މި އަހަރުގެ އެންމެ ބޮޑު އަދި އަލިގަދަ ހަނދު

މިރޭ ފެންނަ ހަނދަށް އެންމެންގެ ސަމާލުކަން ލިބިފައި ވަނީ ގިނަ ސަބަބުތަކެއް އޭގައި އެކުލެވޭތީ އެވެ. އެއީ މި އަހަރު ދުނިޔެ އަށް ފެންނާނެ އެންމެ ބޮޑު އަދި އެންމެ އަލިގަދަ ހަނދެވެ. "ސުޕަ ހަންޓާޒް ފުލްމޫން" ގެ ނަން ދީފައިވާ މި ހަނދު އަޅައި ގަންނަ އަނެއް ސަބަބަކީ އާންމުކޮށް ހަނދުގެ އަލި ހުންނަ ވަރަށް ވުރެ 33 ޕަސެންޓް އަލިގަދަވުމެވެ.

ވަރަށް ކައިރިން ބޮޑު ހަނދެއްގެ ގޮތުގައި މި ހަނދު ފެންނަނީ ހަނދު ދުނިޔޭގެ ވަށައިގެން ދައުރުވަމުން ދާއިރު، އެލިޕްޓިކަލް މަގެއް ޗާޓް ކުރާތީ އެވެ. ބައެއް ފަހަރު ދުނިޔެއާ ތަންކޮޅެއް ދުރުގައި ނުވަތަ އަނެއްބައި ފަހަރު ތަންކޮޅެއް ކައިރިން ހަނދު ފެނެ އެވެ.

ހަނދުގެ ދައުރުގައި ހަނދު އެންމެ ދުރު ހިސާބުގައި ހުންނައިރު ކިޔަނީ އެޕޯޖީ އެވެ. ދުނިޔެއާ އެންމެ ކައިރިވުމުން އެ އަށް ކިޔަނީ ޕެރިޖީ އެވެ. އާންމު ގޮތެއްގައި ސުޕަމޫނަކަށް ވަނީ ޕެރިޖީގެ މަދުވެގެން 90 ޕަސެންޓް ތެރޭގައި ފުރިހަމަ ހަނދެއް އޮތުމުންނެވެ. އެއާ އެކު، އުޑުމަތިން ހަނދު ފެންނާނީ 14 ޕަސެންޓް ބޮޑުކޮށެވެ.

މިހެންވެ، ހަންޓާޒް ފުލްމޫން ފެންނަނީ އަޖައިބު ކުރުވަނިވި ރީތި މަޑު އޮރެންޖު ކުލައެއްގަ އެވެ.

ސޯޝަލް މީޑިއާގައި ވެސް ގިނަ ބަޔަކު އަންނަނީ މިރޭގެ ހަނދުގެ ފޮޓޯތައް ހިއްސާކުރަމުންނެވެ.

ފަލަކީ އިލްމުވެރިޔާ އަދި ކުރީގެ ރައީސް މައުމޫން އަބްދުލްގައްޔޫމް އެކްސްގައި ކުރެއްވި ޕޯސްޓެއްގައި ވިދާޅުވީ، މިރޭގެ ސުޕަ ހަންޓާޒް ފުލްމޫނަކީ މި އަހަރުގެ އެންމެ ބޮޑު ފުލްމޫން ކަމަށެވެ. މި ހަނދު ރާއްޖެއަށް އަރާފައި ވަނީ މިއަދު ހަވީރު 5:49 ގައި ކަމަށާއި އޮއްސޭނީ މާދަމާ ހެނދުނު 6:23 ގައި ކަމަށް މައުމޫން ވިދާޅުވި އެވެ.

މިހާރު ފެނިފައިވާ ސުޕަ ހަންޓާޒް ފުލްމޫނުގެ އިތުރުން މި އަހަރުގެ މިހާތަނަށް ހަތަރު ސުޕަމޫން ފެނިފައިވެ އެވެ. އެއީ އޭޕްރީލް މަހާއި އޮގަސްޓް މަހުގެ ތެރޭގައި ފެނުނު ބްލޫ ސުޕަމޫނާއި ސެޕްޓެމްބަރު މަހުގެ ތެރޭގައި ފެނުނު ސުޕަމޫން އެވެ.