ޑިމޮކްރެޓްސްގެ މެމްބަރުންނަށް ބިރު ދައްކާ ކަމަށް ބުނެ ހުށަހެޅި މައްސަލަ ބޭރުކޮށްލައިފި

"ދަ ޑިމޮކްރެޓްސް" ގެ ނަމުގައި އުފައްދަން މަސައްކަތް ކުރާ ޕާޓީ އަށް ސޮއިކުރި މީހުންނަށް ސަރުކާރުން ބިރު ދައްކާ ކަމަށް ބުނެ، އެ ޕާޓީ އުފެއްދުމުގައި އިސްކޮށް އުޅުއްވާ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައިނުގަނެ، މިއަދު ބޭރުކޮށްލައިފި އެވެ.

އެމްޑީޕީގެ ރިޔާސީ ޕްރައިމަރީގެ ބޮޑު ނާކާމިޔާބީ އަށް ފަހު ކުރީގެ ރައީސް މުހައްމަދު ނަޝީދު އުފެއްދެވި "ފިކުރެއްގެ ދިރުން" ފެކްޝަންގެ ޑިމޮކްރެޓްސް އަށް ސޮއިކުރި މީހުންގެ ލިސްޓު އިލެކްޝަންސް ކޮމިޝަން (އީސީ) ގެ ވެބްސައިޓުގައި އާންމުނުކުރަނީސް، އެ ލިސްޓު ލީކުވި މައްސަލައެއް ޑިމޮކްރެޓްސް އިން ވަނީ އެ ކޮމިޝަނަށާއި ފުލުހުންނަށް ވެސް ކުރިން ހުށަހަޅައިފަ އެވެ.

އެކަމާ ގުޅުވައި ހަސަން މަޖިލީހަށް ހުށަހެޅުއްވި މައްސަލައިގައި ވިދާޅުވީ، މި މަހުގެ އެއް ވަނަ ދުވަހު އިލެކްޝަންސް ކޮމިޝަނަށް ހުށަހެޅި ފޯމުތަކުގައި ހުރި މައުލޫމާތު ސަރުކާރުން "ވަގަށް ހޯދައި" އެ މައުލޫމާތު ބޭނުންކޮށްގެން ފޯމު ހުށަހެޅި މީހުންނަށް ގުޅައި، ބިރު ދައްކަމުންދާ ކަމަށެވެ.

"ސަރުކާރުގެ މިނިސްޓަރުންނާއި ސަރުކާރު ހިއްސާވާ ކުންފުނިތަކުގެ ވެރިންނާއި ސަރުކާރުގެ އެކި މަގާމުތަކުގައި ތިއްބެވި ބޭބޭފުޅުން ވަޑައިގަންނަވަނީ އެ މުޑުދާރު އަމަލު ހިންގަވަމުންނެވެ،" އެމްޑީޕީގެ ރައީސް ނަޝީދުގެ އެންމެ އަރިސް ބޭފުޅުންގެ ތެރޭގައި ހިމެނޭ ހަސަން ހުށަހެޅުއްވި މައްސަލާގައި ވެ އެވެ.

ސްޓޫޑެންޓް ލޯނާއި ގޯތި ނުވަތަ ފްލެޓަށް އެދިފައިވޭތޯ ބެލުމަށް ފަހު، އެކަން ބޭނުންވާ ނަމަ، ޑިމޮކްރެޓްސް އަށް ކުރި ސޮއި އަނބުރާ ގެންދިއުމަށް ބުނެ އިންޒާރު ދެމުންދާ ކަމަށް ވެސް ހަސަން ތުހުމަތު ކުރެއްވި އެވެ.

ހަސަންގެ މައްސަލާގައި ތުހުމަތު ކުރެއްވި ގޮތުގައި އެ އަމަލުތައް ހިންގުމުގައި އިސްކޮށް ހުންނެވީ ރައީސް އިބްރާހިމް މުހައްމަދު ސޯލިހެވެ. ހަސަން ވިދާޅުވީ، އެއީ އެމްޑީޕީ އުފެދުނު ނުދިނުމަށް އޭރު އޮތް ސަރުކާރުން އެ ޕާޓީ އަށް ސޮއި ކުރި މީހުންނަށް ކުރިމަތިކުރުވި ފަދަ ބިރު ދެއްކުމުގެ އަމަލެއް ކަމަށެވެ.

"...އެ އަނިޔާވެރި ނާތަހުޒީބު އަމަލުތަކާއި ބިރު ދެއްކުމުގެ މަސައްކަތް މިއަދު ހިންގަވަމުން އެ ގެންދަވަނީ އެމްޑީޕީގެ އެތައް ހާސް މައުސޫމް މެމްބަރުންގެ ނަމުގައި އުފެދިފައި އޮތް ސަރުކާރެއްގައި ހުންނެވި އެމްޑީޕީގެ ރައީސުލްޖުމްހޫރިއްޔާ ކަމުގައި ވާތީ އެވެ،" އެ މައްސަލާގައި ބުންޏެވެ.

އެ މައްސަލަ މަޖިލީހުގެ މިއަދުގެ ޖަލްސާއަށް ބަލައިގަނެ، ބަހުސްކުރަން ފެނޭތޯ ބެލުމަށް ނެގުނު ވޯޓުގައި، އެ މައްސަލަ ބޭރުކޮށްލީ އެ ވޯޓުގައި ބައިވެރިވެވަޑައިގެންނެވި 33 މެމްބަރުން އަޣުލަބިއްޔަތުންނެވެ. އެ މައްސަލައަށް ބަހުސްކުރުމާ އެއްކޮޅަށް 16 މެމްބަރަކު ވޯޓު ދެއްވި އެވެ. މައްސަލަ ފާސްކުރަން 25 ވޯޓު ބޭނުންވެ އެވެ.

ހަސަން ހުށަހެޅުއްވި މައްސަލަ މަޖިލީހުން ބޭރުކޮށްލިއިރު، ޑިމޮކްރެޓްސްއަށް ސޮއިކުރި މީހުންގެ ލިސްޓު ލީކުވުމުގައި އިލެކްޝަންސް ކޮމިޝަން (އީސީ) ގެ އެއްވެސް އިހުމާލެއް ނެތް ކަމަށް އެ ކޮމިޝަނުން ރޭ ބުންޏެވެ.

ޑިމޮކްރެޓްސް އިން ހުށަހެޅި މައްސަލަ ބެލުމަށް ފަހު، އީސީން ނެރުނު ނޫސްބަޔާނެއްގައި ބުނީ އެއީ އެ ކޮމިޝަނުގެ ތެރެއިން ހިނގާފައިވާ ކަމެއް ނޫން ކަމަށެވެ. އެ ކަހަލަ ކަމެއް އެ ކޮމިޝަނުގެ އެއްވެސް މެމްބަރަކު ނުވަތަ މުވައްޒަފަކު ކޮށްފައި ނުވާ ކަމަށް އެ ބަޔާނުގައި ބުންޏެވެ.

މި އަހަރުގެ ރިޔާސީ އިންތިހާބު ގާތްވާއިރު އީސީ އަށް ރައްޔިތުން ކުރާ އިތުބާރު ގެއްލޭ ގޮތަށް އެއްވެސް ފަރާތަކުން އެ ކޮމިޝަނާ މަތިކޮށް އެއްވެސް ވާހަކައެއް ނުދެއްކުމަށް އެ ބަޔާނުގައި އިލްތިމާސްކޮށްފައި ވެ އެވެ.