ނަޝީދު ވަކިކުރަން އުޅެގެން އެމްޑީޕީ އަނެއްކާވެސް ވާނީ ބަލި: އާޒިމް

ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން އުޅެގެން އެމްޑީޕީން އަނެއްކާވެސް ބޮޑު ނާކާމިޔާބީއަކާ ކުރިމަތިލާން ޖެހޭނެ ކަމަށް ޑިމޮކްރެޓްސްގެ ޕީޖީ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް މިރޭ ވިދާޅުވެއްޖެ އެވެ.

ޑިމޮކްރެޓްސް އިން މިރޭ ބޭއްވި ޖަގަހަ ޖަލްސާގައި އާޒިމް ވިދާޅުވީ ނަޝީދުގެ އިތުބާރު ނެތް ކަމުގެ މައްސަލަ "ކުޅޭކުޅޭ މައްސަލައަކަށް" އެމްޑީޕީން ހަދައިފި ކަމަށެވެ. އެމްޑީޕީން ބޭނުންހާ ގޮތެއް ހަދަން އެ ޕާޓީން ފުރުސަތު ދީގެން ބަލަން ނުތިބޭނެ ކަމަށް އޭނާ ވިދާޅުވި އެވެ.

އެމްޑީޕީން ހުށަހަޅާފައިވާ ނަޝީދުގެ އިތުބާރު ނެތް ކަމުގެ މައްސަލަ ބޭއްވޭނެ ކަމާ މެދު ސުވާލު އުފައްދާފައި ވަނިކޮށް، އަންނަ އާދިއްތަ ދުވަހަށް ޖަލްސާ ތާވަލުކޮށް، އިތުބާރު ނެތް ކަމުގެ މައްސަލަ ވަނީ އެޖެންޑާކޮށްފަ އެވެ. މަޖިލީހުގެ އިދާރާއިން އާންމުކުރި އާދިއްތަ ދުވަހުގެ އެޖެންޑާގައި އޮތީ ނަޝީދުގެ އިތުބާރު ނެތް ކަމަށް ހުށަހަޅާފައިވާ މައްސަލައާ މެދު ގޮތެއް ނިންމުން އެކަންޏެވެ.

މިދިޔަ މަހު ބޭއްވި ރިޔާސީ އިންތިހާބުން އެމްޑީޕީ ބަލިވެފައިވާއިރު، ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ވައްދައިގެން އަނެއްކާވެސް އެ ޕާޓީ "ބޮޑުތަނުން ބަލިވާނެ" ކަމަށް އާޒިމް ވިދާޅުވި އެވެ.

"އަނެއްކާވެސް އެމްޑީޕީ ތި ދަނީ ބަލިވާންށޭ، ބޮޑުތަނުން ބަލިވާންށޭ. އަޅުގަނޑުމެން އިރާދަކުރެއްވިއްޔާ ރައްޔިތުންގެ މަޖިލީހުގައި ތިބެގެން، މަޖިލީހުގެ ރައީސް ވަކިކުރަން ހުށަހަޅާފައި އޮތް ހުށަހެޅުން ބަލައިގަނެގެން ވަކިކުރެވޭނެ އެއްވެސް ގޮތެއް، އެ ފުރުސަތެއް ނުދޭނަމޭ،" އޭނާ ވިދާޅުވި އެވެ.

"ޑިމޮކްރެޓްސް އިން އެ ފުރުސަތު ނުދޭނަން."

އާޒިމް ވިދާޅުވި ގޮތުގައި، ރާއްޖޭގައި އުފެދުނު އެންމެ ބޮޑު ސިޔާސީ ޕާޓީ ކަމަށްވާ އެމްޑީޕީ ވަނީ މިދިޔަ ފަސް އަހަރުގެ ތެރޭގައި "ފުނޑުފުނޑުވެފަ" އެވެ. ދައުލަތުގެ ހުރިހާ ބާރެއް ލިބިގެން ވެސް އެ ޕާޓީއަށް އެއްވެސް ނަތީޖާއެއް ނުނެރެވި ރައްޔިތުންގެ ކުރިމަތީގައި ފެއިލްވީ ރައީސް އިބްރާހިމް މުހައްމަދު ސޯލިހުގެ ނާގާބިލު ކަމުން ކަމަށް އޭނާ ވިދާޅުވި އެވެ.

ނަޝީދު ވަކިކުރަން ވެސް އުޅެނީ، ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ކުރިމަތިލައްވަން ޖެހުނު ބޮޑު ނާކާމިޔާބީ އަށް ފަހު އެމަނިކުފާނުގެ "ހިތަށް ތަސައްލީއެއް ގެނެސްދިނުމަށްޓަކައި" ކަމަށް އާޒިމް ވިދާޅުވި އެވެ.

"އަޅުގަނޑުގެ ކުރީގެ ކޮލީގުން، އެމްޑީޕީގެ މެމްބަރުންނަށް ދަންނަވާލަން ބޭނުންވަނީ ރިޔާސީ އިންތިހާބަކުން ބަލިވުމަކީ ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށަހަޅަން ޖެހޭ ސަބަބެއް ނޫނޭ. އެހެން ކަމަށް ވަންޏާ މި ކަހަލަ ވާދަވެރި އިންތިހާބުތަކުގައި ރައީސް ވާދަނުކުރައްވާ،" އޭނާ ވިދާޅުވި އެވެ.

އެމްޑީޕީން ވަނީ ނަޝީދު ވަކިކުރުމުގެ މައްސަލަ ނުނިންމާހާ ހިނދަކު މަޖިލީހުގެ އިތުރު އެއްވެސް މަސައްކަތެއް ދެން ނުކުރާނެ ކަމަށް ވެސް ބުނެފަ އެވެ. އަދި ނަޝީދު ރިޔާސަތުގައި އިންނަވައިގެން އިންތިހާބީ ރައީސް ޑރ. މުހައްމަދު މުއިއްޒު ކުރައްވާ ހުވާ ބަލައިނުގަންނާނެ ކަމަށް ވެސް އެ ޕާޓީން ބުންޏެވެ.

ރިޔާސީ އިންތިހާބުގެ ކުރިން ވެސް ނަޝީދު ވަކިކުރަން އެމްޑީޕީން މަސައްކަތް ކުރި އެވެ. ނަމަވެސް، އިންތިހާބަށް ވަގުތު ކުޑަތަން ވެފައި ވަނިކޮށް އެ މައްސަލަ އަނބުރާ ގެންދިޔައީ އެވެ.