މައުމޫނާއި ނަސްރީނާގެ ލޯބި ދެމެހެއްޓުމުގެ ސިއްރަކީ "އެހެންދިމާއަކަށް" ނުބެލުން

ކުރީގެ ރައީސް މައުމޫން އަބްދުލްގައްޔޫމާއި އަނބިކަނބަލުން ނަސްރީނާ އިބްރާހީމްގެ ކައިވެންޏަށް 50 އަހަރު ފުރި، ރަން ޔޫބީލް ރަން އަކުރުން ފެވީ ދެގޮތެއް ނުވާ ލޯތްބާ އެކުގަ އެވެ. އޭގެ ފަހުން މިހާތަނަށް ފަސް އަހަރު ފާއިތުވެ 55 އަހަރު ފުރުނުއިރު ވެސް ދެމަފިރިންގެ ފަރާތްޕުޅުން ފެންނަނީ އެކަކު އަނެކަކަށް ކުރައްވާ އިހުތިރާމާއި ގަދަރެވެ. އުމުރުފުޅުން ކިތަންމެ ދުވަހެއް ވިޔަސް މައުމޫނާއި ނަސްރީނާ އެކުގައި ފެންނަ ކޮންމެ ހަފުލާއަކުން ދެމަފިރިން "ވަރަށް ލޯތްބެވެ".

ދޭތެރެއަކުން ސޯޝަލް މީޑިއާ އިން އާއްމުވާ، މައުމޫނާއި ނަސްރީނާގެ އެނިވާސަރީ ފޮޓޯތަކުން ވެސް ފެންނަނީ ކައިވެނީގެ އުފާވެރި ހަނދާންތަކެވެ. އެ ގުޅުން ފެންނަ އެހެން މީހުންނަށް ވެސް ހިތްހަމަޖެހުން ލިބެ އެވެ.

މިއަދު ފާހަގަކުރާ މި އަހަރުގެ ނަސްރުގެ ދުވަހާ ގުޅިގެން ޕީއެސްއެމަށް ދެއްވި އިންޓަވިއުގައި، ނޮވެމްބަރު 3، 1988 ގައި ރާއްޖެއަށް ދިން އުދުވާނީ ހަމަލާގެ ބިރުވެރިކަމުގެ ތެރޭގައި އޭރުގެ ރައީސްގެ ހައިސިއްޔަތުން މައުމޫން އަމަލުކުރެއްވި ގޮތާއި އަމިއްލަ ދިރިއުޅުއްވުމުގެ ބައެއް ސުވާލުތައް ޕްރެޒެންޓަރު އަމާޒު ކުރެއްވި އެވެ.

އެތައް ބަޔަކަށް މިސާލަކަށް ފުދޭ ދެމަފިރިންގެ ކައިވެނީގެ މިސްރާބާ ގުޅޭ ގޮތުން ކުރެއްވި ސުވާލަށް މައުމޫނާއި ނަސްރީނާގެ ޖަވާބު ކުރުވެފައި ވަރަށް ސާފެވެ.

އެ ގުޅުމުގައި ދެމިތިބެވުމުގެ އަސްލަކީ، ދެ ބޭފުޅުން ވެސް ވިދާޅުވި ގޮތުގައި ލޯތްބާއި އިހްތިރާމާ އެކު ސުލްހަވެރިކަން އިސްކުރުމެވެ. ވަކިވާން ދުވަހަކު ވެސް ހިތަށް ނޭރުވުމެވެ.

"އަޅުގަނޑުމެން އެހެން ދިމާއަށް ނުބަލާކަން. އަޅުގަނޑުމެން ދެ މީހުން މިތިބީ ހަމަ އެކީގައި. ބައެއް މީހުންނަށް ވާހެން އެހެން ދިމަދިމާއަށް ބަލާހެން އެކަހަލަ ކަމެއް އަޅުގަނޑު ނުކުރަން. ނަސްރީނާ ވެސް ނުކުރޭ،" މައުމޫން ވިދާޅުވި އެވެ.

"އެހެންވީމާ އެގޮތުން ވަރަށް ރަނގަޅަށް އިރާދަކުރެއްވިއްޔާ މި ތިބެވުނީ"

މައުމޫން ވިދާޅުވި ގޮތުގައި އެންމެ ކުރިއްސުރެ ވެސް އަޒުމް ކަނޑައެޅުއްވީ ކައިވެންޏަކީ އަބަދަށްޓަކައި ނުވަތަ ދާއިމީ ކަމަކަށް ހެއްދެވުމަށެވެ. ވަރިކޮށްގެން ނުވާނެ އެވެ.

"އެ ދިމާވާ ކޮންމެ މައްސަލައަކީ ވާހަކަ ދައްކައިގެން ސުލްހަވެރިކަމާ އެކު ހައްލު ކުރެވޭނެ ކަންކަމޭ. އެހެންވީމާ އެ ގޮތަށް ހައްލު ކުރާނީއޭ، އެއްގޮތަކަށް ވެސް ވަކިވާން ހިތަށް އަރުވާކަށް ނުވާނެއޭ. އެ އަޒުމުގައި އޭރުއްސުރެ އަޅުގަނޑުމެން މިއަދާ ޖެހެންދެން ވެސް މި ތިބެނީ،" މިހާރު އުމުރުފުޅުން 86 އަހަރުގެ މައުމޫން ވިދާޅުވި އެވެ.

"އިރާދަކުރެއްވިއްޔާ މާތް ﷲ ގެ ހެޔޮރަހުމަތްފުޅުން އަޅުގަނޑުމެންނަށް ވަރަށް ގާތް ގުޅުމެއްގައި އެކުގައި އުޅެވިފައި ތިބެވުނީ."

މައުމޫން ފާހަގަކުރެއްވި ގޮތުގައި ނަސްރީނާއަކީ ވެސް ވަރަށް ހިތްވަރުގަދަ ބޭކަނބަލެކެވެ.

ނަސްރީނާގެ އުމުރުފުޅުން މިހާރު 74 އަހަރު ވެފައިވާއިރު އެ ކަމަނާ ފާހަގަކުރެއްވީ ފިރިކަލުންގެ ކެތްތެރިކަމެވެ. މީގެ 36 އަަހަރު ކުރިން ނޮވެމްބަރު 3، 1988 ގައި ރާއްޖެ އަށް ދިން ޓެރަރިސްޓް ހަމަލައިން ދިވެހިންނާއި ގައުމު ސަލާމަތް ކުރުމުގައި ވެސް މައުމޫން ދެއްކެވީ އެ ކެތްތެރިކަން ކަމަށް ނަސްރީނާ ވިދާޅުވި އެވެ.

"މާން އެ ގެއަށް [ގުލިސްތާނުގެއަށް] ވަދެވަޑައިގެން ނަމާދު ކުރައްވައިގެން އެ އިށީންނެވި ގޮތަށް އެ އިންނެވީ ތެދުވެވަޑައިނުގެން. އެ މީހުން [އިންޑިއާ ސިފައިން] އަންނަންދެން އެންމެ ފަހަރަކު ކަން ނޭނގޭ ހިންދަމާލައްވަން ނުވާނެ 15 މިނިޓު ވެސް،" ނޮވެމްބަރު 3 ވަނަ ދުވަހު މައުމޫން ކުރެއްވި މަސައްކަތްޕުޅުގެ ހަނދާން އާކުރައްވަމުން ނަސްރީނާ ވިދާޅުވި އެވެ.

މައުމޫނާއި ނަސްރީނާ ބައްދަލުވެވަޑައިގަތީ މިސްރުގައި ކިޔަވައި ވިދާޅުވި ދުވަސްވަރު އެވެ. އެ ހިސާބުން އުފެދުނު ގާތްކަން ކައިވެންޏަށް ބަދަލުކުރެއްވީ 1969 ގަ އެވެ. ހަތަރު ބޭފުޅުން ލިބިވަޑައިގެންނެވިއިރު، މައުމޫނާއި ނަސްރީނާ ވެސް އެހެން މީހުންނަށް މިސާލު ދައްކަވަނީ އާއިލީ ގުޅުމުންނެވެ.