ފުރުސަތު ދީފި ނަމަ "ގެއްލުނު ކަނޑު" ވެސް އަނބުރާ ހޯދާނަން: މުއިއްޒު

އަންނަ ރިޔާސީ އިންތިހާބު ކާމިޔާބުކުރުމުގެ ފުރުސަތު ދީފި ނަމަ، ދިވެހިންނަށް "ގެއްލުނު ކަނޑު" ވެސް ގާނޫނީ އިމުގެ ތެރެއިން އަނބުރާ ހޯދައިދޭނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

މުއިއްޒު އައްޑު އަށް ކުރައްވާ ދަތުރުގައި މިއަދު ހަވީރު ސ. ހުޅުދޫމީދޫގައި ބޭއްވި ޖަލްސާގައި ވިދާޅުވީ، އެ ރަށުގައި ހުންނަ އައިސްޕްލާންޓް އޭނާގެ ވެރިކަމެއްގައި މަސް ފެކްޓަރީއަކަށް ބަދަލުކުރައްވާނެ ކަމަށެވެ. އެކަން ކުރާއިރު، ރާއްޖޭގެ ކަނޑުގެ ސަރަހައްދުން "ގެއްލުނު" ހިސާބު އަނބުރާ ހޯދަން ވެސް ޖެހޭ ކަމަށް އޭނާ ވިދާޅުވި އެވެ.

"އަޅުގަނޑުމެންގެ އަތުން ގާނޫނާއި ގަވާއިދާ ހިލާފަށް އަތުލި ކަނޑު އަނބުރާ ހޯދާނަން،" މުއިއްޒު ވިދާޅުވި އެވެ.

ރާއްޖެ އާއި މޮރިޝަސްއާ ދެމެދު އޮންނަ ކަނޑުގެ ސަރަހައްދު ނުވަތަ އައްޑޫގެ ދެކުނު އޮންނަ ފުށު އަރާ ކަނޑުގެ ސަރަހައްދުގެ އިން މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ވަކިކުރުމުން، އިދިކޮޅުން ތުހުމަތުކޮށްފައި ވަނީ މި ސަރުކާރުގެ ސިއްރު ޑީލެއްގެ ދަށުން ރާއްޖޭގެ ކަނޑުގެ ސަރަހައްދުގެ ބައެއް "ވިއްކާލީ" ކަމަށެވެ.

އެ މައްސަލާގައި ޕީޕީއެމުން އިސްވެ އޮވެ ވަނީ އެކަމާ ދެކޮޅަށް އަޑުއުފުލައި، މުޒާހަރާތައް ވެސް ކޮށްފަ އެވެ.

މުއިއްޒު އައްޑުއަށް ކުރައްވާ ދަތުރުގައި މިރޭ މީދޫގައި ވެސް ޖަލްސާއެއް ބާއްވާނެ އެވެ.