އެމްއޭސީއެލްގެ ޑީއެމްޑީގެ މަގާމަށް މުޖުތަބާ އާއި ލަމްއާން

ވެލާނާ އިންޓަނޭޝަނަލް އެއާޕޯޓު ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޑެޕިއުޓީ މެނޭޖިން ޑިރެކްޓަރުގެ މަގާމަށް ދެ ބޭފުޅަކު އައްޔަން ކުރައްވައިފި އެވެ.

އެއީ ކުރީގެ ރައީސް އަބްދުﷲ ޔާމީންގެ ސަރުކާރުގައި ކުޑަދުވަސްކޮޅަކަށް ފެނަކައިގެ މެނޭޖިން ޑިރެކްޓަރުކަން ކުރެއްވި މުހައްމަދު ލަމްއާނާއި އެމްއޭސީއެލްގައި އިސްކޮށް ކުރިން މަސައްކަތް ކުރެއްވި މުޖުތަބާ ލަތީފެވެ. ލަމްއާން އެ މަގާމަށް އައްޔަން ކުރެއްވީ މި މަހުގެ 1 ފަ އެވެ. މުޖުތަބާ އަށް މަގާމު ދެއްވީ އިއްޔެ އެވެ.

މުޖުތަބާ އަކީ އެމްއޭސީއެލްގެ ޖެނެރަލް މެނޭޖާ، ކޮމާޝަލްގެ މަގާމު އަދާކުރައްވާފައިވާ ބޭފުޅެކެވެ. އޭނާ އެ މަގާމުން 2020 ވަނަ އަހަރުގެ ތެރޭގައި ވަކިކުރީ އެމްއޭސީއެލް އަށް އާ ސީޕްލޭން ޓާމިނަލް ހިންގޭނެ ކަމަށް ވިދާޅުވާތީ އާއި ކުންފުންޏަށް ބޮޑު އާމްދަނީއެއް ގެއްލޭ ގޮތަށް ޓީއެމްއޭއަށް އެ ތަން ދޭން ދެކޮޅު ހެއްދެވުމުންނެވެ.

މުޖުތަބާއަކީ ޔާމީންގެ ވެރިކަމުގައި، އޭރު އެމްއޭސީއެލް ބެލެހެއްޓުމުގެ ޒިންމާއާ ސަރުކާރު ތެރެއިން ހަވާލުވެ ހުންނެވި އިކޮނޮމިކް މިނިސްޓަރު މުހައްމަދު ސައީދާ ޖެހުނު މައްސަލައެއްގައި، ވަޒީފާ ގެއްލުނު ބޭފުޅެކެވެ. އެކަމަކު އާ ސަރުކާރާ އެކު އޭނާ އަށް އަލުން ވަޒީފާ ދިނެވެ. އެމްއޭސީއެލްގެ ބައެއް ވެރިން ވިދާޅުވެފައިވާ ގޮތުގައި، އަލުން ކޮމާޝަލް ހެޑްގެ މަގާމާ ހަވާލުވެވަޑައިގަތުމަށް ފަހު، ކުންފުނީގެ ވިޔަފާރި ފުޅާކުރުމަށްޓަކައި މުޖުތަބާ ވަރަށް ބޮޑެތި ޕްލޭންތަކެއް ހެއްދެވި އެވެ. އޭގެ ތެރެއިިން އެއް ޕްލޭނަކީ އާ ސީޕްލޭން ޓާމިނަލް ހިންގުމުގެ އޮނިގަނޑެވެ.