް

4 ހިކިމިރުސް

ހަވާދު ތައްޔާރު ކުރުމަށް ހުރިހާ އެއްޗެއް މިކްސަަރަށް އެޅުމަށްފަހު މުގުރާލާށެވެ.

ރިހަ ކައްކަން ބޭނުންވާ ތަކެތި:

1 ފިޔާ (ކޮށާފައި)

2 ލޮނުމެދު (ކޮށާފައި)

1 ގިތެޔޮ މިރުސް (ކޮށާފައި)

1.5 ކިބަ ވަޅޯމަސް (ކޮށާފައި)

4 މޭޒުމަތީ ސަމްސާ ހުނި ހަވާދު

ތައްޔާރުކުރާނެ ގޮތް:

ޅޮސް ފަތުގެ މެދު ތަނޑި ނެގުމަށް ފަހު ރަނގަޅަށް މަޑުވަންދެން ފެނުކައްކާލާށެވެ. ކެކުމުން ވަކިން ތައްޓަކަށް ނަގާށެވެ. ހިހޫވުމުން ކުދިކޮށް ކޮށާލާށެވެ.

އެއަށްފަހު ތެއްޔަކަށް ތެޔޮ އަލައި، ފިޔާ، ލޮނުމެދު، ހިކަނދިފަތް، ރާނބާފަތް އަދި މިރުސް އަޅައި ފިޔާގަނޑު ރަތްކޮށްލާށެވެ. އޭގެ ތެރެއަށް ފުނޑާފައި ހުރި ހަވާދުކޮޅު އަޅައި ރަނގަޅަށް މީރުކޮށްލާށެވެ.

އެއަށްފަހު ކޮށާފައި ހުރި ވަޅޯމަސްކޮޅު އަޅައި އޭގެ ތެރެއަށް ފެން ކިރު އަޅައި ލޮނުހެޔޮވަރު ކޮށްލުމަށްފަހު ރަނގަޅަށް ކައްކާލާށެވެ. ހަވާދާއެކުވެ ރަނގަޅަށް ކެކުމުން އޭގެ ތެރެއަށް ކުރިން ފެނުކައްކާ، ކޮށި ފަތްކޮޅު އަޅާލާށެވެ.

ފަތްކޮޅު އަޅައި ރަނގަޅަށް އެއްކޮށްލުމަށްފަހު މަޑު ގިނީގާ ކައްކާލާށެވެ. ކެއްކުމަށްފަހު ބޯކިރު އަޅައި ކައްކާލުމަށްފަހު ތެލި ބާލާށެވެ.

ޝިފާނާގެ ހެލްތް ޓިޕްސް

- ފަތްޕިލާވެލި ނުވަތަ ފެހި ކުލައިގެ ހުރިހާ ތަރުކާރީއަކީ ހަށިގަނޑަށް އެންމެ ގިނައިން ފައިދާ ލިބޭ އެއް ބާވަތް