އީކޮމާސް ފީޗާތައް ހިމަނައިގެން މޯލްޑިވް ގޭހުގެ ވެބްސައިޓް އަޕްގްރޭޑްކޮށްފި

މޯލްޑިވް ގޭހުގެ ވެބްސައިޓު އަޕްގްރޭޑްކޮށް ލޯންޗުކޮށްފި އެވެ.

މޯލްޑިވް ގޭހަށް 25 އަހަރު ފުރުން ފާހަގަ ކުރުމަށް މިއަދު ބޭއްވި ރަސްމިއްޔާތުގައި މި ވެބްސައިޓް ލޯންޗްކޮށް ދެއްވީ އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމެވެ.

މޯލްޑިވް ގޭހުގެ ވެބްސައިޓު ލޯންޗުކޮށްފައި ވަނީ އެ ކުންފުނިން ވިއްކާ ޕްރޮޑަކްޓްތައް އެއް ތަނަކުން ފަސޭހައިން ބްރައުސްކޮށްލެވޭނެ ހާއްސަ އީކޮމާސް ފީޗާއަކާ އެކު އެވެ. އެ ކުންފުނިން ވިއްކާ ކައްކާ ގޭހުގެ އިތުރުން އިންޑަސްޓްރިއަލް އަދި މެޑިކަލް އޮކްސިޖަން އާއި ނައިޓްރަސް އޮކްސައިޑް އާގަން އަދި ކާބަންޑައޮކްސައިޑް ފަދަ ގޭހުގެ އެކި ޕްރޮޑަކްޓްތައް އެ ކުންފުނީގެ ވެބްސައިޓުން މިހާރު ގަނެވޭނެ އެވެ.

މޯލްޑިވް ގޭހުގެ އަހަރީ ދުވަސް ފާހަގަ ކުރުމަށް މިއަދު ބޭއްވި ރަސްމިއްޔާތުގައި އެ ކުންފުނީގެ މަސައްކަތްތައް އިތުރަށް ހަރުދަނާ ކުރުމުގެ ގޮތުން ގިނަ މަސައްކަތްތަކެއް ރާވާފައި ހުރިކަން އިއުލާންކުރި އެވެ. އޭގެ ތެރޭގައި އޮފީސް އިމާރާތެއް އެޅުމާއި ގޭހާއި ގުޅުން ހުރި އެކި ވަސީލަތްތައް ވިއްކާނެ ފިހާރައެއް ހުޅުވުމާއި ކައްކާ ގޭހުގެ ސްޓޯރޭޖް އިތުރު ކުރުމާއި އޭސީއަށް ބޭނުންކުރާ ގޭހުގެ ބާވަތް ބަލްކުކޮށް ރާއްޖެ އެތެރެ ކުރުން ހިމެނެ އެވެ.

މި ކުންފުނީގެ އަހަރީ ދުވަސް ފާހަގަ ކުރުމުގެ ގޮތުން އަހަރީ ދުވަހުގެ ކޭކެއް ވެސް މިއަދު ފެޅި އެވެ.

މޯލްޑިވް ގޭހަކީ 1999 ވަނަ އަހަރު ކައްކާ ގޭހުގެ ހިދުމަތް ދިނުމަށް އުފެއްދި ކުންފުންޏެކެވެ. އެ ކުންފުނިން މިހާރު ދަނީ މެޑިކަލް އަދި އިންޑަސްޓްރިއަލް ގްރޭޑުގެ ގޭހުގެ ޕްރޮޑަކްޓްތައް ވެސް ވިއްކަމުންނެވެ.