އައިޝާ އިސްވެ ހުންނަވައިގެން ޖޭޕީގެ ޓީމެއް ރައީސް މުއިއްޒުގެ އަރިހަށް!

ޖުމްހޫރީ ޕާޓީ (ޖޭޕީ) ގެ ޑެޕިއުޓީ ލީޑަރު އަދި ކުރީގެ ސަރުކާރުގެ ޓްރާންސްޕޯޓް މިނިސްޓަރު އާއިޝަތު ނަހުލާ އިސްވެ ހުންވައި، އެ ޕާޓީގެ އިސް ޓީމެއް ރައީސް ޑރ. މުހައްމަދު މުއިއްޒާ މިރޭ ބައްދަލުކޮށްފި އެވެ.

މާމިގިލި ދާއިރާގެ މެމްބަރު ގާސިމް އިބްރާހިމްގެ ޕާޓީގެ ތަރުޖަމާން އަލީ ސޯލިހު ވިދާޅުވީ، އެއީ ކުރިއަށް އޮތް ރައްޔިތުންގެ މަޖިލިހުގެ އިންތިހާބާ ގުޅޭ ގޮތުން މަޝްވަރާ ކުރަން ޖޭޕީ އާއި ޕީއެންސީއާ އެކު ބޭއްވި ބައްދަލުވުމެއް ކަމަށެވެ.

"މަޝްވަރާގެ އިތުރު ތަފުސީލް މި ވަގުތު ހާމަކުރެވެން ނެތް. އިތުރު އަޕްޑޭޓް ފަހުން ހާމަކުރާނަން،" ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރުކަން ކުރެއްވި އަލީ ސޯލިހު ވިދާޅުވި އެވެ.

އާ ރައީސް ޑރ. މުއިއްޒަކީ ޕީއެންސީގެ ރައީސެވެ.

ސަރުކާރު ހިންގާ ޕާޓީ ޕީއެންސީ އާއި ޖޭޕީގެ ބައްދަލުވުމުގައި އާއިޝާގެ އިތުރުން ގާސިމްގެ އަރިސް ބައެއް ބޭފުޅުން ކަމަށްވާ އަހުމަދު ނިހާނާއި ކެންދޫ ދާއިރާގެ މެމްބަރު އަލީ ހުސައިނާއި ރިޔާޒް ރަޝީދު އަދި ސެކްރެޓަރީ ޖެނެރަލް އަޒްލީން އަހުމަދު ބައިވެރިވެވަޑައިގަތެވެ.

ރައީސް ޑރ. މުއިއްޒާ އެކު، ޕީއެންސީގެ ޗެއާޕާސަން އަދި އެ މަނިކުފާނުގެ ސްޕެޝަލް އެޑްވައިޒަރު އަބްދުއްރަހީމް އަބްދުﷲ އާއި ޕީއެންސީގެ ނައިބު ރައީސް ލޯކަލް ގަވަމަންޓް މިނިސްޓަރު އާދަމް ޝަރީފާއި ޕީއެންސީގެ ނައިބު ރައީސް އިކޮނޮމިކް މިނިސްޓަރު މުހައްމަދު ސައީދާއި ފޮރިން މިނިސްޓަރު މޫސާ ޒަމީރާއި ފެލިދޫ ދާއިރާގެ މެމްބަރު ފަޒުލް ރަޝީދު އަދި ރައީސް އޮފީހުގެ މިނިސްޓަރު އާދަމް ރަމީޒު ވެސް ބައިވެރިވެވަޑައިގަތެވެ.

ޕީޕީއެމް/ޕީއެންސީން ބުނެފައި ވަނީ އަންނަ އަހަރުގެ ކުރީކޮޅު ބާއްވާ ރައްޔިތުންގެ މަޖިލިހުގެ އިންތިހާބުގައި އެ ކޯލިޝަނުން މަޖިލިހުގެ 70 އަށް ވުރެ ގިނަ ގޮނޑި ކާމިޔާބު ކުރާނެ ކަމަށެވެ.