ގިރުނބާ ޕޯޓަލް އާއެކު ފެނަކައިގެ މަސައްކަތްތައް އާ ހަރުފަތަކަށް!

ސްކްރީނުން ފެންނަމުން ދިޔައީ ރާއްޖޭގެ އެންމެ އުތުރުގައި އޮތް ހއ. ތުރާކުނުގައި ފެނަކައިން ހިންގަމުންދާ އިންޖީނުގެ އެވެ. އިންޖީނުގޭގެ ފޮޓޯއެއް ނުވަތަ ވީޑިއޯއެއް ނޫނެވެ. އެއީ އިންޖީނުގެއަކުން، އެ އިންޖީނުގެ ހިންގާ ފަރާތަށް އެނގުން އެންމެ މުހިއްމު މައުލޫމާތުތަކެވެ.

ސްކްރީނުން، އެރަށުގައި ރަނގަޅު ހާލަތުގައި ހިނގަމުންދާ ދެ އިންޖީނު ފެހި ކުލައިން އޮތީ ފެންނާށެވެ. އަދި މަރާމާތަށް ނިންވާލާފައިވާ އިންޖީނުގެ ހާލަތު ރީނދޫ ކުލައިން ފެނެ އެވެ. ހަމަ އެ ސްކްރީނުން އެ އިންޖީނުގޭގައި ރައްކާކޮށްފައި ހުރި ޑީސަލްގެ މިންވަރާއި ލުބް އޮއިލް ފަދަ، އިންޖީނެއް ހިންގުމަށް ކޮންމެހެން ބޭނުންވާ ސާމާނުގެ ހުރިހާ ތަފްސީލެއް ހުރީ ފެންނާށެވެ. އިންޖީނު އޯވާހޯލް ކުރި އަދަދު ވެސް އެނގެން އޮތެވެ.

މިއީ، ފެނަކަ ޑިޖިޓަލް ކުރުމަށް ކުރަމުންދާ މަސައްކަތްތަކުގެ ތެރެއިން ތައާރަފް ކުރި ޑޭޝްބޯޑް "ގިރުނބާ" ގެ އެންމެ މަންޒަރެކެވެ. މިއީ، ސުމަކުން ފަށައިގެން، ފެނަކައިގެ ޑިވެލޮޕަރުން ޑިވެލޮޕްކޮށްފައިވާ ޕޯޓަލްއެކެވެ.

މަދު އަތޮޅެއްގައި ފިޔަވައި ގުދުރަތީ ގޮތުން ކޮންމެ ދެ ރަށެއް ވެސް ކަނޑަކުން ވަކިވެފައިވާ މި ރާއްޖޭގެ 157 ރަށަކަށް ފެނަކައިން އަސާސީ ހިދުމަތްތައް ދެމުން އަންނައިރު، މި ހުރިހާ މަސައްކަތްތަކެއް ކުރަން ޖެހެނީ، ލިޔެކިޔުމުންނާއި ފޯނުގެ ޒަރީއްޔާއިންނެވެ. މިއީ 520 އިންޖީނާއި، އެތައް އާރުއޯ ޕްލާންޓެއްގެ ވާހަކަ އެވެ. އަދި އެއާ ގުޅިފައިވާ އެތައް ހާސް ޑޭޓާއެއްގެ ވާހަކައެވެ.

ކޮންމެ ރަށެއްގައި ހިންގަމުންދާ ކޮންމެ އިންޖީނެއް، ކޮންމެ ތިރީސް މިނެޓަކުން، ވަކިވަކިން ލޮގް ނަގައި، ޑިއުޓީ ކުރާ މުވައްޒަފުން ޝީޓަކަށް އަޅަމުންދާއިރު، އެހެން މުވައްޒަފުން އެ ޝީޓްތައް ސްކޭންކޮށް، ހެޑް އޮފީހުގެ އޮޕަރޭޝަންސް ޑިޕާޓްމަންޓަށް ފޮނުވުމުގެ މަސައްކަތް ކުރަންޖެހެއެވެ. އަދި ހެޑް އޮފީހުގެ މުވައްޒަފުން އެ ޑޭޓާތައް ސިސްޓަމްގައި ރައްކާކޮށް ފައިލް ކުރަމުން ދެއެވެ.

އިންޖީނުގޭގެ ހާލަތު ދެނެގަންނަން ޖެހެނީ ވެސް މި ގޮތަށް ރައްކާ ކުރަމުންދާ މައުލޫމާތުތަކަށް ބަލައިގެންނެވެ. މައްސަލައެއް ދިމާވުމުން ފިޔަވަޅެއް އަޅަން ޖެހޭނީ ވެސް ހަމަ މި މައުލޫމާތުތަކުގެ މައްޗަށް ބިނާކޮށެވެ. މި ކަމުގެ ސަބަބުން އެންމެ އެދެވޭ ހައްލު، އެންމެ އެދެވޭ އަވަސް މިނެއްގައި ހޯދައި ދިނުމަކީ، ފަސޭހަކަމެއް ނޫނެވެ.

އިންސާނުންގެ ބައިވެރިވުމަށް އެކަނި ބަރޯސާވެ ގޮތް ނިންމުމަކީ، ގިނަ ވަގުތު ހޭދަވެ، އޮޕަރޭޝަންތަކަށް ހުއްޓުމެއް އައުމަށް މެދުވެރިވެދާނެ ސަބަބެކެވެ. ގިރުނބާ ޕޯޓަލްއާ އެކު، އޮޕަރޭޝަނަށް ބޭނުންވާ މައުލޫމާތުތައް ވަގުތުން ވަގުތަށް ބަލައިލެވި، މައްސަލައެއް ދިމާވުމުން އެންމެ އެކަށީގެންވާ ހައްލު، އެންމެ ބޭނުންވާ ދިމާއަށް ހޯދައި ދެވޭނެ އެވެ.

ގިރުނބާ ޕޯޓަލް އެއްކޮށް ފުރިހަމަވުމުން، ކުރިން މެނުއަލްކޮށް އެންޓާ ކުރަމުން ދިޔަ އިންޖީނުތަކުގެ ޕެރަމީޓާސް، އޮޓަމެޓިކުން މި ބޯޑުގައި ރައްކާ ކުރެވިގެން ދާނެ އެވެ. އަދި ފެނުގެ ހިދުމަތް ދޭ ރަށްރަށުގައި ގާއިމު ކުރެވިފައިވާ އާރުއޯ ޕްލާންޓްތަކުގެ ޑޭޓާވެސް މި ގޮތަށް ރައްކާ ކުރެވިގެން ދާނެ އެވެ.

މި ޕޯޓަލް ފުރިހަމަވުމުން، ރަށެއްގައި އިންޖީނެއް ނިވުނަސް، ފޯނުކޯލާއި އީމެއިލް ފަދަ އިންސާނުންގެ މުއާމަލާތްތަކާއި ނުލައިވެސް، ގިރުނބާ ޕޯޓަލް މެދުވެރިކޮށް ވަގުތުން އެކަން ހެޑް އޮފީހަށް އެނގޭނެ އެވެ. އަދި ރައްޔިތުންގެ އަސާސީ ހައްގުތަކާއި ގުޅިފައިވާ ނިންމުންތައް ވަގުތުން ނިންމިގެންދާނެ އެވެ. މި ޕޯޓަލް އަކީ ފެނަކައިން ދޭ ހިދުމަތްތައް އިތުރަށް ހަރުދަނާ ކުރުމަށް އިންގިލާބީ ބަދަލެއް ގެނުވާނެ ޕްލެޓްފޯމެކެވެ.

މި ޕޯޓަލްގައި ބޭނުންވާ ހުރިހާ ޑޭޓާއެއް ސާފުކޮށް ފެންނަން ހުރުމުން، ކުންފުނީގެ އޮޕަރޭޝަންތަކަށް ބޭނުންވާނެ ކަންކަން ފުރިހަމަ ކުރުމަށް ދުރާލާ ތައްޔާރު ވެވޭނެ އެވެ. ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވީ ރަށްރަށަށް ކުރި ދަތުރުތަކުގައި ރަށްރަށުގެ އިންޖީނުގެތަކާއި ހެޑް އޮފީހުގެ ގުޅުން ކެނޑިފައިވާ މިންވަރު އިހުސާސްކުރެވުނު ކަމަށެވެ. އަދި ގިރުނބާ ޕޯޓަލް ފަދަ ޑޭޓާ ޑިޖިޓަލައިޒް ކުރެވޭނެ ޕޯޓަލްއެއް ފަރުމާކުރަން ޖެހުނީ މި ސަބަބާ ހުރެ ކަމަށް ވެސް ވިދާޅުވި އެވެ.

މުއާޒް ވިދާޅުވީ ގިރުނބާ އަކީ މަސައްކަތްކޮށް ނިމެންދެން ހުޅު ނިވުނަ ނުދީ ބަހައްޓަން ބޭނުންކުރާ އާލާތެއް ކަމަށާއި ފެނަކައިން މި ތައާރަފް ކުރި ގިރުނބާގެ ބޭނުމަކީ ވެސް، އަދާހަމަ ތަފްސީލުތަކެއްގެ މައްޗަށް ބިނާކޮށް ނިންމާ ނިންމުންތަކުން ހިދުމަތްތައް ނުހުއްޓި ކުރިއަށް ގެންދިޔުން ކަމަށެވެ.

ގިރުނބާ ޕޯޓަލް އަކީ ޔަގީންކަމާ އެކު ފިޔަވަޅުތައް އެޅުމަށް ހުޅުވުނު މުހިއްމު ދޮރެކެވެ. މިއީ ދުރާލައި ތައްޔާރުވާން އެކުލަވާލެވުނު ތާވަލެކެވެ. މިއީ މުވައްޒަފުންގެ މަސައްކަތަށް ލިބުނު ލުއި ފަސޭހައެކެވެ. މިއީ ކަރުދާސް މަދުކުރެވި، ހިންގުމުގެ ހަރަދު ކުޑަވެގެންދާނެ މުހިންމު ބަދަލެކެވެ. އަދި މިއީ ރައްޔިތުންނަށް ދޭންޖެހޭ ހިދުމަތްތަކަށް ފުރިހަމަކަމެއް ގެނުވާނެ ހެޔޮ ފާލެކެވެ.

ނޯޓު: މިއީ ފެނަކައިގެ އެޑްވަޓޯރިއަލް އާޓިކަލްއެކެވެ.