"ޖޯން ވިކް ޗެޕްޓަ 4" އަށް ބޮޑު ތަރުހީބެއް!

މަޝްހޫރު އެކްޝަން ސީކުއެލް، "ޖޯން ވިކް" ގެ ހަތަރު ވަނަ ބަޔަށް ގިނަބައެއްގެ ތަރުހީބު ލިބިއްޖެ އެވެ.

ކިއަނޫ ރީވްސް ލީޑު ކުޅޭ އެ ސީކުއެލްގެ "ޖޯން ވިކް؛ ޗެޕްޓަ 4" ޕްރިމިއާ ކުރީ މިދިޔަ ހުކުރު ދުވަހު އެވެ. ބޭރުގެ ނޫސްތަކުން ބުނާގޮތުން، ފުރަތަމަ އެޅުވި ޕްރިމިއާ ޝޯއަށް ވެސް، 3855 ސަރަހައްދަކުން، 29.4 މިލިއަން އެމެރިކާ ޑޮލަރު ވަނީ އެ ފިލްމަށް ލިބިފަ އެވެ.

"ވެރައިޓީ" ނޫހުން ބުނި ގޮތުގައި، އެ ފިލްމު އެޅުވި ފުރަތަމަ ހަފްތާ ބަންދުގެ އާމްދަނީ، ސީކުއެލްގެ ތިން ވަނަ ފިލްމު، "ޖޯން ވިކް ޗެޕްޓަ 3؛ ޕެރަބެލަމް" ގެ 56.8 މިލިއަން ޑޮލަރުގެ ރެކޯޑު މުގުރާލާނެ އެވެ.

ބޮކްސްއޮފީހުގެ ކާމިޔާބީގެ އިތުރުން، ފިލްމު ކްރިޓިކްސްގެ ފަރާތުން ވެސް މި ފިލްމަށް ވަނީ ބޮޑު ތަރުހީބެއް ލިބިފަ އެވެ. ފިލްމު ރިވިއު ވެބްސައިޓް "ރޮޓެން ޓޮމާޓޯސް" ގެ ރޭޓިން 95 ޕަސެންޓުގައި އުޅޭއިރު، ސިނަމާތަކަށް ފިލްމު ބަލަން ދާ މީހުންގެ ތަޖުރިބާ ދިރާސާ ކުރާ "ރިސާޗް ފާމް ސިނަމާ ސްކޯ" އިން މި ފިލްމަށް "އޭ" ގްރޭޑެއް ވެސް ވަނީ ދީފަ އެވެ.

މި ފިލްމު ހަދަން 100 މިލިއަން ޑޮލަރު ހަރަދުވެފައިވާއިރު، މިއީ މިހާތަނަށް މި ސީކުއެލްގައި އެންމެ ބޮޑު ހަރަދެއް ކުރަން ޖެހުނު ފިލްމެވެ. ލަފާކުރެވޭގޮތުން، ފުރަތަމަ ހަތަރު ވަރަކަށް ޝޯއަށް ފަހު، ފިލްމުގެ ހަރަދުތައް ކަވަރު ކުރެވޭ ވަރަށް ވުރެ ބޮޑު އާމްދަނީ އެއް ލިބޭނެ އެވެ.

ކިއާނޫ ރީވްސް ހިޓް މޭނެއްގެ ރޯލުން ފެންނަ ސީކުއެލްގެ ހަތަރު ވަނަ ބައިގާ އޭނާ މަސައްކަތް ކުރަނީ "ހައި ޓޭބަލް" ގެ އަތްދަށުން ސަލާމަތްވުމަށެވެ. "ހައިޓޭބަލް" އަކީ "ޖޯން ވިކް" ސީކުއެލްގައި ކުށުގެ "އަންޑަވޯލްޑް" ބަލަހައްޓާ ނުބައި ކުށްވެރިންގެ 12 ލީޑަރުންގެ ކައުންސިލެކެވެ.