ވަންގަވް: ސޮލިއުޝަންސް ޓީމުން ހިދުމަތްތައް ވަރަށް ބޮޑަށް ފަސޭހަކޮށްލައިފި

"ވަން ގަވް" ޕްލެޓްފޯމަކީ އާއްމުންނަށް ފަސޭހައިން ހިދުމަތްތައް ހޯދޭނެ ޑިޖިޓަލް މަގެއް ތަނަވަސްކޮސްދިނުމުގެ ގޮތުން ތައާރަފް ކުރި ޕްލެޓްފޯމެކެވެ. މި ޕްލެޓްފޯމަކީ އާއްމުންނަށް ފަސޭހަ, މާ ގިނަ ވަގުތުތަކެއް ހިދުމަތްތައް ހޯދުމުގައި ހޭދަކުރަން ނުޖެހޭނެ ފަދަ ޕްލެޓްފޯމަކަށް ހެދުމުގެ ގޮތުން ވަން ގަވްގެ ސޮލިއުޝަންސް ޓީމުން އަންނަނީ ބުރަ މަސައްކަތް ކުރަމުންނެވެ.

ސޮލިއުޝަންސް ޓީމަކީ ވަން ގަވް އާ ގުޅޭ އިދާރަތަކުގެ ހިދުމަތްތައް ސްޓަޑީކުރުމާއި ޑިޒައިންކުރުމުން ފެށިގެން ކޮންފިގަރޭޝަންގެ މަސައްކަތްތައް ނިންމާލުމާ ހިސާބަށް ކުރަން ޖެހޭ ހުރިހާ މަސައްކަތެއް ކުރާ ޓީމެވެ.

ވަން ގަވް އާ ގުޅެން އިދާރާއަކުން ނިންމާ ހިސާބުން އެ އިދާރާއެއްގެ ހިދުމަތްތައް މިހާރު ދެމުންދާ ގޮތާއި ހިދުމަތްތައް މިހާރަށްވުރެ ފުރިހަމައަށް ހިދުމަތް ދެވޭނެ ގޮތުގެ ދިރާސާކުރަނީ މިޓީމުންނެވެ. އަދި މީގެ އިތުރުން, ހިދުމަތް ދިނުމުގައި ބޭނުންކުރާ ފޯމުތަކަކީ މިހާރަށް ވުރެ ބޭނުން ކުރަން ފަސޭހަ ފޯމަކަށް ހެދުމުގެ މަސައްކަތްތައް ވެސް ހިމެނެއެވެ.

މި މަސައްކަތްތަކުގެ އަމާޒަކީ ހިދުމަތް ހޯދާ ފަރާތްތަކުން ތަކުރާރުކޮށް އެއް މައުލޫމާތުތައް ހުށަހެޅުން މަދުކުރުމާއި ފޯމު ފުރުމަށް ހޭދަކުރާ ވަގުތު ކުޑަކުރުމަށްޓަކައި ފޯމުތައް ކުރު ކުރެވޭނެ ގޮތްތައް ދެނެގަތުމެވެ. އަދި އެއް މައުލޫމާތުތަކެއް ތަކުރާރުކޮށް ހުށަހަޅަން ނުޖެހޭނެ ގޮތަކަށް ހިދުމަތްތައް ފަރުމާކުރަނީ ވެސް މި ޓީމުގެ މަސައްކަތުންނެވެ.

"ސޮލިއުޝަން ޓީމުގެ މަސައްކަތްތައް ރޭވިފައިވަނީ ފަސް މަރުހަލާއަކަށް. އެ މަރުހަލާތަކަކީ ފުރަތަމަ ހިދުމަތްތައް ދިރާސާ ކުރުން. ދެވަނައަށް ހިދުމަތްތައް ފަރުމާކުރުން. އެއަށްފަހު ހިދުމަތަށް ގެނެވުނު ބަދަލުތައް އިދާރާތަކާ އެކީ މަޝްވަރާ ކުރުން. އަދި އިދާރާތަކާ އެކު އެއްބަސް ވެވޭ ގޮތަށް ހިދުމަތްތައް ވަންގަވް ގައި ފަރުމާކުރުން. އެންމެ ފަހުން ހިދުމަތްތައް ޓެސްޓު ކުރުމަށްފަހު ޕަބްލިޝްކުރާނީ،" ވަންގަވް ގެ ސޮލިއުޝަން ލީޑު މުހައްމަދު އަރުޝަދު ވިދާޅުވި އެވެ.

ވަން ގަވް އިން ހިދުމަތެއް ދޭން ފެށުމުގެ ކުރިން ކުރަން ޖެހޭ ދިރާސާތައް ނިންމާ, ހިދުމަތް އެންމެ ރަނގަޅަށް ދިނުމަށް ވަން ގަވްގެ ހިޔާލުތައް މުއައްސަސާތަކަށް ހުށަހަޅައެވެ. ހިދުމަތް އާއްމުންނަށް މި ޕްލެޓްފޯމުން ދޭން ފަށަނީ ވަން ގަވް އާއި ހިދުމަތް ދޭ ފަރާތާ ދެމެދު ގިނަ މަޝްވަރާތައް ކޮށް, ހިޔާލު ބަދަލުކުރުމަށް ފަހު ދެ ފަރާތުން ވެސް އެއްބަސްވާ ގޮތަކަށެވެ. އަދި ހިދުމަތެއް މި ޕްލެޓްފޯމުން ދޭން ފަށަނީ ސޮލިއުޝަން ޓީމުން ޓެސްޓިންގައި ގިނަ މަރުހަލާތަކެއް ހޭދަކުރުމަށް ފަހު އޭޖެންސީތަކުގެ އެޕްރޫވަލްއާ އެކުގައެވެ.

މި ހުރިހާ މަސައްކަތަކީ ވެސް މި ޕްލެޓްފޯމުގެ މަގްސަދު ހާސިލްކޮށް މި ޕްލެޓްފޯމަކީ އާއްމުންނަށް ފަސޭހަ ކަމާ އެކު އަވަސް ހިދުމަތްތައް ފޯރުކޮށްދިނުމަށް ކުރަމުންދާ މަސައްކަތެވެ.

ވަން ގަވް ޕްލެޓްފޯމުން އާންމު ހިދުމަތްތައް ބަދަލު ގެނެސް ޑިޖިޓަލައިޒް ކޮށްފައި ވަނީ ހިދުމަތަށް އެދި ހުށަހަޅާ ފަރާތްތަކަށް ފަސޭހައިން ހުރިހާ މައުލޫމާތުތެއް ލިބޭނެ ގޮތަށެވެ. މ މި ޕްލެޓްފޯމުން ހިދުމަތަކަށް އެދި ހުށަހެޅުމުގެ ކުރިން އެ ހިދުމަތަކަށް އެދޭ ފަރާތުގެ ހުންނަން ޖެހޭ ޝަރުތުތަކާއި ހިދުމަތަށް އެދޭ އިރު ބޭނުންވާނެ ހުރިހާ ލިޔެކިޔުންތަކުގެ މައުލޫމާތުތައް އިދާރާއަށް ގުޅުމުގެ ބަދަލުގައި ވަންގަވް މެދުވެރިކޮށް ބަލާލެވޭނެއެވެ. ހިދުމަތަކަށް އެދި ހުށަހަޅާ އިރު ވަންގަވް މެދުވެރިކޮށް ފަސޭހަކަމާ އެކު އެޕްލިކޭޝަން ފޯމު ފުރާލެވޭނެއެވެ. އަދި ހިދުމަތް ހޯދުމަށް ހޭދަވާ މުއްދަތުވެސް ފެންނަން ހުންނާނެއެވެ. އަދި ހިދުމަތުގެ ޕްރޮގްރެސް ސްޓޭޓަސްތައްވެސް ފެންނަން ހުރެ އެވެ. އަދި މި ޕްލެޓްފޯމު މެދުވެރިކޮށް އެހެން ޕޯޓަލްއަކަށް ރީޑައިކްޓުވާ ހިދުމަތްތަކަށްވެސް, ހިދުމަތް ހޯދާ ފަރާތުން ބޭނުންވާނެ ހުރިހާ މައުލޫމާތުތަކެއް "ވަން ގަވް" އިން ފެންނާނެ އެވެ.

ވަން ގަވްގެ ޓީމުން ވަނީ އާއްމުނަށް ޒަމާނާ ގުޅޭ ގޮތަށް ހިދުމަތްތައް ހޯދައިދިނުމަށް ބުރަ މަސައްކަތްތަކެއް ކޮށްފަ އެވެ. މި ޕްލެޓްފޯމަކީ މިހާރަށްވުރެ ގިނަ އިދާރާތަކާއި މުއައްސަސާތަކެއްގެ ހިދުމަތްތައް އެއްތަނަކުން ލިބޭނެ ޕްލެޓްފޯމަކަށް ހެދުމަށް ދަނީ މަސައްކަތްކުރަމުންނެެ. މިވަގުތު 9 އިދާރާއަކާ އެކީ ދަނީ މަސައްކަތްކުރެވެމުންނެވެ.

ނޯޓު: މިއީ ޓްރޭޑްނެޓުން ޑިވެލޮޕްކޮށްފައިވާ "ވަންގަވް" ޕްލެޓްފޯމާ ގުޅޭ އެޑްވަޓޯރިއަލްއެކެވެ.