އައްޑޫގައި ފަހުން ހެދި މަގުތައް އަލުން ކޮންނަން ޖެހިއްޖެ

އައްޑޫގައި ތާރު އަޅައިގެންނާއި ގާ އަޅައިގެން ދާދިފަހުން ހެދި މަގުތަކުގެ އަޑީގައި އަޅާފައިވާ ހޮޅިތައް ފިތޭތީ، އެ މަގުތަކުން ތާރާއި ގާ ނެގުމަށްފަހު އަލުން އެ މަގުތަކުގެ މަސައްކަތް ކުރަން ޖެހިއްޖެ އެވެ.

ރާއްޖޭގައި ދެވަނަ އަށް އެންމެ އާބާދީ ބޮޑު އައްޑޫގެ މަގުތައް އިންޑިއާގެ އެފްކޯންސް ކުންފުނިން ފެށީ 2022 ވަނަ އަހަރުގެ ކުރީކޮޅުގަ އެވެ. އެ މަޝްރޫއުގެ ދަށުން ހުރިހާ ރަށްތަކެއްގައި ޖުމްލަ 40 ކިލޯމީޓަރުގެ މަގު، ތާރު އަޅައިގެންނާއި ގާ އަޅައިގެން ތަރައްގީކުރަން އެ ކުންފުންޏާ އޮތީ ހަވާލުކޮށްފަ އެވެ.

އެއް ބިލިއަން ރުފިޔާގެ އެ މަޝްރޫއުގެ ދަށުން ގިނަ މަގުތަކެއްގައި ތާރު އަޅައި އަދި ގާ އަތުރުން ގާތްގަނޑަކަށް ނިމިފައިވާއިރު، އެ މަސައްކަތް މިހާރު އޮތީ އަލުން ކުރަން ޖެހިފަ އެވެ. އެއީ މަގުތަކުގައި އެކި ބޭނުންތަކަށް ވަޅުލާފައިވާ ކޭބަލްތައް ހިމެނޭ ހޮޅިތައް ފިތެމުންދާތީ ކަމަށް "މިހާރު" އަށް އެނގިފައިވެ އެވެ.

މިކަން ވެސް އެނގުނީ ކުންފުނިން ހެދި ޓެސްޓަކުން ކަމަށްވެ އެވެ.

އެހެންވެ، އެ ހޮޅިތައް ބަދަލުކުރަން ހިތަދޫގެ މަގުތައް ދަނީ މިހާރު ކޮންނަމުންނެވެ.

އެ ރަށުން ވާހަކަ ދެއްކި ބައެއް މީހުން ބުނީ އަލުން އެ މަސައްކަތް ކުރުމަށް ތާރުގަނޑު ކެނޑުމާއި ގާތައް ނަގަން ޖެހުމުން މަގުތައް ހަލާކުވަމުންދާ ކަމަށެވެ.

އެކަމާ ގުޅިގެން ސުވާލުކުރުމުން އައްޑޫގެ މޭޔަރު އަލީ ނިޒާރު ވިދާޅުވީ ފެނާއި ނަރުދަމާގެ ހޮޅިތަކުގައި މައްސަލަ އުޅޭތީ ދޭތެރެއަކުން ފެނަކައިން ވެސް ތާރު ކަނޑައިގެން މަގުތައް ކޮންނަ ކަމަށެވެ.

"އަބަދުވެސް ކޮންމެވެސް މައްސަލައެއް އުޅޭތީ މަގުތައް ކަނޑައިގެން އުޅޭނީ،" އޭނާ ވިދާޅުވި އެވެ.

އައްޑޫގައި ކަރަންޓް ކެނޑޭ މައްސަލަ ބޮޑުވެފައި ވާއިރު، އައްޑޫ ސިޓީ ކައުންސިލުން އާންމުކުރި ވީޑިއޯ އިންޓަވިއެއްގައި މޭޔަރު ނިޒާރު ކުރިން ވިދާޅުވެފައިވަނީ އެ މައްސަލަ ދިމާވެގެން އުޅެނީ ގަމަށް ކަރަންޓް ދީފައިވާ ހައި ވޯލްޓޭޖް ކޭބަލްގެ މައްސަލައަކުން ކަމަށެވެ. އެކަމަކު އެ ކޭބަލް ވަޅުލާފައި އޮތް ސަރަަހައްދު ސާފު ނުވާ ކަމަށާއި އޭގެ ސަބަބުން އައްޑޫގެ އެކި ސަރަހައްދުތަކުން ކަރަންޓް ކެނޑުމުގެ މައްސަލަ ދިމާވާ ކަމަށް ނިޒާރު ވިދާޅުވެފައިވެ އެވެ.

އައްޑޫގެ މަގުތަކުގައި ފެންބޮޑުވާ މައްސަލައަށް ދާއިމީ ހައްލެއް ގެނައުމަށް ހިތަދު އާއި މަރަދޫ އާއި މަރަދޫ ފޭދޫ އާއި ހުޅުދޫގެ އިތުރުން މީދޫގައި ފެން ހިންދާ ނިޒާމު ގާއިމް ކުރުމާއި މުޅި އައްޑޫގައި 103 ކިލޯމީޓަރުގެ ސްޓޯމް ވޯޓާ ޑްރެއިނޭޖެއް ވެސް މި މަޝްރޫއުގައި ގާއިމްކުރަން ވަނީ އެފްކޯންސްއާ ހަވާލުކޮށްފަ އެވެ.

އެކަމަކު މަސައްކަތުގެ ކުރީކޮޅު ވެސް އެ ކުންފުނިން މަގު ހެދުމުގެ މަސައްކަތް ކުރިއަށް ގެންދިޔަ ގޮތުން ވަރަށް ބޮޑަށް ފާޑު ކިޔުން އަމާޒުވި އެވެ. މަގުތައް ކޮނުނުއިރު ބައެއް ގެތަކުގެ ފާރުތައް ވެއްޓިގެން ވެސް އޭރު ބައެއް މީހުން ކަންބޮޑުވުން ފާޅުކޮށްފައިވެ އެވެ.

މިއީ އައްޑޫގައި ކުރިއަށް ގެންދިޔަ މަގު ހެދުމުގެ އެންމެ ބޮޑު މަޝްރޫއު އެވެ.