އޭޝިއާގެ ޔޫތު ނެޓްބޯޅަ ރޭންކިންގައި ރާއްޖެ އަށް ހަތް ވަނަ

އޭޝިއަން ޔޫތު ނެޓްބޯލް ޗެމްޕިއަންޝިޕުގެ ގްރޫޕް ބީ ގެ ފައިނަލުން ޕާކިސްތާން އަތުން މިއަދު 60-35 ޕޮއިންޓުން ރާއްޖޭގެ 21 އަހަރުން ދަށުގެ އަންހެން ނެޓްބޯޅަ ޓީމު ބަލިވެއްޖެ އެވެ.

އޭޝިއާގެ ހަ ވަނަ އާއި 11 ވަނަ އާ ދެމެދު ރޭންކްކޮށްފައިވާ ގައުމުތައް ވާދަކުރާ ގްރޫޕް ބީ ގެ ފައިނަލް މެޗަކީ، އާ ރޭންކިންގެ ހަ ވަނަ އާއި ހަތް ވަނަ ކަނޑައަޅާ މެޗެވެ. މި މެޗުން ބަލިވުމުން ރާއްޖެ އަށް ލިބުނީ ހަތް ވަނަ އެވެ. ހަ ވަނަ އަކީ ޕާކިސްތާނެވެ.

ގްރޫޕް އޭ ގައި ހިމެނެނީ ހިމެނެނީ އޭޝިއާގެ ރޭންކިންގެ އެންމެ ގަދަ ފަސް ޓީމެވެ. އެ ބައިގައި ވާދަކުރަނީ އިންޑިއާ، ސްރީ ލަންކާ، ސިންގަޕޫރު، މެލޭޝިއާ، އަދި ހޮންކޮން އެވެ.

ފައިނަލުން ބަލިވި ނަމަވެސް ރާއްޖޭގެ ޒުވާން ކުޅުންތެރިން ވަނީ މުބާރާތުގައި މޮޅު ކުޅުމެއް ދައްކައި، ރަނގަޅު ނަތީޖާތަކެއް ނެރެފަ އެވެ. އެގޮތުން ފައިނަލުގެ ކުރިން ކުޅުނު ހަ މެޗުގެ ތެރެއިން ފަސް މެޗުން މޮޅުވި އެވެ. ބަލިވީ ލީގު ބުރުގައި ޕާކިސްތާން އަތުން އެކަންޏެވެ.

ލީގު ބުރުގައި ރާއްޖެ ފުރަތަމަ މެޗުން ޗައިނޭސް ޓައިޕޭ އަތުން މޮޅުވީ 51-26 ޕޮއިންޓުންނެވެ. ދެ ވަނަ މެޗުން ޖަޕާން އަތުން 59-32 ޕޮއިންޓުން މޮޅުވިއިރު، ތިން ވަނަ މެޗުން ސައޫދީ އަރަބިއްޔާ އަތުން މޮޅުވީ 73-20 ޕޮއިންޓުންނެވެ. ލީގު ބުރުގެ ފަހު މެޗުން ޕާކިސްތާން އަތުން ބަލިވީ 49-39 ޕޮއިންޓުންނެވެ. އޭގެ ފަހުން ސެމީ ފައިނަލުން ޗައިނީސް ޓައިޕޭ އަތުން މޮޅުވީ 51-39 ޕޮއިންޓުންނެވެ.

ރާއްޖޭގެ ޓީމުގައި ފަސް ކުޅުންތެރިން ފިޔަވައި މުޅިން ހިމެނެނީ ބައިނަލްއަގްވާމީ މެޗުތަކަށް އާ ކުޅުންތެރިންނެވެ. މީގެ ތިން މަސް ކުރިން ތައްޔާރުވާން ފެށި ޓީމުން ވަނީ ތަޖުރިބާ ހޯދުމަށް ހޮންކޮން މުބާރާތެއްގައި މިދިޔަ ޖޫން މަހުގެ ކުރީކޮޅު ވާދަކޮށްފަ އެވެ. އެ މުބާރާތުން ރާއްޖެ ތިން ވަނަ ހޯދި އެވެ.