ނިޒާމީ ވޯޓު ނަގަން ވަގުތު ދޭން އީސީން އެދިއްޖެ، ގިނަ މެމްބަރުން އެއްބަސް

ބަރުލަމާނީ ނިޒާމުގެ ވޯޓު ނަގަން މި މަހުގެ 30 ވަނަ ދުވަހުގެ ކުރިން ރައްޔިތުންގެ މަޖިލީހުން ފާސްކޮށްފައިވާ ގަރާރުން އަންގާފައިވިޔަސް، އެ ވޯޓު ނެގުމަށް އިތުރު ވަގުތު ބޭނުންވާ ކަމަށް އިލެކްޝަންސް ކޮމިޝަން (އީސީ) އިން އެދިފައިވާ އެދުމަށް އެއްބަސްވެވަޑައިގަންނަވާ ކަމަށް މަޖިލީހުގެ ގިނަ މެމްބަރުން މިއަދު ވިދާޅުވެއްޖެ އެވެ.

ބަރުލަމާނީ ނިޒާމުގެ ވޯޓާ ގުޅޭ ގަރާރު މަޖިލީހުން ފާސްކޮށް، އިލެކްޝަންސް ކޮމިޝަނަށް ފޮނުވާފައިވާ އިރު އެ ކޮމިޝަނުން ފުރަތަމަ ހުށަހެޅި ތާރީހަކީ މި މަހުގެ 29 ގައި ބަރުލަމާނީ ވޯޓު ނެގުމަށެވެ.

އެކަމަކު ރައްޔިތުންނާ އަހަންވީ ކޮން ސުވާލެއް ކަން އެ ގަރާރުން ސާފު ނުވާތީ އެކަން ސާފު ކުރުމަށް އިލެކްޝަންސް ކޮމިޝަނުން ވަނީ މަޖިލިހުގެ އިދާރާ އަށް ސިޓީއެއް ފޮނުވައިފަ އެވެ. އެ ކަމަށް ރައްޔިތުން ހޭލުންތެރި ކުރުމަށާއި އެހެނިހެން އިންތިޒާމުތައް ހަމަޖައްސައި، ގަވައިދު ހަދައި ބަޖެޓު ހޯދުމަށްޓަކައި އިތުރު ވަގުތު ބޭނުންވާ ކަމަށް އެ ސިޓީގައި ބުންޏެވެ.

"...މި އެންމެހާ ކަންކަމަށް ހޭދަވާނެ ކަމަށް ލަފާކުރެވޭ މުއްދަތުތަކަށް ބަލާއިރު، އެންމެ އަވަހަށް ވޯޓު ނެގުން ކުރިއަށް ގެންދެވޭނެ ތާރީހު ތިޔަ އިދާރާއަށް ފަހުން އަންގާނެ ކަމުގައި ދަންނަވަން،" މަޖިލީހުގެ މިއަދުގެ ޖަލްސާގައި އިއްވި ސިޓީގައި އީސީން ބުންޏެވެ.

އެ ސިޓީއާ ގުޅޭ ގޮތުން، މަޖިލީހުގައި މިއަދު ކުރިއަށް ގެންދިޔަ ބަހުސްގައި ވާހަކަ ދައްކަވަމުން ހެންވޭރު ހުޅަނގު ދާއިރާގެ ޑިމޮކްރެޓްސް މެމްބަރު ހަސަން ލަތީފް ވިދާޅުވީ އީސީން ވެސް ފާހަގަކޮށްފައިވާ ގޮތަށް މި މަސް ނިމުމުގެ ކުރިން އާންމު ވޯޓުގެ ކަންކަން ކުރިއަށް ގެންގޮސްގެން ދެ ނިޒާމާ ގުޅޭ އެންމެ ފުރިހަމަ މައުލޫމާތު ރައްޔިތުންނަށް ފޯރުކޮށްދިނުމާ މެދު ސުވާލު އުފެދޭ ކަމަށެވެ.

"އަޅުގަނޑު ހިތުން މި ވަގުތު އެމްޑީޕީގެ މެމްބަރުން ވެސް އަދި އާންމު މެމްބަރުން ވެސް އަދި ޕީޕީއެމާއި ޕީއެންސީގެ މެމްބަރުން ވެސް ފުންކޮށް ވިސްނައި މައުލޫމާތު ފޯރުކޮށްދެވޭނެ ގޮތްތައް ނިންމުމަކީ ވަރަށް މުހިންމު ކަމެއް،" ހަސަން ވިދާޅުވި އެވެ.

މި ހުރިހާ ކަމަކަށް ރިއާޔަތްކޮށް، އޭނާ ވިދާޅުވި ގޮތުގައި ވޯޓު ނަގާނެ ތާރީހެއް މަޖިލީހުން އަލުން ކަނޑައެޅުމަކީ މި ދަނޑިވަޅުގައި ވަރަށް މުހިންމު ކަމެކެވެ.

ހަސަންގެ ވާހަކައަށް ތާއީދުކުރައްވައި މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ ޑިމޮކްރެޓްސް މެމްބަރު އީވާ އަބްދުﷲ ވިދާޅުވީ، ވެރިކަމުގެ ނިޒާމު ބަދަލުކުރުމާ މެދު ރައްޔިތުންގެ ހިޔާލު ހޯދުމުގެ ކުރިން އެކަމުގެ ފުރިހަމަ މައުލޫމާތު މަޖިލީހާއި ސިޔާސީ ޕާޓީތަކާއި އަދި މީޑިއާތަކުން ވެސް ރައްޔިތުންނަށް ފޯރުކޮށްދޭންޖެހޭ ކަމަށެވެ.

އީވާ ވިދާޅުވި ގޮތުގައި މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގެ ދެ ވަނަ ބުރުގައި ރާއްޖޭގައި އޮތް އެންމެ ބޮޑު ދެ ޕާޓީން ވާދަކުރުމަށް ފަހު، ހަމަޖެހިލައިގެން އެ ދެ ޕާޓީގެ ތެރޭގައި ވެސް ނިޒާމާ ގުޅޭގޮތުން މަޝްވަރާ ކުރަން ވަގުތު ބޭނުން ވާނެ އެވެ.

"އަޅުގަނޑަށް ހީވަނީ މި ކަމުގެ މައުލޫމާތު ރައްޔިތުންނާ ހަމައަށް ފޯރުކޮށްދޭން އަދި ވަގުތު ދޭން ޖެހޭ ހެން،" އީވާ ވިދާޅުވި އެވެ.

ބަހުސްގައި ވާހަކަ ދައްކަވަމުން، މަޖިލީހުގެ އަޣުލަބިއްޔަތު އޮންނަ އެމްޑީޕީގެ ޕާލަމެންޓަރީ ގުރޫޕުގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވީ މަޖިލީހުގެ ގަރާރު ފާސްކުރީ ރިޔާސީ އިންތިހާބުގެ މެދު ތެރެއިން، ވަރަށް ދަތި ވަގުތެއްގައި ކަމަށާއި، އެހެންކަމުން މި ގަރާރާ މެދު ގިނަ މެމްބަރުންނަށް ފުންކޮށް ވިސްނާލާނެ ވަގުތު ލިބިވަޑައިގެންނެވި ކަމަށް ގަބޫލު ނުކުރެއްވޭ ކަމަށެވެ.

އޭނާ ވިދާޅުވި ގޮތުގައި ވަރަށް އަވަސް އަރުވާލައިގެން، އެކަށީގެންވާ ގޮތެއްގައި މަޝްވަރާ ނުކުރުމުގެ ސަބަބުން އީސީން ވެސް ފާހަގަކޮށްފައިވާ ފަދައިން މި ގަރާރުގައި ހިމެނެންޖެހޭ މުހިންމު ކަންކަން ނުހިމެނެ އެވެ.

އެއާ އެކު އަސްލަމް ހުށަހެޅުއްވީ އީސީގެ ސިޓީ މަޖިލީހުގެ ދާއިމީ ކޮމިޓީއަކަށް ގެންގޮސްގެން ވަރަށް ފުޅާކޮށް މަޝްވަރާ ކުރުމަށެވެ.

"ވެރިކަމުގެ ނިޒާމު ބަދަލުކުރުމާ މެދު އަޅުގަނޑު ނިސްބަތްވާ އެމްޑީޕީން ވަކި ގޮތެއް ކަނޑައަޅާފައި ނުވާތީ ވެ، އެ ވާހަކަ ވެސް ދަންނަވާލަން،" ސިޔާސީ ޕާޓީތަކުގެ މެދުގައި ވެސް މިކަމާ މެދު މަޝްވަރާ ކުރަންޖެހޭ ކަން ފާހަގަކުރައްވައި އޭނާ ވިދާޅުވި އެވެ.