މުއިއްޒު ހުވާކުރުމުގެ ރަސްމިއްޔާތު އެދިވަޑައިގެންނެވި ގޮތަށް ކުރިއަށް ގެންގޮސްދޭނަން: ނަޝީދު

ކުރިއަށް އޮތް ފަސް އަހަރުގެ ދައުރަށް ވެރިކަމަށް އިންތިހާބުކުރި، ޑރ. މުހައްމަދު މުއިއްޒު މަގާމުގެ ހުވާކުރެއްވުމުގެ ރަސްމިއްޔާތު އެ ބޭފުޅުން އެދިވަޑައިގެންނެވި ގޮތަށް ކުރިއަށް ގެންދާނެ ކަމުގެ ޔަގީންކަން ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ދެއްވައިފި އެވެ.

އިންތިހާބީ ރައީސް މުއިއްޒާ ބައްދަލުކުރެއްވުމަށް ފަހު، ނޫސްވެރިންނާ ވާހަކަފުޅު ދައްކަވަމުން ނަޝީދު ވިދާޅުވީ، އެކަން ކުރައްވާނެ ކަމުގެ ޔަގީންކަން ދެއްވާފައިވާ ކަމަށާއި އާ ސަރުކާރަށް މަޖިލިހުގެ އިދާރާ އިން ދޭން ޖެހޭ ހުރިހާ އެއްބާރުލުމެއް ދޭނެ ވާހަކަ ވެސް ދަންނަވާފައި ވާނެ ކަމަށެވެ.

ގާނޫނުއަސާސީގެ 114 ވަނަ މާއްދާގެ ދަށުން، ރައީސުލްޖުމްހޫރިއްޔާގެ މަގާމަށް އިންތިހާބުވާ މީހަކު އަދި ރައީސުލްޖުމްހޫރިއްޔާގެ ނައިބުކަމަށް ކަނޑައަޅާފައިވާ މީހަކު މަގާމާ ހަވާލުވުމުގެ ކުރިން މަގާމުގެ ހުވާކުރަން އޮންނަނީ ރައްޔިތުންގެ މަޖިލީހުގެ ޖަލްސާއެއްގަ އެވެ.

އެ ޖަލްސާ، ނޮވެންބަރު 17، 2023 ވާ ހުކުރު ދުވަހު ބޭއްވުމުގެ އިންތިޒާމުތައް ކުރިއަށް ގެންދާ ކަމަށް މަޖިލީހުގެ އިދާރާއިން ވެސް ވަނީ ބުނެފަ އެވެ.

މަޖިލިހުގެ އިދާރާގައި މުއިއްޒާއި ނަޝީދު މިއަދު ބޭއްވެވި ބައްދަލުވުމަށް ފަހު މުއިއްޒު ވިދާޅުވީ، އެއީ ވަރަށް ކާމިޔާބު ބައްދަލުވުމެއް ކަމަށާއި ސަރުކާރު އެކުލަވައިލުމާއި އެ މަނިކުފާނު ހުވާ ކުރެއްވުމާއި އަދި އެހެން ހުރިހާ މަރުހަލާއެއްގައި މަޖިލިހުގެ އިދާރާ އިން އެއްބާރުލުން ދީ، ޒިންމާދާރު ގޮތެއްގައި މަޖިލީހުގެ މި ދައުރު ފުރިހަމަ ކޮށްދެއްވާނެ ކަމުގެ ޔަގީން ކަން ނަޝީދު ދެއްވެވި ކަމަށެވެ.

"މެޖޯރިޓީ ލީޑަރު ވެސް މައިނޯރިޓީ ލީޑަރު ވެސް އެ ބޭފުޅުންގެ ފަރާތުން ޒިންމާދާރު އޮޕޮސިޝަނެއްގެ ގޮތުގައި ސަރުކާރު ޖަވާބުދާރީ ކުރުވުމުގައި ދެމިތިއްބަވާނެ ކަމުގެ، ގައުމު މަސްލަހަތު އިސްކޮށްގެން،" މުއިއްޒު ވިދާޅުވި އެވެ.

މިއީ މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގެ ބޮޑު ކާމިޔާބީއާ އެކު، އިންތިހާބީ ރައީސް މުއިއްޒާއި މަޖިލިހުގެ ރައީސް ނަޝީދު ބައްދަލުކުރެއްވި ފުރަތަމަ ފަހަރެވެ.

އިންތިހާބީގެ ކާމިޔާބީ ފާހަގަކުރަން ރޭ ބޭއްވި ބައްދަލުވުމުގައި ވެސް އިންތިހާބީ ރައީސް މުއިއްޒު ވަނީ ޒިންމާދާރު އިދިކޮޅު ޕާޓީއެއްގެ ދައުރު އަދާކޮށްދިނުމަށް އެމްޑީޕީ އަށް ގޮވާލައްވައިފަ އެވެ.