މާދަމާ މުލަ ރޯދައަށް ވުމުގެ ފުރުސަތު ވަރަށް ބޮޑު

މިއަދަކީ ޝައުބާން މަހުގެ 29 ވަނަ ދުވަސް ކަމަށް ވާތީ މިއަދު އިރު އޮއްސުމާ އެކު ރަމަޟާން މަހަށް ހަނދު ބެލުން އޮންނާނެ އެވެ.

މާދަމާ އަކީ ރޯދަ މަހުގެ ފުރަތަމަ ދުވަސް ކަމަށް ވާނީ ޝައުބާން މަސް ނިމި އަލަށް އުފަންވާ ރަމަޟާން މަހުގެ ހަނދު މިއަދުގެ އިރު އޮއްސުމަށް ފަހު ކުޑަ ވަގުތުކޮޅަކަށް ނަމަވެސް ފެންމަތީގައި ހުރެގެންނެވެ.

ކޮންމެ ހަނދު މަހެއްގައި ވެސް އޮންނާނީ 29 ދުވަސް ނުވަތަ 30 ދުވަސް ކަމަށް ވާތީ މިއަދު އިރު އޮއްސޭއިރު ހަނދު ފެންމަތީގައި ނެތް ނަމަ މާދަމާ ވާނީ ޝައުބާން މަހުގެ 30 ވަނަ ދުވަހަށެވެ. އެހެން ވެއްޖެ ނަމަ ރަމަޟާން މަސް ފެށޭނީ އަންގާރަ ދުވަހު އެވެ.

ހަނދު މަހެއް ފުރިހަމަ ވަނީ ބިމުގެ ވަށައިގެން ހަނދު ދައުރުވަމުން ގޮސް ފުރިހަމަ ބުރެއް ފުރިހަމަވުމުންނެވެ. އެހެންވެ މި ބުރު ފުރިހަމަވަނީ ކޮން އިރަކުތޯ ބަލާއިރު، ހަނދުގެ ދައުރުވުންތަކާ ބެހޭ އިތުބާރުހުރި މައުލޫމާތު ފޯރުކޮށްދޭ ވެބްސައިޓްތަކުން ދައްކަނީ ޝައުބާން މަހުގެ ހަނދުގެ ބުރު މިއަދު މެންދުރު ފަހު 2:00 ގައި ހަމަވެ ރަމަޟާން މަހުގެ ހަނދު އުފަންވާނެ ކަމަށެވެ.

ދެން ބަލަންޖެހެނީ މި އުފަންވާ ހަނދު މިއަދު އިރު އޮއްސުމަށް ފަހު ފެންމަތީގައި ހުންނާނެތޯ އެވެ. މިއަދުގެ ހަނދު ހެނދުނު 6:06 ގައި އަރައި އޮއްސޭނެ ކަމަށް ދައްކަނީ 18:26 ގަ އެވެ. މި ވަގުތަށް ބަލާއިރު މާލެއަށް މިއަދު އިރު އޮއްސޭނީ 18:20 ގަ އެވެ. އެހެންވެ އިރު އޮއްސުމަށް ފަހު ފެންމަތީގައި ހަނދު ހުންނާނެ އެވެ. މާނަ އަކީ އެ ހިސާބުން ރަމަޟާން މަސް ފެށުމެވެ. ރާއްޖޭގެ އެންމެ އުތުރާއި ދެކުނަށް މިއަދު އިރު އޮއްސޭ ވަގުތުތަކަށް ބަލާއިރު ވެސް ހަނދު އޮއްސޭނެ ކަމަށް ދައްކަނީ އިރު އޮއްސުމުގެ ފަހުންނެވެ.

އެންމެ އުތުރާއި ދެކުނުގެ ރަށްތަކަށް ބަލާއިރު ވެސް އިރު އޮއްސުމަށް ފަހު ނުވަ ވަރަކަށް މިނެޓް ވަންދެން ހަނދު ފެންމަތީގައި ހުރެ އެވެ.

ރަމަޟާން މަހާއި ޝައްވާލް މަސް ފެށުމުގައި އިސްލާމީ ގިނަ ގައުމުތައް ތަބާވާ ސައޫދީ އަރަބިއްޔާ އަށް ވެސް މިއަދު އިރު އޮއްސި 13 ވަރަކަށް މިނެޓް ވަންދެން ހަނދު ފެންމަތީގައި ހުންނާނެ ކަމަށް ދައްކަ އެވެ.

އިސްލާމީ ޝަރީއަތުގައި ދުވަސް ފެށެނީ، އިރު އޮއްސުމުން ކަމަށް ވާތީ މި ހިސާބުތަކުން އެނގެނީ، މިއަދުގެ އިރު އޮއްސުމާ ރަމަޟާން މަސް ފެށޭނެ ކަމެވެ.