ޕާކިސްތާންގެ ގައުމީ އެއާލައިންގެ ޕައިލެޓުންނާއި ކްރޫން ދަތުރުމަތީ ރޯދަ ނުހިފަން އަންގައިފި

ޕައިލެޓުންނާއި ކެބިން ކްރޫން ރޯދައަށް ތިބެ ދަތުރުކުރުމަކީ އެ މީހުންނާއި ބޯޓުން ދަތުރުކުރާ އެހެން މީހުންގެ ފުރާނައަށް ވެސް އޮތް ނުރައްކަލެއް ކަމަށާއި އެހެންވެ ދަތުރު އޮންނަ ދުވަސްތަކުގައި ޕައިލެޓުންނާއި ކްރޫން ރޯދައަށް ނުތިބުމަށް ޕާކިސްތާންގެ ގައުމީ އެއާލައިނުން ލަފާ ދީފި އެވެ.

ޕާކިސްތާން އިންޓަނޭޝަނަލް އެއާލައިންގެ ކޯޕަރޭޓް ސޭފްޓީ މެނޭޖްމަންޓާއި އެއާކްރޫ މެޑިކަލް ސެންޓަރުގެ ލަފާގެ މަތިން ދިން އިރުޝާދުގައި ބުނެފައިވަނީ ރޯދަޔަށް ތިބެގެން ދަތުރުކުރުމަކީ ނުކުރެވޭނެ ކަމެއް ނޫން ކަމަށާއި އެކަމަކު ރޯދައަށް ތިބެ ދަތުރުކުރުމުގެ ރައްކާތެރިކަން ކުޑަ ކަމަށެވެ.

އޭގައި ބުނެފައިވަނީ އިމަޖެންސީ ހާލަތެއްގައި ކުއްލި ނިންމުންތައް ނިންމަންޖެހޭއިރު އެފަދަ ވަގުތެއްގައި ގޯސް އަދި އެކަށީގެންވާ ވަރަށްވުރެ ލަހުން ނިންމުންތައް ނިންމުމަކީ ރޯދައަށް ތިބޭ ނަމަ މެދުވެރިވެދާނެ ހާލަތެއް ކަމަށެވެ.

"ރޯދައިގެ މަތިވެރިކަމަކީ އެކަމާ މެދު ބަހުސެއް ނެތް ކަމެކެވެ. ނަމަވެސް ރޯދަ ހިފާ މީހާގެ އާންމު ދިރިއުޅުމަށް ބަދަލުތައް އާދެ އެވެ. އެހެންކަމުން، ދަތުރުކުރާއިރު ރޯދަ ހިފުމުގައި ކަނޑައެޅިފައިވާ ލުއިތަކެއް ހުރުމުން ރޯދަޔަށް ތިބެ ދަތުރުކުރުމަކީ ދީނީ ކަމެއްގެ ގޮތުގައި ނުބެލެވެ އެވެ." ކްރޫންނަށް ފޮނުވި ސިޓީގައި ބުނެފައިވެ އެވެ.

ރޯދަޔަށް ހުންނައިރު ސަމާލުކަން ކުޑަވުމާއި ނިންމުންތައް ނިންމުމުގެ ގާބިލުކަން ދަށްވުމާއި ހަރަކާތްތައް ލަސްވުން ފަދަ ކަންކަން ދިމާވާ ކަމަށާއި އަދި ހަކަތަ ވެސް ދަށްވެފައި ހުންނަ ހުރުމަށް ބަލާއިރު ރޯދަ ހިފައިގެން ތިބެ ވައިގެ ދަތުރުތައް ކުރުމަކީ ބޯޓުގައި ތިބޭ މީހުންގެ އިތުރުން ގްރަންޑް ސްޓާފުންނަށް ވެސް ނުރައްކަލެއް ކަމަށް ވަނީ ބުނެފަ އެވެ.

އެހެންވެ އިރުޝާދުގައި ލަފާ ދީފައިވަނީ ޕައިލެޓުންނާއި ކްރޫން ރޯދަޔަށް ތިބެ ދަތުރު ނުކުރުމަށެވެ.

މިގޮތަށް އަމަލުކުރުމަށް އަންގާފައިވާކަން އެއާލައިނުން ކަށަވަރުކޮށްދީފައި ވާއިރު އެ ގައުމުގެ ސިވިލް އޭވިއޭޝަން ރޫލްގައި ވެސް އޮންނަނީ އެގޮތަށް އަމަލުކުރުމަށެވެ.