އައްބާސްގެ ވާހަކަތައް ދޮގުކުރައްވައި އަބްދުއްރަހީމް ވިދާޅުވީ ޕީއެންސީ މާ ވަރުގަދަވާނެ ކަމަށް

ސަރުކާރު ހިންގާ ޕާޓީ ޕީއެންސީގެ 13 ނުވަތަ 14 މެމްބަރަކު ކުރިއަށް އޮތް މަދު ދުވަސްތަކުގެ ތެރޭގައި އެ ޕާޓީ ދޫކުރައްވާނެ ކަމަށް ވިދާޅުވެ، ރައްޔިތުންގެ މަޖިލިހުގެ ވެލިދޫ ދާއިރާގެ އެމްޑީއޭގެ މެމްބަރު މުހައްމަދު އައްބާސް ފަތުރަނީ ދޮގު ވާހަކަތަކެއް ކަމަށް ޕީއެންސީގެ ލީޑަޝިޕްގެ ބޭފުޅުން މިއަދު ވިދާޅުވެއްޖެ އެވެ.

އައްބާސް ރޭ ކުރެއްވި ޕޯސްޓެއްގައި ވިދާޅުވީ، މިދިޔަ ބުދަ ދުވަހު ބޭއްވި ޕީއެންސީގެ ޕާލަމެންޓްރީ ގުރޫޕުގެ ބައްދަލުވުމުގައި މެމްބަރުންގެ ކަންބޮޑުވުންތައް ބަންޑުންކޮށްލާފައިވާ ކަމަށެވެ. އަދި އެ ބައްދަލުވުން ވަރަށް ބޮޑަށް ހޫނުވުމުން ޕީޖީ ގުރޫޕުގެ އިތުރު ބައްދަލުވުމެއް އިއްޔެ ބާއްވާނެ ކަމަށް އެންގުމަށް ފަހު، އެ ކަން ނުކުރާ ކަމަށް އައްބާސް ވިދާޅުވި އެވެ.

ނަމަވެސް ޕީއެންސީގެ ޗެއާޕާސަން އަދި ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ އާއި ޕާލަމެންޓްރީ ގުރޫޕުގެ ލީޑަރު އިބްރާހިމް ފަލާހު އެ ވާހަކަތައް ދޮގުކުރައްވައި މިއަދު ޕޯސްޓެއް ކުރެއްވި އެވެ.

އަބްދުއްރަހީމް ވިދާޅުވީ، އެ މަނިކުފާނު ވެސް އައްބާސް އިޝާރާތް ކުރެއްވި ބައްދަލުވުމުގައި ބައިވެރިވެވަޑައިގަންނެވި ކަަމަށާއި އައްބާސް ދައްކަވަނީ "ކަނޑައެޅިގެން ހަގީގަތާ ހިލާފު ވާހަކަތަކެއް" ކަމަށެވެ.

"މިހެން ފަތުރާ ދޮގު ޚަބަރުތަކުން ބައިބައިވާ ވަރަށް ވުރެ ޕީއެންސީގެ ޕީޖީ މާ ވަރުގަދަވާނެ،" އަބްދުއްރަހީމް ވިދާޅުވި އެވެ.

އައްބާސަށް ވަރުގަދަ ރައްދުތަކެއް ދެއްވަމުން ފަލާހު ވިދާޅުވީ، ޕީއެންސީގެ ޕީޖީ ގްރޫޕް ރޫޅާލެވިދާނެ ކަމަށް ހީކޮށް އެފަދަ "ބުހުތާން ދޮގު ވާހަކަ" ފެތުރުމަކީ ވަރަށް ބޮޑު ކުށްހީއެއް ކަމަށެވެ.

"ޕީއެންސީ ޕީޖީ ގްރޫޕް އޮތީ އެކަތިގަނޑެއް ގޮތަށް ރައީސް މުއިއްޒުގެ ފަހަތްޕުޅުގައި ވަރަށް ސާބިތުކޮށް. ކިތަންމެ ނުބައި ޕްލޭންތަކެއް ރާވައި، މިފަދަ މޮޔައިން ލައްވާ މިފަދަ މެސެޖު ކުރުވިއަސް އިންޝާ ﷲ ކާމިޔާބެއް ނުވާނެ،" އިނގުރައިދޫ ދާއިރާގެ މެމްބަރުކަން ވެސް ކުރައްވާ ފަލާހު ވިދާޅުވި އެވެ.

ފަލާހުގެ ޕޯސްޓުގައި ވަނީ "މިފަދަ ފިތުނަ ފަތުރައިދޭ މަތިން" ކުރީގެ ރައީސް އަބްދުﷲ ޔާމީނާއި އައްބާހާ ދެމެދު ފައިސާގެ މުއާމަލާތުތަކެއް ކޮށްފައިވާ ކަމަށް ފެތުރޭ ވާހަކަތަކަށް ވެސް އައްބާސްގެ އަމަލުން ބާރު ލިބޭ ކަމަށް ވިދާޅުވެފަ އެވެ.