ބާންލީގައި އިތުރު ފަސް އަހަރު ހުންނަން ކޮމްޕެނީ އެއްބަސްވެއްޖެ

ބާންލީ (މެއި 7) - ބާންލީ އަށް އިނގިރޭސި ދެވަނަ ޑިވިޝަން ކަމަށްވާ "ޗެމްޕިއަންޝިޕް" ކާމިޔާބު ކޮށްދީ އެޓީމު އަންނަ ސީޒަންގެ ޕްރިމިއާ ލީގަށް ޕްރޮމޯޓް ކޯށްދިން ޒުވާން ކޯޗު ވިންސެންޓް ކޮމްޕެނީ، އިތުރު ފަސް އަހަރު ކްލަބުގައި މަޑުކުރަން ނިންމައިފި އެވެ.

އުމުރުން 37 އަހަރުގެ ކޮމްޕެނީ ވަނީ ފުރަތަމަ ސީޒަންގައި އެޓީމަށް ލީގު ޗެމްޕިއަންކަން ހޯދައިދީފަ އެވެ. އަދި މި ސީޒަންގެ ފަހު މެޗަށް އެޓީމު ނުކުންނައިރު، މޮޅެއް ހޯދައިގެން 100 ޕޮއިންޓު ހަމަކުރުމުގެ ފުރުސަތު ވެސް އެޓީމަށް އެބަ އޮތެވެ. އެންމެ ފަހުން ޗެމްޕިއަންކަޝިޕުގައި ޓީމަކުން 100 ޕޮއިންޓް ހަމަކުރީ 2013/2014 ސީޒަންގައި ލެސްޓާ ސިޓީ އެވެ.

"ބާންލީ އާއި ޓާފް މޫރު (ބާންލީގެ ދަނޑު) އެއީ އަހަރެންނަށް އެންމެ ރަނގަޅު ހިސާބު ކަމުގެ އިހުށަސް ކުރެވުނު ފެށުނީއްސުރެން ވެސް. އެހެންވެ އިތުރު ފަސް އަހަރު ކްލަބުގައި ހުންނަން ސޮއިކުރެވުމަކީ ވެސް ހިތްހަމަޖެހުމެއް،" ކޮންޓްރެކްތް އާކުރުމަށް ފަހު ކޮމްޕެނީ ބުންޏެވެ.

"ސަޕޯޓަރުންނާ އެކު ޓާފް މޫރަކީ އަނެއްކާވެސް ކާމިޔާބު ތަނަކަށް ހެދިއްޖެ. އަދި އަހަރެމެންގެ އަމާޒަކީ ކުރިމަގުގައި ބާންލީ އަށް ކުރިއެރުންތަކެއް ހޯދައިދިނުން."

ކޮމްޕެނީ ވަނީ މިދިޔަ ސީޒަންގައި ޕްރިމިއާ ލީގުން ރެލިގޭޓްވި ބާންލީއާ ހަވާލުވެ އެޓީމަށް އާ އުންމީދެއް ގެނެސް ދީފަ އެވެ. ލީގުގައި މިހާތަނަށް އެޓީމު ބަލިވެފައި ވަނީ ތިން މެޗުންނެވެ. އޭގެ ތެރެއިން އަމިއްލަ ދަނޑުގައި ބަލިވީ އެންމެ މެޗަކުންނެވެ.

ލީގުގެ ފަހު މެޗާ ކުރިމަތިލާއިރު ބާންލީ ލީގުގެ އެއްވަނައިގައި އޮތީ، ދެވަނައިގައި އޮތް ޝެފީލްޑް ޔުނައިޓެޑަށް ވުރެ 10 ޕޮއިންޓް ކުރީގަ އެވެ. ބާންލީއާ އެކު ޝެފީލްޑް ވެސް ވަނީ އަންނަ ސީޒަންގެ ޕްރިމިއާ ލީގަށް ޕްރޮމޯޓް ވެފަ އެވެ.

"ބާންލީ ރަނގަޅު މިސްރާބަކާ އެކު ކުރިއަށް ގެންދަން އަހަރެމެންނަށް ފެނުނު އެންމެ ރަނގަޅު ފަރާތަކީ އޭނާ،" ކޮމްޕެނީއާ ގުޅޭގޮތުން ބާންލީގެ ޗެއާމަން އެލަން ޕޭސް ބުންޏެވެ.

"އޭނާއަކީ ވަރުގަދަ ޝަހްސިއްޔަތެއް ހުރި ލީޑަރެއް. އަހަރެމެން އެންމެން ކުލަބު ގެންދަން ބޭނުންވާ މިސްރާބާއި ކުލަބަށް އާ އުސްމިންތަކެއް އޭނާއަށް ގެނެސްދެވޭނެ."

ބެލްޖިއަމް ގައުމީ ޓީމާއި މެންޗެސްޓާ ސިޓީގެ ވެސް ކެޕްޓަންކަން ކުރި ކޮމްޕެނީ ކުޅުން ހުއްޓާލީ 2020 ވަނަ އަހަރެވެ. އޭނާގެ ކޯޗިން ކެރިއަރު ފެށީ އެންމެ ފަހުން ބެލްޖިއަމްގެ އެންޑަލެޗް އަށް ކުޅެމުންނެވެ.