ނެޓްބޯޅަ ވޯލްޑް ކަޕް ކާމިޔާބު ކުރި ޝާނީ ލޭޓަންގެ އެހީ ދިވެހި ކުޅުންތެރިންނަށް

ނެޓްބޯޅަ ވޯލްޑް ކަޕް އޮސްޓްރޭލިއާ އަށް ހޯދައި ދިން ޝާނީ ލޭޓަންގެ ތިން ހަފުތާގެ ޓްރޭނިން ޕްރޮގްރާމެއް ރާއްޖޭގައި ބާއްވައިފި އެވެ.

ދުނިޔޭގެ އެންމެ މޮޅު ނެޓްބޯޅަ ކުޅުންތެރިޔާގެ އެވޯޑް ދެ ފަހަރަށް ހޯދި ޝާނީ ވަނީ 2015 އަހަރުގެ ވޯލްޑް ކަޕް އޮސްޓްރޭލިއާ އަށް ހޯދައި ދިނުމުގައި މުހިންމު ދައުރެއް އަދާކޮށްފަ އެވެ. އޮސްޓްރޭލިއާގެ ގައުމީ ޓީމުގެ ކެޕްޓަންކަން ވެސް 2017 ގައި އޭނާ ކުރި އެވެ

ތިން ހަފުތާގެ ޓްރޭނިން ޕްރޮގްރާމް ކުރިއަށްގެންދިޔައީ ގްރީން ސްޓްރީޓްސް އާއި އެމްވީ ނެޓާސް ކްލަބް ގުޅިގެންނެވެ.

ނެޓްބޯޅައިގެ ޓްރޭނިންތަކަށް އެހީވެދޭ، ކުންފުންޏެއް ކަމަށްވާ އޮސްޓްރޭލިއާގެ ނެޓްފިޓްއާ އެކު ވެސް ގްރީން ސްޓްރީޓްސް އާއި ކްލަބް އެމްވީން ވަނީ އެއްބަސްވުމެއް ހަދައިފަ އެވެ. ނެޓްފިޓަކީ، އޮސްޓްރޭލިއާގެ ކުރީގެ ނެޓްބޯޅަ ކުޅުންތެރިޔާ ސަރާ ވޯލް 2011 ގައި އުފެދި ކުންފުންޏެކެވެ.

ޝަނީ ރާއްޖެ އާއި ސަރާގެ ދައުވަތަކަށެވެ. ޓްރޭނިން ޕްރޮގްރާމް ކުރިއަށް ގެންދިޔައީ މިހާރު ރިޠަތާ ކޮށްފައިވާ އެ ދެ ކުޅުންތެރިން ގުޅިގެންނެވެ.

ޝާނީ އާއި ސާރާގެގެ ޓްރޭނިން ޕްރޮގްރާމްގައި:-

| ސްކޫލް ދަރިވަރުންނަށް ނެޓްބޯޅަ ކްލާސްތަކެއް ކުރިއަށް ގެންދިޔަ

| ނެޓްބޯޅަ އެކަޑަމީތަކުގެ ކުޅުންތެރިންނަށް އެޑްވާންސް ކްލާސްތަކެއް

| ނެޓްބޯޅަ ކޯޗުންނަށް ޓްރޭނިން ސެޝަންތަކެއް

| ރަށްރަށުގެ ނެޓްބޯޅަ ކޮމިޔުނިޓީތަކަށް ޓްރޭނިން ސެޝަންތަކެއް

ނެޓްފިޓްގެ ނަމުގައި އެކްސްކްލޫސިވް ޓްރޭނިން ފޯރުކޮށްދޭ އެޕެއް ވެސް ސަރާ ވަނީ ލޯންޗުކޮށްފަ އެވެ. އޮސްޓްރޭލިއާގެ ނެޓްބޯޅަ އެސޯސިއޭޝަންގެ ޓްކްނިކަލް ޕްރޮގްރާމްތަކަށް ވެސް ނެޓްފިޓުން ޑޭޓާ ފޯރުކޮށްދެ އެވެ.

އެ ކުންފުންޏާ އެކު ގްރީން އާއި އެމްވީން ހެދި އެއްބަސްވުމުގެ ދަށުން އެއް އަހަރުވަންދެން ނެޓްފިޓް ސަބްކްރިޕްޝަން ދިވެހިންނަށް ހިލޭ ދިނުމަށް ވަނީ ހަމަޖެހިފަ އެވެ. ނެޓްފިޓް އެއް އަހަރުވަންދެން ހިލޭ ބޭނުންކުރަން ބޭނުންވާ ފަރާތްތަކުން ގްރީން ސްޓްރީޓްސްގެ ސޯޝަލް މީޑިއާ އެކައުންޓްތަކަށް މެސެޖު ކުރުމަށް އެ ކްލަބުން ވަނީ އެދިފަ އެވެ.

ޓްރޭނިން ޕްރޮގްރާމް ނިންމާލުމުގެ ގޮތުން، ގްރީން އާއި އެމްވީ ނެޓާސްގެ ކުޅުންތެރިންގެ މައްޗަށް އެކުލާވާލާފައިވާ ޓީމަކުން ވަނީ ގައުމީ ޓީމާ ދެކޮޅަށް އެގްޒިބިޝަން މެޗެއް ކުޅެފަ އެވެ. އެ މެޗުގެ ޝަރަފުވެރި މެހެމާނަކީ އޮސްޓްރޭލިއާގެ ސަފީރު ޑޭވިޑް ޖެސަޕް އެވެ.