ނަޝީދު ދޫދެއްވައިފި، ނިޒާމީ ވޯޓުގެ ވާހަކަ ހުއްޓާލައި، މުއިއްޒަށް ފުރުސަތު ދޭން ނިންމައިފި

ރާއްޖޭގައި ވެރިކަން ކުރާ ނިޒާމު ބަދަލުކުރަން ޑިމޮކްރެޓްސްގެ ފަރާތުން ރައްޔިތުންގެ މަޖިލިސް މެދުވެރިކޮށް ކުރަމުންދާ މަސައްކަތް މި ވަގުތަށް މަޑުޖައްސާލައި، ރިޔާސީ ނިޒާމެއްގައި ވެރިކަން ކުރުމުގެ ފުރުސަތު އިންތިހާބީ ރައީސް ޑރ. މުހައްމަދު މުއިއްޒަށް ދޭން އެ ޕާޓީން ނިންމައި އެކަން އެ މަނިކުފާނަށް ދަންނަވާފައިވާނެ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.

މަޖިލީހުގެ މިއަދުގެ ޖަލްސާ ފައްޓަވަމުން، ނަޝީދު ވިދާޅުވީ އިންތިހާބީ ރައީސް މުއިއްޒާ އެކު އިއްޔެ ބޭއްވި ބައްދަލުވުމުގައި، ނިޒާމު ބަދަލުކުރުމާ މެދު ރައްޔިތުންގެ މެދުގައި އާންމު ވޯޓެއް ނަގަން އިލެކްޝަންސް ކޮމިޝަން (އީސީ) އަށް އަންގައި ގަރާރެއްގެ މަސައްކަތް މަޖިލީހުގައި ކުރިއަށްދާ ކަމުގެ މައުލޫމާތު ހިއްސާ ކުރެއްވި ކަމަށެވެ.

"އެހެން ނަމަވެސް، އަޅުގަނޑުމެން ވެސް އަދި އެ ހުށަހެޅި ޑިމޮކްރެޓްސް އިން ވެސް އެދެނީ އެ މަސައްކަތް މި ވަގުތު ނުކުރުމަށޭ،" ނަޝީދު ވިދާޅުވި އެވެ.

އެ މަނިކުފާނު ވިދާޅުވި ގޮތުގައި ޑިމޮކްރެޓްސް އިން އެދެނީ މުއިއްޒުގެ ސަރުކާރު އެކުލަވާލައި، ރިޔާސީ ނިޒާމެއްގައި އެ ސަރުކާރުގެ މަސައްކަތްތައް ކުރިއަށް ގެންދިއުމަށެވެ.

އެކަމަކު، ނިޒާމު ބަދަލުކުރުމުގެ ވާހަކަ ރައްޔިތުންގެ މެދުގައި ފިލާ ނުދާ ކަން މުއިއްޒަށް ދެންނެވި ކަމަށް ވިދާޅުވި އެވެ.

އެކަމުގައި ފަހުން ނިޒާމު ބަދަލުކުރުމުގެ މަސައްކަތް ކުރިއަށް ގެންގޮސް ފެންނަ ނުފެންނަ ވޯޓު ނަގާނެ ކަމުގެ އިޝާރާތެއް މުއިއްޒު ދެއްވި ކަމަށް ނަޝީދު ހާމަކުރެއްވި އެވެ.

"...ވިދާޅުވި، ވަގުތުގައި އެ މަސައްކަތަށް އަނބުރާ ގޮސް، ފެންނަ ނުފެންނަ ވޯޓު އަހައި، އެ މަސައްކަތް ކުރިއަށް ގެންދެވިދާނެ އޭ،" މުއިއްޒު އެހެން ވިދާޅުވުމަކީ ވަރަށް ހިތްހަމަޖެހޭ ވާހަކައެއްގެ ގޮތުގައި ފާހަގަކުރައްވައި އެ މަނިކުފާނު ވިދާޅުވި އެވެ.

އެއާ އެކު މުއިއްޒުގެ ރިޔާސީ ދައުރު ފަށައި ސަރުކާރުގެ މަސައްކަތްތައް ރީތިކޮށް ކުރިއަށް ގެންދިޔުމުގެ ފުރުސަތު ދެއްވުމަށް ނަޝީދު ވަނީ މަޖިލީހުގެ މެމްބަރުންގެ އަރިހުން އެދިވަޑައިގެންފަ އެވެ.

އަދި ރައްޔިތުންނާ އަހަންވީ ކޮން ސުވާލެއް ކަން މަޖިލީހުން ފާސްކޮށްފައިވާ ގަރާރުން ސާފު ނުވާތީ އެކަން ސާފު ކުރުމަށް އީސީން ފޮނުވާފައިވާ ސިޓީގެ މަސައްކަތް ކުރިއަށް ނުގެންދަން ނިންމެވި ކަން ނަޝީދު އިއުލާނުކުރެއްވި އެވެ.

މި މަހުގެ 30 ވަނަ ދުވަހުގެ ކުރިން ނިޒާމީ ވޯޓެއް ނަގަން ބާރު އެޅުމަށް ފަހު، ނަޝީދުގެ ރާގު ކުއްލިއަކަށް ބަދަލުވެފައިމިވަނީ، މަޖިލީހުގެ އަޣުލަބިއްޔަތު އޮތް އެމްޑީޕީގެ ގައުމީ މަޖިލީހުން ބަރުލަމާނީ ނިޒާމަށް ތާއީދުނުކުރަން ފާސްކޮށްފައިވަނިކޮށެވެ.

މަޖިލީހުން ފާސްކޮށްފައިވާ ގަރާރާ ގުޅޭގޮތުން އެމްޑީޕީން ގޮތެއް ނިންމުމަށް މިރޭ ބޭއްވި އެ ޕާޓީގެ ގައުމީ މަޖިލީހުގެ ބައްދަލުވުމުގައި ވާހަކަ ދެއްކެވި ހުރިހާ މެމްބަރުންގެ ފަރާތުން ވެސް ފެނުނީ ނިޒާމީ ބަދަލަކަށް ވުރެ ޕާޓީގެ ކުރީގެ ރައީސް މުހައްމަދު ނަޝީދާއި އެ މަނިކުފާނު ފަހަތުގައި ހުންނަވައިގެން ޑިމޮކްރެޓްސް އާ މެދު އޮތް ހިތްހަމަނުޖެހުމެވެ. ވަރަށް ޖޯޝުގައި އެ ޝުއޫރު ގައުމީ މަޖިލީހުގެ މެމްބަރުން ފާޅުކުރައްވަމުން ގެންދެވީ، ބަރުލަމާނީ ނިޒާމާ ދެކޮޅަށެވެ. އެ ގޮތަށް ބޭނުންވަނީ، މި ފަހަރުގެ ރިޔާސީ އިންތިހާބުގައި އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހަށް އެންމެ ބޮޑު ގެއްލުމެއް ދެއްވި ނަޝީދު އެ ނިޒާމަށް ތާއީދުކުރައްވާތީ ކަމަށް ގިނަ ބޭފުޅުން ވަރަށް ފާޅުގައި ވިދާޅުވަމުން ގެންދެވި އެވެ.

މެމްބަރުންގެ ވާހަކަތަކުން ގައުމީ މަޖިލީހުގެ ރޫހު ހުރި ގޮތް ވަރަށް ސާފު ކަމަށް ވިދާޅުވެ، ރިޔާސަތުން އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއިލް ވަނީ ސެކްރެޓޭރިއަޓުގެ ފަރާތުން ގަރާރެއް ހުށަހަޅުއްވައިފަ އެވެ.

އެ ގަރާރުގައި ބުނީ، ރާއްޖޭގައި ވެރިކަން ކުރުމުގެ ނިޒާމު ބަދަލުކުރުމާ މެދު އާންމު ވޯޓެއް ނަގާ ނަމަ، އެމްޑީޕީން ބަރުލަމާނީ ނިޒާމަށް ތާއީދު ނުކުރާނެ ކަމަށެވެ.

އެ ގަރާރު ފާސްކޮށްފައިވަނީ، އެ ވަގުތު ބައްދަލުވުމުގައި ތިއްބެވި 90 މެމްބަރުންގެ އިއްތިފާގުންނެވެ.