އާ ޓާމިނަލުން މިހާތަނަށް 2،000 އަށް ވުރެ ގިނަ ފަސިންޖަރުންނަށް ހިދުމަތް ދީފި

މިދިޔަ ހޮނިހިރު ދުވަހު ރަސްމީކޮށް ހުޅުވައި ބޭނުންކުރަން ފެށި ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލުން މިހާތަނަށް 2،000 އަށް ވުރެ ގިނަ ފަސިންޖަރުންނަށް ހިދުމަތް ދީފި އެވެ.

އެމްއޭސީއެލުން މިއަދު ނެރުނު ބަޔާނެއްގައި ބުނީ، މިހާތަނަށް އާ ޓާމިނަލުން ހިދުމަތް ދިނީ ރާއްޖެއިން ފުރި 956 ފަސިންޖަރަކަށާއި ރާއްޖެ އައި 1,454 ފަސިންޖަރަކަށް ކަމަށެވެ.

އެ ޓާމިނަލްގެ އޮޕަރޭޝަންތައް މިދިޔަ އާދިއްތަ ދުވަހު ފެށުމުގެ ގޮތުން ފުރަތަމަ ހިދުމަތް ދިނީ އިންޑިއާގެ ކޮޗިން އިން މާލެ އައި ގައުމީ އެއާލައިން މޯލްޑިވިއަންގެ މަތިންދާބޯޓަށެވެ.

އެ ދުވަހުން ފެށިގެން އިއްޔެގެ ނިޔަަލަށް މޯލްޑިވިއަންގެ ބޯޓުތަކަށް 14 ފަހަރު ހިދުމަތް ދީފައިވާ ކަމަށް އެމްއޭސީއެލުން ބުންޏެވެ.

އެމްއޭސީއެލުން ބުނީ އާ ޓާމިނަލަށް އިންޓަނޭޝަނަލް ދަތުރުތައް ބަދަލުކުރުމަށް ހަމަޖެހިފައި ވަނީ އޮރާޓް ޕްރޮސެސްގެ ތެރެއިން ކަމަށެވެ. އެކަން ކުރަނީ ބައިނަލްއަގުވާމީ ކޮންސަލްޓަންޓް ފާމެއް ކަމަށްވާ މޮޑާލިސްއާ ގުޅިގެން ކަމަށް އެ ކުންފުނިން ބުންޏެވެ.

އެ ޕްރޮސެސްގެ ތެރެއިން ފަހަރަކު އެއާލައިނެއް އާ ޓާމިނަލަށް ބަދަލުކުރަމުން ގޮސް އަންނަ ސެޕްޓެމްބަރު މަހު ހުރިހާ އެއާލައިނެއްގެ ހިދުމަތް އާ ޓާމިނަލަށް ބަދަލުކުރާނެ ކަމަށް އެމްއޭސީއެލުން ބުންޏެވެ.

ވީއައިއޭގެ އާ ޓާމިނަލަކީ އަހަރު 7.5 މިލިއަން ފަސިންޖަރުންނަށް ހިދުމަތް ދެވޭ ގޮތަށް ފަރުމާކޮށްފައިވާ ޓާމިނަލެކެވެ.